ಧೋನಿಗೆ ಕೋಹ್ಲಿ ಬೆಂಬಲ ಗಮನಾರ್ಹ: ಗಂಗೂಲಿ

ಕೋಲ್ಕತ್ತಾ: ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಅವರನ್ನು ನಿರಂತರವಾಗಿ ಬೆಂಬಲಿಸುತ್ತಿರುವ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೋಹ್ಲಿ ಅವರನ್ನು ಮಾಜಿ ಕಪ್ತಾನ ಬಂಗಾಳ ಹುಲಿ ಖ್ಯಾತಿಯ ಸೌರವ್ ಗಂಗೂಲಿ ಶ್ಲಾಘಿಸಿದ್ದಾರೆ.

ಕೋಹ್ಲಿ ಅದ್ಭುತ ನಾಯಕ, ಡ್ರೆಸ್ಸಿಂಗ್ ಕೊಠಡಿಯೊಳಗೆ ಅಥವಾ ಗೇಮ್ ಪ್ಲಾನ್‌ನಲ್ಲಿ ಅವರೇನು ಮಾಡುತ್ತಾರೆಂಬುದು ನನಗೆ ಗೊತ್ತಿಲ್ಲ. ಯಾಕೆಂದರೆ ತಂಡದಿಂದ ನಾನು ದೂರವಿದ್ದೇನೆ. ತಂಡದ ಜತೆ ಅವರೇನು ಮಾತನಾಡುತ್ತಾರೆ ಎಂಬುದು ತಿಳಿದಿಲ್ಲ. ಆದರೆ ಆಟಗಾರರಿಗೆ ಅವರು ನೀಡುತ್ತಿರುವ ಬೆಂಬಲ ಮಾತ್ರ ಗಮನಾರ್ಹವೆನಿಸಿದೆ ಎಂದವರು ಸೇರಿಸಿದರು.

ನಾನು ಧೋನಿ ಬಗ್ಗೆ ಹೇಳುತ್ತಿದ್ದೇನೆ. ವಿರಾಟ್ ಮಾಜಿ ನಾಯಕನಿಗೆ ನೀಡಿರುವ ಬೆಂಬಲ ಅದ್ಭುತ. ಧೋನಿಯಂತಹ ಚಾಂಪಿಯನ್ ಆಟಗಾರ ತಮ್ಮ ವೃತ್ತಿ ಜೀವನದ ಕೊನೆಯ ಹಂತದಲ್ಲಿರುವಾಗ ಕೋಹ್ಲಿ ಮುಂದೆ ಬಂದು ಧೋನಿಗೆ ಬೆಂಬಲ ಸೂಚಿಸಿದ್ದಾರೆ ಎಂದವರು ವಿವರಿಸಿದರು.

ಇತ್ತೀಚೆಗಷ್ಟೇ ನ್ಯೂಜಿಲೆಂಡ್ ವಿರುದ್ಧದ ಟ್ವೆಂಟಿ-20 ಸರಣಿಯಲ್ಲಿ ಧೋನಿ ನಿಧಾನಗತಿಯ ಬ್ಯಾಟಿಂಗ್ ಹಿನ್ನಲೆಯಲ್ಲಿ ಬದಲಿ ಆಟಗಾರರನ್ನು ಆಯ್ಕೆ ಮಾಡುವಂತೆ ವಿವಿಎಸ್ ಲಕ್ಷ್ಮಣ್ ಹಾಗೂ ಅಜಿತ್ ಅಗರ್‌ಕರ್ ಅಭಿಪ್ರಾಯಪಟ್ಟಿದ್ದರು. ಆದರೆ ಧೋನಿಗೆ ಸಾರ್ವಜನಿಕವಾಗಿಯೇ ಬೆಂಬಲ ಸೂಚಿಸಿದ್ದ ಕೋಹ್ಲಿ, ಮಾಜಿ ನಾಯಕನನ್ನು ಮಾತ್ರ ಬೊಟ್ಟು ಮಾಡುವುದು ಸರಿಯಲ್ಲ ಎಂದು ಜರಿದಿದ್ದರು.

ಅದೇ ಹೊತ್ತಿಗೆ ಕೋಹ್ಲಿ ಅವರನ್ನು ಓರ್ವ ಚಾಂಪಿಯನ್ ಆಟಗಾರ ಎಂದಿರುವ ಗಂಗೂಲಿ, ಎಲ್ಲ ಪರಿಸ್ಥಿತಿಯಲ್ಲೂ ಆಡುವ ಮೂಲಕ ಪ್ರತಿ ಪಂದ್ಯದಲ್ಲೂ ಭಾರತದ ಗೆಲುವನ್ನು ಬಯಸುತ್ತಾರೆ ಎಂದಿದ್ದಾರೆ.

ಕೋಹ್ಲಿ ನಾಯಕತ್ವದ ಬಗ್ಗೆ ಕೇಳಿದಾಗ, ಪ್ರತಿಯೊಬ್ಬರಿಗೂ ಅವರದ್ದೇ ಆದ ಶೈಲಿಯ ನಾಯಕ ಗುಣಗಳಿರುತ್ತದೆ. ನೀವು ಅದಕ್ಕೆ ಅವಕಾಶ ಮಾಡಿಕೊಡಬೇಕು ಎಂದು ಭಾರತ ಕ್ರಿಕೆಟ್ ತಂಡ ಅತ್ಯಂತ ಶ್ರೇಷ್ಠ ನಾಯಕರುಗಳಲ್ಲಿ ಓರ್ವರಾಗಿರುವ ದಾದಾ ಹೇಳಿದರು.