ರಾಹುಲ್ ಕಾಡುತ್ತಿರುವ ಕನಸು ಮತ್ತು ಭಯ!

ಹೊಸದಿಲ್ಲಿ: ಕೆಲವೊಮ್ಮೆ 'ಒಂದೇ ಪದವೇ ಸಾಕು ಇಡೀ ಮಾತುಗಳನ್ನೇ ವರ್ಣಿಸಲು'. ಪ್ರಸ್ತುತ ಇಂಗ್ಲೆಂಡ್ ಪ್ರವಾಸದಲ್ಲಿರುವ ಕರ್ನಾಟಕದ ಕೆಎಲ್ ರಾಹುಲ್ ಮಾಡಿರುವ ಎರಡು ಪದಗಳ ಟ್ವೀಟ್ ಸಹ ಹಲವಾರು ಅಂಶಗಳನ್ನು ಬಹಿರಂಗ ಮಾಡುತ್ತದೆ.

ಕ್ರಿಕೆಟ್ ಕಾಶಿ ಐತಿಹಾಸಿಕ ಲಾರ್ಡ್ಸ್ ಮೈದಾನದಲ್ಲಿ ಆಡುವುದು ಪ್ರತಿಯೊಬ್ಬ ಕ್ರಿಕೆಟಿಗನ ಕನಸಾಗಿರುತ್ತದೆ. ಆದರೆ ಆತಿಥೇಯ ಇಂಗ್ಲೆಂಡ್ ತಂಡವನ್ನು ಅವರದ್ದೇ ನೆಲದಲ್ಲಿ ಎದುರಿಸುವುದು ಮತ್ತಷ್ಟು ಕಷ್ಟಕರ.

ಲಾರ್ಡ್ಸ್ ಪೆವಿಲಿಯನ್‌ನಿಂದ ಮೈದಾನಕ್ಕಿಳಿಯುವ ಚಿತ್ರ ಹಂಚಿಕೊಂಡಿರುವ ರಾಹುಲ್, ಕನಸು ಹಾಗೂ ಭಯ ಬಗೆಗಿನ ಮಿಶ್ರ ಭಾವನೆಗಳನ್ನು ವ್ಯಕ್ತಪಡಿಸಿದ್ದಾರೆ.

ಆಸ್ಟ್ರೇಲಿಯಾ ನೆಲದಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ ಎರಡನೇ ಟೆಸ್ಟ್ ಪಂದ್ಯದಲ್ಲಿ ಶತಕ ಸಾಧನೆ ಮಾಡಿರುವ ರಾಹುಲ್ ಭವಿಷ್ಯದ ತಾರೆ ಎಂದೇ ಪರಿಗಣಿಸಲ್ಪಟ್ಟಿದ್ದರು. ಆದರೆ ಮೊದಲು ದಕ್ಷಿಣ ಆಫ್ರಿಕಾ ಬಳಿಕವೀಗ ಇಂಗ್ಲೆಂಡ್ ಸರಣಿಯಲ್ಲೂ ಸತತ ವೈಫಲ್ಯ ಎದುರಿಸುತ್ತಿರುವುದು ಅಭಿಮಾನಿಗಳು ಭಾರಿ ನಿರಾಸೆಯನ್ನುಂಟು ಮಾಡಿದೆ.

26ರ ಹರೆಯದ ರಾಹುಲ್ ಮೊದಲೆರಡು ಟೆಸ್ಟ್ ಪಂದ್ಯಗಳಲ್ಲಿ ಆಡಿರುವ ನಾಲ್ಕು ಇನ್ನಿಂಗ್ಸ್‌ಗಳಲ್ಲಿ ಬರಿ 35 ರನ್ ಮಾತ್ರ ಗಳಿಸಿದ್ದಾರೆ. ಪ್ರಸ್ತುತ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಅವಕಾಶ ದೊರಕಬಹುದೇ ಎಂಬುದನ್ನು ಕಾದು ನೋಡಬೇಕಿದೆ.