ಬೆಂಗಳೂರು: ಭಾರತ ತಂಡದಲ್ಲಿ ತಾವು 4ನೇ ಕ್ರಮಾಂಕದಲ್ಲೇ ಬ್ಯಾಟ್‌ ಮಾಡುವುದನ್ನು ಬಯಸುವುದಾಗಿ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್‌ಮನ್‌ ಮನೀಶ್‌ ಪಾಂಡೆ ತಿಳಿಸಿದ್ದಾರೆ.
ಆಸ್ಪ್ರೇಲಿಯಾ ವಿರುದ್ಧ ಗುರುವಾರ ನಡೆಯಲಿರುವ ಆಸ್ಪ್ರೇಲಿಯಾ ವಿರುದ್ಧದ 4ನೇ ಏಕದಿನ ಪಂದ್ಯಕ್ಕೆ ಪೂರ್ವಭಾವಿಯಾಗಿ ಭಾರತ ತಂಡ ಇಲ್ಲಿನ ಎಂ.ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಮಂಗಳವಾರ ಅಭ್ಯಾಸ ನಡೆಸಿತು. ಈ ವೇಳೆ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಮನೀಶ್‌, ಟೀಮ್‌ ಇಂಡಿಯಾದ ಮಧ್ಯಮ ಕ್ರಮಾಂಕಕ್ಕೆ ಹೆಚ್ಚು ಪೈಪೋಟಿ ಇರುವುದರಿಂದ ಒತ್ತಡ ಸಹಜ ಎಂದರು.
''ಕ್ರಿಕೆಟ್‌ ಆಡುತ್ತಿರುವಾಗ ಒತ್ತಡ ಇದ್ದೇ ಇರುತ್ತದೆ. ಆದರೆ ನಾನು ಸುದೀರ್ಘ ಸಮಯ ಭಾರತ ತಂಡದಲ್ಲಿ ಆಡಿ ತಂಡಕ್ಕಾಗಿ ಪಂದ್ಯಗಳನ್ನು ಗೆಲ್ಲಿಸುವುದನ್ನು ಬಯಸುತ್ತೇನೆ. 4ನೇ ಕ್ರಮಾಂಕಕ್ಕೆ ಸ್ಪರ್ಧೆ ಇದ್ದೇ ಇದೆ. ನಾನು ನನ್ನ ಪರಿಶ್ರಮವನ್ನು ಮುಂದುವರಿಸಿ ತಂಡದಲ್ಲಿ ಸ್ಥಾನ ಭದ್ರ ಪಡಿಸಿಕೊಳ್ಳುವ ಗುರಿ ಹೊಂದಿದ್ದೇನೆ. ಸದ್ಯ ನನಗೆ 4ನೇ ಕ್ರಮಾಂಕ ಸಿಕ್ಕಿದ್ದು, ಇದೇ ಕ್ರಮಾಂಕದಲ್ಲಿ ಆಡಲು ಇಚ್ಛಿಸುತ್ತೇನೆ,'' ಎಂದು ಮನೀಶ್‌ ಪಾಂಡೆ ತಿಳಿಸಿದರು.