ಮಹಿಳಾ ಕ್ರಿಕೆಟ್ ತಂಡಕ್ಕೆ ಜೆಮಿಮಾ ರಾಡ್ರಿಗಸ್ | ಹಾಕಿಯಲ್ಲೂ ದೇಶವನ್ನು ಪ್ರತಿನಿಧಿಸುವ ಗುರಿ
ಸುದರ್ಶನ್
ಬೆಂಗಳೂರು: ಮುಂಬರುವ ದಕ್ಷಿಣ ಆಫ್ರಿಕಾ ಪ್ರವಾಸದ ಏಕದಿನ ಸರಣಿಗೆ ಆಯ್ಕೆ ಮಾಡಲಾಗಿರುವ ಭಾರತ ಮಹಿಳಾ ಕ್ರಿಕೆಟ್ ತಂಡದಲ್ಲಿ ಸ್ಥಾನ ಪಡೆದಿರುವ ಮುಂಬಯಿ ಆಟಗಾರ್ತಿ ಜೆಮಿಮಾ ರಾಡ್ರಿಗಸ್ ಕನ್ನಡತಿ ಎಂಬುದು ಹೆಮ್ಮೆಯ ಸಂಗತಿ.
17 ವರ್ಷದ ಯುವ ಬ್ಯಾಟ್ಸ್ವುಮನ್ ಜೆಮಿಮಾ ಅವರ ಮೂಲ ಮಂಗಳೂರು. ಹುಟ್ಟಿದ್ದು, ಬೆಳೆದಿದ್ದು ಮುಂಬಯಿನಲ್ಲಾದರೂ ಜೆಮಿಮಾ ಅವರ ತಂದೆ-ತಾಯಿ ಮಂಗಳೂರಿನವರು. ಭಾರತ ತಂಡಕ್ಕೆ ಮೊದಲ ಬಾರಿ ಆಯ್ಕೆಯಾದ ಸಂಭ್ರಮವನ್ನು 'ವಿಜಯ ಕರ್ನಾಟಕ' ಜತೆ ಹಂಚಿಕೊಂಡ ಜೆಮಿಮಾ, ತಾವು ಮಂಗಳೂರಿನವರು ಎಂದು ಹೆಮ್ಮೆಯಿಂದ ಹೇಳಿದರು.
''ಭಾರತ ಪರ ಆಡಬೇಕೆಂಬ ಕನಸು ಹೊತ್ತು ಕ್ರಿಕೆಟ್ ಆರಂಭಿಸಿದ್ದೆ. ಬುಧವಾರ ತಂಡಕ್ಕೆ ಆಯ್ಕೆಯಾದ ಸುದ್ದಿ ಕೇಳಿದ ಕ್ಷ ಣ ಸ್ತಬ್ಧಳಾಗಿ ಬಿಟ್ಟೆ. ತಂದೆ ತಾಯಿಗೆ ವಿಷಯ ತಿಳಿಸಿದಾಗ ಇಬ್ಬರೂ ಭಾವುಕರಾಗಿ ಕಣ್ಣೀರು ಸುರಿಸಿದರು. ಅವರಿಗೂ ಮಾತೇ ಹೊರಡಲಿಲ್ಲ,'' ಎಂದು ಜೆಮಿಮಾ ನುಡಿದರು.
ಮುಂಬಯಿನ ಬಾಂದ್ರಾ ನಿವಾಸಿ ಜೆಮಿಮಾ, ರಿಜ್ವಿ ಕಾಲೇಜಿನಲ್ಲಿ 12ನೇ ತರಗತಿ ವಿದ್ಯಾರ್ಥಿನಿಯಾಗಿದ್ದಾರೆ. ತಂದೆ ಇವಾನ್ ರಾಡ್ರಿಗಸ್ ಮತ್ತು ತಾಯಿ ಲವಿಟಾ ಬಾಂದ್ರಾದಲ್ಲಿ ವಿದ್ಯಾರ್ಥಿಗಳಿಗೆ ಕೋಚಿಂಗ್ ಕ್ಲಾಸ್ಗಳನ್ನು ನಡೆಸುತ್ತಿದ್ದಾರೆ. ಕ್ಲಬ್ ಕ್ರಿಕೆಟರ್ ಕೂಡ ಆಗಿದ್ದ ತಂದೆಯೇ ಜೆಮಿಮಾಗೆ ಬಾಲ್ಯದ ಕೋಚ್.
