ಪಂದ್ಯದ ಗತಿಯನ್ನೇ ಬದಲಾಯಿಸಿದ ಆ ಒಂದು ಕ್ಯಾಚ್!

ದುಬೈ: ಯುಎಇನಲ್ಲಿ ನಡೆಯುತ್ತಿರುವ ಏಷ್ಯಾ ಕಪ್ 2018 ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ಪ್ರಬಲ ಪಾಕಿಸ್ತಾನ ತಂಡವನ್ನು 37 ರನ್ ಅಂತರದಿಂದ ಮಣಿಸಿರುವ ಬಾಂಗ್ಲಾದೇಶ ಸತತ ಎರಡನೇ ಬಾರಿಗೆ ಫೈನಲ್ ಪ್ರವೇಶ ಸಾಧನೆ ಮಾಡಿದೆ.

ಇದೀಗ ಶುಕ್ರವಾರ ನಡೆಯಲಿರುವ ಪ್ರಶಸ್ತಿ ಹಣಾಹಣಿಯಲ್ಲಿ ಭಾರತದ ಸವಾಲನ್ನು ಎದುರಿಸಲಿದೆ.

ಈ ನಡುವೆ ಪಾಕ್ ಹಾಗೂ ಬಾಂಗ್ಲಾ ನಡುವಣ ಹೋರಾಟದಲ್ಲ ಹಲವಾರು ರೋಚಕ ಕ್ಷಣಗಳಿಗೆ ಸಾಕ್ಷಿಯಾಗಿತ್ತು. ಮೊದಲು ಮುಶ್ಫಿಕರ್ ರಹೀಂ (99) ಹಾಗೂ ಮೊಹಮ್ಮದ್ ಮಿಥುನ್ (60) ಜವಾಬ್ದಾರಿಯುತ ಆಟವನ್ನು ಪ್ರದರ್ಶಿಸಿದರೆ ಬಳಿಕ ಬೌಲರ್‌ಗಳು ಹಾಗೂ ಫೀಲ್ಡರ್‌ಗಳು ತಮ್ಮ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದರು.

ಇದರಲ್ಲಿ ಫೀಲ್ಡರ್‌ಗಳ ಪ್ರದರ್ಶನವನ್ನು ವಿಶೇಷವಾಗಿ ಕೊಂಡಾಡಬೇಕಾಗುತ್ತದೆ. ನಾಯಕನಾಗಿ ಸ್ವತ: ಮಾದರಿಯಾಗಿರುವ ಮಶ್ರಾಫೆ ಮೊರ್ತಾಜಾ ಅದ್ಭುತ ಕ್ಯಾಚ್ ಹಿಡಿಯುವ ಮೂಲಕ ಪಂದ್ಯಕ್ಕೆ ತಿರುವನ್ನು ನೀಡಿದ್ದರು.

ನಿರ್ಣಾಯಕ ಹಂತದಲ್ಲಿ ಮಶ್ರಾಫೆ ಹಿಡಿದಿರುವ ಈ ಒಂದು ಕ್ಯಾಚ್ ಪಂದ್ಯದ ಗತಿಯನ್ನೇ ಬದಲಾಯಿಸಿತ್ತು. ರುಬೆಲ್ ಹುಸೇನ್ ಎಸೆದ 21ನೇ ಓವರ್‌ನಲ್ಲಿ ಉತ್ತಮವಾಗಿ ಆಡುತ್ತಿದ್ದ ಶೋಯಿಬ್ ಮಲಿಕ್ ಹೊರಗಟ್ಟುವಲ್ಲಿ ಮಶ್ರಾಫೆ ಪ್ರಮುಖ ಪಾತ್ರ ವಹಿಸಿದ್ದರು. ಇದರೊಂದಿಗೆ ಇಮಾಮ್ ಉಲ್ ಹಕ್ ಜೊತೆಗಿನ 67 ರನ್‌ಗಳ ಮಹತ್ವದ ಜೊತೆಯಾಟಕ್ಕೆ ಬ್ರೇಕ್ ಬಿದ್ದಿತ್ತು.

ಅಂತಿಮವಾಗಿ 240 ಗುರಿ ಬೆನ್ನತ್ತಿದ ಪಾಕ್ ಒಂಬತ್ತು ವಿಕೆಟ್ ನಷ್ಟಕ್ಕೆ 202 ರನ್ ಗಳಿಸಲಷ್ಟೇ ಶಕ್ತವಾಗಿತ್ತು.