ಭಾರತ ವಿರುದ್ಧ ಮೊದಲ ಟೆಸ್ಟ್ ಪಂದ್ಯಕ್ಕೆ ಆಸೀಸ್ ತಂಡ ಪ್ರಕಟ

ಆಡಿಲೇಡ್: ಪ್ರವಾಸಿ ಭಾರತ ವಿರುದ್ಧ ನಡೆಯಲಿರುವ ಮೊದಲ ಟೆಸ್ಟ್ ಪಂದ್ಯಕ್ಕಾಗಿನ ಆಸ್ಟ್ರೇಲಿಯಾ ತಂಡವನ್ನು ಪ್ರಕಟಿಸಲಾಗಿದೆ.

ಒಂದೆಡೆ ಟೀಮ್ ಇಂಡಿಯಾ ಘೋಷಣೆಯಾದರೆ ಅತ್ತ ಆಸೀಸ್ ಕೂಡಾ ತಂಡ ಪ್ರಕಟಿಸುವುದರೊಂದಿಗೆ ಎಲ್ಲ ರೀತಿಯ ಸಿದ್ಧತೆಗಳನ್ನು ಮಾಡಿಕೊಂಡಿದೆ.

ಭರವಸೆಯ ಎಡಗೈ ಆರಂಭಿಕ ಉಸ್ಮಾನ್ ಖವಾಜಾ ತಂಡವನ್ನು ಸೇರಿಕೊಂಡರೆ, ಆಲ್‌ರೌಂಡರ್ ಮಿಚೆಲ್ ಮಾರ್ಶ್‌ಗೆ ಕತ್ತರಿ ಪ್ರಯೋಗ ಮಾಡಲಾಗಿದೆ.

ಆರಂಭಿಕನಾಗಿ ಮಾರ್ಕಸ್ ಹ್ಯಾರಿಸ್ ಚೊಚ್ಚಲ ಕ್ಯಾಪ್ ಧರಿಸುವುದು ಸುನಿಶ್ಚಿತವೆನಿಸಿದೆ. ಆ್ಯರೋನ್ ಫಿಂಚ್, ಶಾನ್ ಮಾರ್ಶ್, ಟ್ರೆವಿಸ್ ಹೆಡ್, ಪೀಟರ್ ಹ್ಯಾಂಡ್ಸ್‌ಕಾಂಬ್ ಜತೆಗೆ ನಾಯಕ ಟಿಮ್ ಪೈನ್ ಬಲ ತುಂಬಲಿದ್ದಾರೆ.

ಜೋಶ್ ಹೇಜಲ್‌ವುಡ್, ಪ್ಯಾಟ್ ಕಮ್ಮಿನ್ಸ್, ನೆಥನ್ ಲಯನ್ ಹಾಗೂ ಮಿಚೆಲ್ ಸ್ಟಾರ್ಕ್ ಪ್ರಮುಖ ಬೌಲಿಂಗ್ ಅಸ್ತ್ರವಾಗಲಿದ್ದಾರೆ.

ಭಾರತ ಹಾಗೂ ಆಸೀಸ್ ನಡುವ ಮೊದಲ ಟೆಸ್ಟ್ ಪಂದ್ಯ ಡಿಸೆಂಬರ್ 6 ಗುರುವಾರದಂದು ಆಡಿಲೇಡ್ ಓವಲ್‌ನಲ್ಲಿ ಆರಂಭವಾಗಲಿದೆ.