ಹಾಕಿಯಲ್ಲೂ ಜೆಮಿಮಾ ಮಿಂಚು
ಬಲಗೈ ಆರಂಭಿಕ ಆಟಗಾರ್ತಿಯಾಗಿರುವ ಜೆಮಿಮಾ ರಾಡ್ರಿಗಸ್, ಹಾಕಿ ಆಟಗಾರ್ತಿಯೂ ಹೌದು. 17 ಹಾಗೂ 19ರ ವಯೋಮಿತಿಯಲ್ಲಿ ಮುಂಬಯಿ ಹಾಕಿ ತಂಡವನ್ನು ಪ್ರತಿನಿಧಿಸಿದ್ದಾರೆ. ''ಬಾಲ್ಯದಿಂದಲೂ ಹಾಕಿ, ಕ್ರಿಕೆಟ್ ಆಡುತ್ತಿದ್ದೆ. ಕ್ರಿಕೆಟ್ನಲ್ಲಿ ಉತ್ತಮವಾಗಿ ಆಡಲು ಆರಂಭಿಸಿದ ನಂತರ ಅಲ್ಲೇ ಭವಿಷ್ಯ ಕಂಡುಕೊಳ್ಳಲು ನಿರ್ಧರಿಸಿದೆ. ಅಲ್ಲದೆ ಭವಿಷ್ಯದ ದೃಷ್ಟಿಯಿಂದ ಒಂದನ್ನು ಆಯ್ಕೆ ಮಾಡಿಕೊಳ್ಳಬೇಕಿತ್ತು. ಅವಕಾಶ ಸಿಕ್ಕಾಗ ಈಗಲೂ ಹಾಕಿ ಆಡುತ್ತಿರುತ್ತೇನೆ,'' ಎಂದು ಜೆಮಿಮಾ ತಮ್ಮ ಹಾಕಿ, ಕ್ರಿಕೆಟ್ ಪ್ರೀತಿಯ ಬಗ್ಗೆ ಹೇಳಿದರು.
ಭಾರತ ಪರ ದ್ವಿಶತಕ ಗಳಿಸುವಾಸೆ
ಕಿರಿಯರ ಕ್ರಿಕೆಟ್ನಲ್ಲಿ ಈಗಾಗಲೇ ದ್ವಿಶತಕ ಸಿಡಿಸಿ ಇತಿಹಾಸ ನಿರ್ಮಿಸಿರುವ ಜೆಮಿಮಾ ಭಾರತ ತಂಡದ ಪರ ಅವಕಾಶ ಸಿಕ್ಕರೆ ಅಂಥದ್ದೇ ಸಾಧನೆ ಮಾಡುವ ಹಂಬಲ ಹೊಂದಿದ್ದಾರೆ. ''ರಾಷ್ಟ್ರೀಯ ತಂಡಕ್ಕೆ ಆಯ್ಕೆಯಾಗಬೇಕಾದರೆ ಸ್ಥಿರ ಆಟ ಅಗತ್ಯ ಎಂಬುದನ್ನು ಅರಿತಿದ್ದೆ. ತಂದೆ ಕೂಡ ಅದನ್ನೇ ಹೇಳುತ್ತಿದ್ದರು. ಭಾರತ ಪರ ದ್ವಿಶತಕ ಗಳಿಸಬೇಕೆಂಬ ಕನಸಿದೆ. ಮಿಥಾಲಿ ರಾಜ್ ಅವರಂತೆ ಸುದೀರ್ಘ ಸಮಯ ರಾಷ್ಟ್ರೀಯ ತಂಡದ ಪರ ಆಡುವ ಗುರಿ ಹೊಂದಿದ್ದೇನೆ,'' ಎಂದರು ಜೆಮಿಮಾ.
