ಕನ್ನಡದಲ್ಲಿ ಮಾತನಾಡಿ ಕನ್ನಡಿಗರ ಹೃದಯ ಗೆದ್ದ ಮನೀಶ್ ಪಾಂಡೆ

ಪುಣೆ: ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ಟ್ವೆಂಟಿ-20 ಚಾಂಪಿಯನ್‌ಶಿಪ್‌ನಲ್ಲಿ ಬುಧವಾರ ನಡೆದ ಪುಣೆ ಸೂಪರ್ ಜೈಂಟ್ ವಿರುದ್ಧದ ಪಂದ್ಯದಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ಏಳು ವಿಕೆಟ್‌ಗಳ ಅಂತರದಿಂದ ಗೆಲುವು ದಾಖಲಿಸಿತ್ತು.

ಪಂದ್ಯದ ನಡುವೆ ವಿಶೇಷವಾದ ಘಟನೆಯೊಂದು ನಡೆದಿತ್ತು. ಐಪಿಎಲ್‌ನಲ್ಲಿ ಕೆಕೆಆರ್ ತಂಡವನ್ನು ಪ್ರತಿನಿಧಿಸುತ್ತಿರುವ ಪ್ರತಿಭಾವಂತ ಬ್ಯಾಟ್ಸ್‌ಮನ್ ಮನೀಶ್ ಪಾಂಡೆ, ಕನ್ನಡದಲ್ಲಿ ಮಾತನಾಡುವ ಮೂಲಕ ಕನ್ನಡಾಭಿಮಾನಿಗಳ ಹೃದಯ ಗೆದ್ದಿದ್ದಾರೆ.

ಪಂದ್ಯದ ಮೊದಲ ಇನ್ನಿಂಗ್ಸ್ ಕ್ಷೇತ್ರರಕ್ಷಣೆಯ ವೇಳೆ ಕಾಮೆಂಟಟರ್ ಜೊತೆಗೆ ನೇರವಾಗಿ ಮಾತನಾಡುತ್ತಿದ್ದ ಪಾಂಡೆ, ವಿಕೆಟ್ ಕೀಪರ್ ರಾಬಿನ್ ಉತ್ತಪ್ಪ ಜೊತೆಗೆ ಕನ್ನಡದಲ್ಲಿ ಮಾತನಾಡಿದ್ದಾರೆ

'ಮಾಮ್, ಅವರ ಎಡ್ಜಸ್ ಬಂದ್ರೆ ಅಲ್ಲೇ ಬರುತ್ತೇ' ಎಂದು ಉತ್ತಪ್ಪ ಅವರಿಗೆ ಪಾಂಡೆ ಹೇಳಿಕೊಂಡಿದ್ದರು. ಇದನ್ನು ತಕ್ಷಣವೇ ಆಲಿಸಿದ ಜಿಂಬಾಬ್ವಾ ಮೂಲದ ಕಾಮೆಂಟಟರ್ ಪಾಮಿ ಎಂಬಾಂಗ್ವಾ ನೀವು ಕನ್ನಡ ಮಾತನಾಡುತ್ತೀರಿ ತಾನೇ ಎಂದು ಹೇಳಿಕೊಂಡಿರುವುದು ಮತ್ತಷ್ಟು ಅಚ್ಚರಿ ಮೂಡಿಸಿದೆ.

ಮನೀಷ್ ಕನ್ನಡದಲ್ಲಿ ಮಾತನಾಡಿದಿರುವುದಕ್ಕಿಂತಲೂ ಮಿಗಿಲಾಗಿ ಪಾಂಡೆ ಮಾತನಾಡಿರುವ ಕನ್ನಡ ಭಾಷೆಯನ್ನು ಎಂಬಾಂಗ್ವಾ ಗುರುತಿಸಿರುವುದು ಕನ್ನಡಿಗರಲ್ಲಿ ಹೆಚ್ಚಿನ ಸಂತಸವನ್ನುಂಟು ಮಾಡಿದೆ.



ಕಾಮೆಂಟೆಟರ್ ಜೂತೆಗೆ ತಮ್ಮ ಆರ್ಮಿ ಕನಸನ್ನು ಬಿಚ್ಚಿಟ್ಟಿರುವ ಪಾಂಡೆ, ಇತ್ತೀಚೆಗಷ್ಟೇ ನಕ್ಸಲರ ದಾಳಿಯಲ್ಲಿ ಮಡಿದ ಸಿಆರ್‌ಪಿಎಫ್ ಜವಾನರಿಗಾಗಿ ಕೈಗೆ ಕಪ್ಪು ಪಟ್ಟಿಯನ್ನು ಧರಿಸಿರುವುದಾಗಿ ವಿವರಿಸಿದರು.