ಸತತ 7 ಫಿಫ್ಟಿಗಳ ಬಳಿಕ ರಾಹುಲ್ 'ಗೋಲ್ಡನ್ ಡಕ್'

ಕೋಲ್ಕತ್ತಾ: ಇಲ್ಲಿ ಈಡೆನ್ ಗಾರ್ಡನ್ಸ್ ಮೈದಾನದಲ್ಲಿ ಪ್ರವಾಸಿ ಶ್ರೀಲಂಕಾ ವಿರುದ್ಧ ಸಾಗುತ್ತಿರುವ ಮಳೆ ಬಾಧಿತ ಮೊದಲ ಟೆಸ್ಟ್ ಪಂದ್ಯದ ಪ್ರಥಮ ಎಸೆತದಲ್ಲೇ ಔಟ್ ಆಗುವ ಮೂಲಕ ಭಾರತ ತಂಡದ ಬಲಗೈ ಓಪನರ್ ಬ್ಯಾಟ್ಸ್‌ಮನ್ ಕೆಎಲ್ ರಾಹುಲ್ ಅಪಖ್ಯಾತಿಗೆ ಒಳಗಾಗಿದ್ದಾರೆ.

ಟೆಸ್ಟ್ ಕ್ರಿಕೆಟ್‌ನಲ್ಲಿ ಸತತ ಏಳು ಅರ್ಧಶತಕಗಳನ್ನು ಸಿಡಿಸುವ ಮೂಲಕ ರಾಹುಲ್ ಗೋಲ್ಡನ್ ಡಕ್‌ಗೆ ಬಲಿಯಾಗಿರುವುದು ಮಗದೊಂದು ವಿಶೇಷತೆಯಾಗಿದೆ.

ಮಳೆಯಿಂದಾಗಿ ವಿಳಂಬವಾಗಿ ಆರಂಭವಾದ ಪಂದ್ಯದಲ್ಲಿ ಸುರಂಗ ಲಕ್ಮಲ್ ಅವರ ಮೊದಲ ಎಸೆತದಲ್ಲೇ ಕರ್ನಾಟಕದ ರಾಹುಲ್ ಬ್ಯಾಟ್‌ಗೆ ಸವರಿದ ಚೆಂಡು ವಿಕೆಟ್ ಕೀಪರ್ ಡಿಕ್‌‌ವೆಲ್ಲ ಕೈಗಳನ್ನು ಭದ್ರವಾಗಿ ಸೇರಿಸಿತ್ತು.

ಈ ಮೂಲಕ ಸುನಿಲ್ ಗಾವಸ್ಕರ್, ಸುಧೀರ್ ನಾಯ್ಕ್, ವಿವಿವಿ ರಾಮನ್, ಎಸ್‌ಎಸ್ ದಾಸ್ ಹಾಗೂ ವಾಸೀಂ ಜಾಫರ್ ಬಳಿಕ ಗೋಲ್ಡನ್ ಡಕ್‌ಗೆ ಬಲಿಯಾದ ಭಾರತೀಯ ಬ್ಯಾಟ್ಸ್‌ಮನ್ ಎಂದೆನಿಸಿಕೊಂಡಿದ್ದಾರೆ. ಈ ಪೈಕಿ ಗವಾಸ್ಕರ್ ಮೂರು ಬಾರಿ ಶೂನ್ಯಕ್ಕೆ ವಾಪಾಸಾಗಿದ್ದರು.

2016-17ನೇ ಅವಧಿಯಲ್ಲಿ ರಾಹುಲ್ ಸತತ ಏಳು ಅರ್ಧಶತಗಳನ್ನು ಸಿಡಿಸುವ ಮೂಲಕ ಸರ್ ಎವರ್ಟನ್ ವೀಕ್ಸ್ (1948-49), ಶಿವ್‌ನರೈನ್ ಚಂದ್ರಪಾಲ್ (2000-01), ಆ್ಯಂಡಿ ಫ್ಲವರ್ (2006-07), ಕುಮಾರ ಸಂಗಕ್ಕರ (2013-14) ಮ್ತತು ಕ್ರಿಸ್ ರೋಜರ್ಸ್ ಸಾಲಿಗೆ ಸೇರಿಕೊಂಡಿದ್ದರು.