ಬೆಂಗಳೂರು: ಸ್ಥಳೀಯ ಮೋಟಾರ್‌ ಕಂಪನಿಯೊಂದರಲ್ಲಿ ಸೆಕ್ಯುರಿಟಿ ಗಾರ್ಡ್‌ ಆಗಿ ಕೆಲಸ ಮಾಡುತ್ತಿರುವ ಜಮ್ಮು ಮತ್ತು ಕಾಶ್ಮೀರದ ಪ್ರತಿಭಾನ್ವಿತ ಆಲ್‌ರೌಂಡರ್‌ ಮನ್ಜೂರ್‌ ಅಹ್ಮದ್‌ ದರ್‌, ಮುಂಬರುವ ಐಪಿಎಲ್‌ನಲ್ಲಿ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ತಂಡದ ಪರ ಆಡಲಿದ್ದಾರೆ.
ಐಪಿಎಲ್‌ ಹರಾಜಿನಲ್ಲಿ ಕಿಂಗ್ಸ್‌ ಇಲೆವೆನ್‌ ತಂಡ 6.2 ಎಡಿ ಎತ್ತರ ಹಾಗೂ 84 ಕೆಜಿ ತೂಕ ಹೊಂದಿರುವ ಅಜಾನುಬಾಹು ಮನ್ಜೂರ್‌ ಅವರನ್ನು ಮೂಲ ಬೆಲೆ 20 ಲಕ್ಷ ರೂ.ಗಳಿಗೆ ಖರೀದಿಸಿದೆ. ಕಾಶ್ಮೀರದ ಬಂಡಿಪುರ್‌ ಜಿಲ್ಲೆಯ ಸೋನಾವರಿ ಪ್ರದೇಶದ ನಿವಾಸಿಯಾಗಿರುವ ಮನ್ಜೂರ್‌ ಅವರದ್ದು ಬಡ ಕುಟುಂಬ. ತಂದೆ ದಿನಗೂಲಿ ನೌಕರ. ಮನ್ಜೂರ್‌ಗೆ ಮೂವರು ಸಹೋದರಿದ್ದು, ತಂದೆಯ ದುಡಿಮೆ ಕುಟುಂಬ ನಿರ್ವಹಣೆಗೆ ಸಾಕಾಗುವುದಿಲ್ಲ. ಹೀಗಾಗಿ ಕುಟುಂಬದ ಜವಾಬ್ದಾರಿಯೂ ಇವರ ಮೇಲಿದೆ. ಹೀಗಾಗಿ ರಾತ್ರಿ ಹೊತ್ತು ಭದ್ರತಾ ಸಿಬ್ಬಂದಿಯಾಗಿ ಕೆಲಸ ಮಾಡುತ್ತಾ, ಹಗಲು ಹೊತ್ತಿನಲ್ಲಿ ಮರಗೆಲಸವನ್ನು ಮಾಡುತ್ತಾರೆ. ಇದರ ಮಧ್ಯೆ ಸಮಯ ಹೊಂದಿಸಿಕೊಂಡು ಕ್ರಿಕೆಟ್‌ ಆಡುತ್ತಾರೆ.
ಕಳೆದೆರಡು ವರ್ಷಗಳಿಂದ ಸೈಯದ್‌ ಮುಷ್ಕಾ ಅಲಿ ಟಿ20 ಟೂರ್ನಿಯಲ್ಲಿ ಜಮ್ಮು ಮತ್ತು ಕಾಶ್ಮೀರ ತಂಡವನ್ನು ಪ್ರತಿನಿಧಿಸುತ್ತಿರುವ ಮನ್ಜೂರ್‌, ಅತಿ ದೂರಕ್ಕೆ ಸಿಕ್ಸರ್‌ಗಳನ್ನು ಬಾರಿಸಿ ಗಮನ ಸೆಳೆದಿದ್ದಾರೆ. ವೇಟ್‌ಲಿಫ್ಟರ್‌ ಮತ್ತು ಕಬಡ್ಡಿ ಆಟಗಾರ ಕೂಡ ಆಗಿರುವ ಮನ್ಜೂರ್‌, ಸ್ಥಳೀಯ ಟೂರ್ನಿಗಳಲ್ಲಿ ಆಡುತ್ತಾ ಅಲ್ಪ ಸ್ವಲ್ಪ ಹಣವನ್ನು ಗಳಿಸುತ್ತಾರೆ.
ಐಪಿಎಲ್‌ ಹರಾಜಿಗೂ ಮುನ್ನ ಮನ್ಜೂರ್‌, ರಾಜಸ್ಥಾನ್‌ ರಾಯಲ್ಸ್‌ ತಂಡದ ಟ್ರಯಲ್ಸ್‌ನಲ್ಲಿ ಭಾಗವಹಿಸಿದ್ದರು. ಆದರೆ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ತಮ್ಮನ್ನು ತಂಡಕ್ಕೆ ಸೇರಿಸಿಕೊಂಡದನ್ನು ಒಂದು ಕ್ಷ ಣ ನಂಬಲಾಗಲಿಲ್ಲ ಎಂದು ಮನ್ಜೂರ್‌ ಹೇಳಿದ್ದಾರೆ.