ಸಾವಿರ ರನ್ ಗಳಿಸಿದ ಮೊದಲ ಆಟಗಾರ್ತಿ
19 ವರ್ಷದೊಳಗಿನವರ ದೇಶೀಯ ಕ್ರಿಕೆಟ್ನಲ್ಲಿ ಜೆಮಿಮಾ ರನ್ ಹೊಳೆ ಹರಿಸಿ ಭಾರತ ತಂಡಕ್ಕೆ ಆಯ್ಕೆಯಾಗಿದ್ದಾರೆ. 2017-18ನೇ ಸಾಲಿನ ಟೂರ್ನಿಗಳಲ್ಲಿ ಆಡಿರುವ 11 ಪಂದ್ಯಗಳಿಂದ 1013ರನ್ ಗಳಿಸಿದ್ದು, ಈ ವಯೋಮಿತಿಯಲ್ಲಿ ಸಾವಿರ ರನ್ ಗಳಿಸಿದ ಭಾರತದ ಮೊದಲ ಬ್ಯಾಟ್ಸ್ವುಮನ್ ಎಂಬ ದಾಖಲೆ ಬರೆದಿದ್ದಾರೆ. ಮುಂಬಯಿ ಪರ 19 ವರ್ಷದೊಳಗಿನವರ ಏಕದಿನ ಟೂರ್ನಿಯಲ್ಲಿ ಸೌರಾಷ್ಟ್ರ ವಿರುದ್ಧ ದ್ವಿಶತಕವನ್ನೂ ಸಿಡಿಸಿದ್ದಾರೆ. 50 ಓವರ್ಗಳ ಕ್ರಿಕೆಟ್ನಲ್ಲಿ ಸ್ಮೃತಿ ಮಂಧಾನ ಬಳಿಕ ದ್ವಿಶತಕ ಸಿಡಿಸಿದ ಭಾರತದ ಮೊದಲ ಆಟಗಾರ್ತಿಯೂ ಹೌದು.
ಇತ್ತೀಚೆಗೆ ಇಂದೋರ್ನಲ್ಲಿ ನಡೆದ ಬಿಸಿಸಿಐ ಮಹಿಳಾ ಚಾಲೆಂಜರ್ ಏಕದಿನ ಟೂರ್ನಿಯಲ್ಲಿ ಇಂಡಿಯಾ ಗ್ರೀನ್ ತಂಡವನ್ನು ಪ್ರತಿನಿಧಿಸಿದ್ದ ಜೆಮಿಮಾ, 3 ಪಂದ್ಯಗಳಲ್ಲಿ ಒಟ್ಟು 179 ರನ್(84, 52, 43) ಗಳಿಸಿ ಮಿಂಚಿದ್ದರು.
ಆಸೀಸ್ನ ಎಲೈಸ್ ಪೆರಿ ಮಾದರಿ
ಭಾರತ ಮಹಿಳಾ ಕ್ರಿಕೆಟ್ ತಂಡಕ್ಕೆ ಆಯ್ಕೆಯಾಗಿದ್ದು, ಮುಂದೊಂದು ದಿನ ಹಾಕಿಯಲ್ಲೂ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸುವ ಗುರಿ ಹೊಂದಿದ್ದೇನೆ ಎನ್ನುತ್ತಾರೆ ಜೆಮಿಮಾ. ''ಹಾಕಿಯಲ್ಲೂ ಭಾರತ ಪರ ಅವಕಾಶ ಸಿಕ್ಕರೆ ಯಾಕೆ ಆಡಬಾರದು? ಹಾಕಿಯನ್ನು ಈಗಲೂ ಇಷ್ಟ ಪಟ್ಟು ಆಡುತ್ತೇನೆ. ಆಸ್ಪ್ರೇಲಿಯಾದ ಆಲ್ರೌಂಡರ್ ಎಲೈಸ್ ಪೆರಿ ಕ್ರಿಕೆಟ್ ಮತ್ತು ಫುಟ್ಬಾಲ್ನಲ್ಲಿ ಆಸ್ಪ್ರೇಲಿಯಾ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದಾರೆ. ನನಗೂ ಅವರಂತೆಯೇ ಎರಡೂ ಕ್ರೀಡೆಗಳಲ್ಲಿ ದೇಶವನ್ನು ಪ್ರತಿನಿಧಿಸುವ ಅವಕಾಶ ಸಿಕ್ಕರೆ ಯಾಕೆ ಬಿಡಬೇಕು?'' ಎಂದು ಜೆಮಿಮಾ ನಗುತ್ತಾ ಡಿದರು.