ರಾಹುಲ್ ದಾಖಲೆ ಸರಿಗಟ್ಟಿದ ರಾಹುಲ್

ಲಂಡನ್: ಭಾರತ ಕ್ರಿಕೆಟ್ ತಂಡದ ತಡೆಗೋಡೆ ಖ್ಯಾತಿದ ಮಾಜಿ ಐಕಾನ್ ರಾಹುಲ್ ದ್ರಾವಿಡ್ ಸ್ಥಾನವನ್ನು ಸಮರ್ಥವಾಗಿ ತುಂಬುವ ಆಶಾಕಿರಣ ಮೂಡಿಸಿರುವ ಕರ್ನಾಟಕದವರೇ ಆದ ಕೆಎಲ್ ರಾಹುಲ್, ಬ್ಯಾಟಿಂಗ್‌ನಲ್ಲಿ ನಿರಾಸೆ ಮೂಡಿಸಿರಬಹುದು. ಆದರೆ ಫೀಲ್ಡಿಂಗ್‌ನಲ್ಲಿ ದ್ರಾವಿಡ್‌ಗೆ ಸರಿ ಸಮವಾಗಿ ನಿಂತಿದ್ದಾರೆ.

ಸ್ಲಿಪ್ ಕ್ಷೇತ್ರರಕ್ಷಣೆಯಲ್ಲಿ ದ್ರಾವಿಡ್ ಅದೇ ಹಾದಿ ತುಳಿದಿರುವ ಕೆಎಲ್ ರಾಹುಲ್, ಪ್ರಸಕ್ತ ಸಾಗುತ್ತಿರುವ ಇಂಗ್ಲೆಂಡ್ ಸರಣಿಯಲ್ಲಿ ಗಮನಾರ್ಹ ಸಾಧನೆ ಮಾಡಿದ್ದಾರೆ. ಹಾಗೆಯೇ ಸರಣಿಯೊಂದರಲ್ಲಿ ಅತಿ ಹೆಚ್ಚು ಕ್ಯಾಚ್‌ ಹಿಡಿರುವ ಭಾರತೀಯ ಫೀಲ್ಡರ್‌ಗಳ ಪೈಕಿ ದ್ರಾವಿಡ್ ದಾಖಲೆಯನ್ನು ಸರಿಗಟ್ಟಿದ್ದಾರೆ.

2004 ಆಸ್ಟ್ರೇಲಿಯಾ ವಿರುದ್ಧ ರಾಹುಲ್ ದ್ರಾವಿಡ್ 13 ಕ್ಯಾಚ್‌ಗಳನ್ನು ಹಿಡಿದಿದ್ದರು. ಇದೀಗ ಇಂಗ್ಲೆಂಡ್ ವಿರುದ್ಧದ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಸ್ಟುವರ್ಟ್ ಬ್ರಾಡ್ ಕ್ಯಾಚ್ ಹಿಡಿದಿರುವ ರಾಹುಲ್ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ಪ್ರಸ್ತುತ ಎರಡನೇ ಇನ್ನಿಂಗ್ಸ್‌ನಲ್ಲಿ ಇನ್ನು ಒಂದು ಕ್ಯಾಚ್ ಹಿಡಿಯುವ ಅವಕಾಶ ಲಭಿಸಿದರೆ ದ್ರಾವಿಡ್ ದಾಖಲೆ ಮುರಿಯುವ ಅವಕಾಶವನ್ನು ಕೆಎಲ್ ರಾಹುಲ್ ಪಡೆಯಲಿದ್ದಾರೆ.

ಅಂದ ಹಾಗೆ ಬ್ಯಾಟಿಂಗ್‌ನಲ್ಲಿ ರಾಹುಲ್ ಸತತ ವೈಫಲ್ಯಕ್ಕೊಳಗಾಗಿದ್ದರು. ಅಲ್ಲದೆ ಏಷ್ಯಾ ಉಪಖಂಡದ ಹೊರಗಡೆ ಕೊನೆಯ 14 ಇನ್ನಿಂಗ್ಸ್‌ನಲ್ಲಿ ಅನುಕ್ರಮವಾಗಿ 28, 10, 4, 0, 16, 4, 13, 8, 10, 23, 36, 19, 0, 37 ರನ್‌ಗಳನ್ನಷ್ಟೇ ಗಳಿಸಿದ್ದರು.