ಮಂಡಳಿ ಅಧ್ಯಕ್ಷ ರ ತಂಡಕ್ಕೆ ಸೋಲು

ಅಭ್ಯಾಸ ಪಂದ್ಯದಲ್ಲಿ ಮುಗ್ಗರಿಸಿದ ಆತಿಥೇಯರು

Vijaya Karnataka Web

ಮುಂಬಯಿ: ಎಡಗೈ ಮಧ್ಯಮ ವೇಗಿ ಕೋಮಲ್‌ ಝನ್ಜದ್‌ (14ಕ್ಕೆ 3) ಅವರ ಶಿಸ್ತಿನ ಬೌಲಿಂಗ್‌ ಹೊರತಾಗಿಯೂ ಭಾರತ ಮಂಡಳಿ ಅಧ್ಯಕ್ಷ ರ ಇಲೆವೆನ್‌ ಮಹಿಳಾ ತಂಡ ಏಕದಿನ ಅಭ್ಯಾಸ ಪಂದ್ಯದಲ್ಲಿ ಪ್ರವಾಸಿ ಇಂಗ್ಲೆಂಡ್‌ ಇಲೆವೆನ್‌ ಮಹಿಳಾ ತಂಡದ ವಿರುದ್ಧ 2 ವಿಕೆಟ್‌ಗಳ ಸೋಲನುಭವಿಸಿದೆ.

ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ಸೋಮವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ ಮಂಡಳಿ ಅಧ್ಯಕ್ಷ ರ ತಂಡ 49 ಓವರ್‌ಗಳಲ್ಲಿ ಕೇವಲ 154 ರನ್‌ಗಳಿಗೆ ಸರ್ವಪತನಗೊಂಡಿತು. ನಂತರ ಇದಕ್ಕೆ ಪ್ರತಿಯಾಗಿ ಇಂಗ್ಲೆಂಡ್‌ ಇಲೆವೆನ್‌ 37.3 ಓವರ್‌ಗಳಲ್ಲಿ 8 ವಿಕೆಟ್‌ ನಷ್ಟಕ್ಕೆ 157 ರನ್‌ಗಳಿಸಿ ಜಯ ದಾಖಲಿಸಿತು.

ಕೋಮಲ್‌ ಅವರ ಮಾರಕ ಬೌಲಿಂಗ್‌ ಬಲದಿಂದ ಒಂದು ಹಂತದಲ್ಲಿ 11ಕ್ಕೆ 4 ವಿಕೆಟ್‌ ಕಬಳಿಸಿ ಮೇಲುಗೈ ಸಾಧಿಸಿದ ಆತಿಥೇಯ ಮಂಡಳಿ ಅಧ್ಯಕ್ಷ ರ ತಂಡ, ಹೆದರ್‌ ನೈಟ್‌(64*) ಅವರ ಹೋರಾಟದಿಂದಾಗಿ ತನ್ನ ಅಲ್ಪ ಮೊತ್ತವನ್ನು ಕಾಪಾಡಿಕೊಳ್ಳುವಲ್ಲಿ ವಿಫಲಗೊಂಡಿತು. ಹೆದರ್‌ ನೈಟ್‌ ಅಲ್ಲದೆ ಶ್ರುಬ್‌ಸೋಲ್‌ (23) ಮತ್ತು ವಿನ್‌ಫೀಲ್ಡ್‌ (23*) ತಮ್ಮ ಕಾಣಿಕೆ ನೀಡಿ ಇಂಗ್ಲೆಂಡ್‌ ತಂಡವನ್ನು ಗೆಲುವಿನ ತಡ ಮುಟ್ಟಿಸಿದರು. ಕೋಮಲ್‌ ಅಲ್ಲದೆ ರೀಮಾಲಕ್ಷ್ಮಿ ಎಕ್ಕಾ ಮತ್ತು ಸ್ಪಿನ್ನರ್‌ ತನುಜಾ ಕನ್ವರ್‌ ತಲಾ ಎರಡು ವಿಕೆಟ್‌ ಕಬಳಿಸಿದರು. ಇದಕ್ಕೂ ಮುನ್ನ ಶ್ರುಬ್‌ಸೋಲ್‌ (30ಕ್ಕೆ 4) ಅವರ ಕರಾರುವಾಕ್‌ ದಾಳಿಗೆ ಅಕ್ಷ ರಶಃ ತತ್ತರಿಸಿದ ಭಾರತೀಯರು 150ರ ಗಡಿ ಮುಟ್ಟಲು ಹರಸಾಹಸ ಪಟ್ಟರು. ನಾಯಕಿ ಸ್ಮೃತಿ ಮಂಧಾನ ಸೇರಿದಂತೆ ಯಾರೊಬ್ಬರು ಸ್ಥಿರ ಬ್ಯಾಟಿಂಗ್‌ ಪ್ರದರ್ಶಿಸಲಿಲ್ಲ.

ಸಂಕ್ಷಿಪ್ತ ಸ್ಕೋರ್‌
ಮಂಡಳಿ ಅಧ್ಯಕ್ಷ ರ ಇಲೆವೆನ್‌: 49 ಓವರ್‌ಗಳಲ್ಲಿ 154/10 (ಮಿನ್ನು ಮಣಿ 28, ಭಾರತಿ ಫುಲ್ಮಾಲಿ 23, ಹರ್ಲೀನ್‌ ಡಿಯೋಲ್‌ 21; ಶ್ರುಬ್‌ಸೋಲ್‌ 30ಕ್ಕೆ 4).
ಇಂಗ್ಲೆಂಡ್‌ ಇಲೆವೆನ್‌: 37.3 ಓವರ್‌ಗಳಲ್ಲಿ 157/8 (ಹೇದರ್‌ ನೈಟ್‌ 64*, ಶ್ರುಬ್‌ಸೋಲ್‌ 23, ವಿನ್‌ಫೀಲ್ಡ್‌ 23*; ಕೋಮಲ್‌ ಝನ್ಜದ್‌ 14ಕ್ಕೆ 3).