ಭಾರತ ವಿರುದ್ಧ ಗೆಲುವಿನ ಆತ್ಮವಿಶ್ವಾಸದಲ್ಲಿ ಸರ್ಫರಾಜ್

ಕರಾಚಿ: ಚಾಂಪಿಯನ್ಸ್ ಟ್ರೋಫಿ ಫೈನಲ್ ಪಂದ್ಯದಲ್ಲಿ ಭಾರತದ ವಿರುದ್ಧ ದಾಖಲಾದ ಬೃಹತ್ ಗೆಲುವನ್ನು ನೆನಪಿಸಿಕೊಂಡಿರುವ ಪಾಕಿಸ್ತಾನ ನಾಯಕ ಸರ್ಫರಾಜ್ ಅಹ್ಮದ್, ಮುಂಬರುವ ಏಷ್ಯಾ ಕಪ್ ಟೂರ್ನಿಯಲ್ಲೂ ಟೀಮ್ ಇಂಡಿಯಾ ಸವಾಲಿಗೆ ಸಂಪೂರ್ಣವಾಗಿ ಸಜ್ಜಾಗಿದ್ದೇವೆ ಎಂದಿದ್ದಾರೆ.

ಯುಎಇನಲ್ಲಿ ನಡೆಯಲಿರುವ ಏಷ್ಯಾ ಕಪ್‌ನಲ್ಲಿ ಭಾರತ ಹಾಗೂ ಪಾಕಿಸ್ತಾನ ನಡುವಣ ಹೈ ವೋಲ್ಟೇಜ್ ಪಂದ್ಯವು ಸೆಪ್ಟೆಂಬರ್ 19ರಂದು ನಡೆಯಲಿದೆ.

ನಮ್ಮ ಪೂರ್ವ ಸಿದ್ಧತೆಯು ಅತ್ಯುತ್ತಮವಾಗಿದೆ. ಮುಂದಿನ ನಾಲ್ಕು ದಿನಗಳ ಕಾಲ ಯುಎಇನಲ್ಲಿ ಇದ್ದುಕೊಂಡು ಮತ್ತಷ್ಟು ಪರಿಸ್ಥಿತಿಗೆ ಹೊಂದಿಕೊಳ್ಳಲಿದ್ದೇವೆ. ಭಾರತದ ವಿರುದ್ಧದ ಪಂದ್ಯ ಅತಿ ಮುಖ್ಯ ಎಂದರು.

ಭಾರತದ ವಿರುದ್ಧದ ಪಂದ್ಯ ನಮ್ಮ ಪಾಲಿಗೆ ಮುಖ್ಯ ಪಂದ್ಯವಾಗಿದ್ದು, ಆವೇಗ ಕಾಯ್ದುಕೊಳ್ಳಲು ಪ್ರಯತ್ನಿಸಲಿದ್ದೇವೆ. ಇದಕ್ಕಾಗಿ ಸಂಪೂರ್ಣ ಸಿದ್ಧರಾಗಲಿದ್ದೇವೆ ಎಂದರು.

ನಾನು ಹೇಳಿದಂತೆ ದೊಡ್ಡ ಟೂರ್ನಿಗಳಲ್ಲಿ ಆವೇಗ ಕಾಯ್ದುಕೊಳ್ಳುವುದು ಮುಖ್ಯ. ತಂಡವು ಅತೀವ ನಿರೀಕ್ಷೆಯಲ್ಲಿದ್ದು, ಮೊದಲ ಪಂದ್ಯದಿಂದ ಸರಣಿ ಮುಗಿಯ ವರೆಗೂ ಉತ್ತಮ ಆವೇಗವನ್ನು ಕಾಯ್ದುಕೊಳ್ಳಲಿದ್ದೇವೆ ಎಂದರು.

ಅದೇ ಹೊತ್ತಿಗೆ ಪಾಕಿಸ್ತಾನ ತಮ್ಮ ತವರು ಪಂದ್ಯಗಳನ್ನು ಯುಎಇನಲ್ಲಿ ಆಡುವುದರಿಂದ ಏಷ್ಯಾ ಕಪ್‌ನಲ್ಲೂ ಇದು ನೆರವಾಗಲಿದೆ ಎಂದರು.