ಮಯಾಂಕ್ ಮಾಯೆ; 12 ಇನ್ನಿಂಗ್ಸ್‌ಗಳಲ್ಲೇ ಮೂರನೇ ಶತಕ ಸಾಧನೆ

ಇಂದೋರ್: ಭಾರತ ಟೆಸ್ಟ್ ಕ್ರಿಕೆಟ್ ತಂಡದ ಯುವ ಭರವಸೆಯ ಬಲಗೈ ಆರಂಭಿಕ ಬ್ಯಾಟ್ಸ್‌ಮನ್ ಮಯಾಂಕ್ ಅಗರ್ವಾಲ್ ಟೆಸ್ಟ್ ಕ್ರಿಕೆಟ್‌ನಲ್ಲಿ ಮೂರನೇ ಶತಕ ಸಾಧನೆ ಮಾಡಿದ್ದಾರೆ.

ಇಂದೋರ್‌ನ ಹೋಳ್ಕರ್ ಕ್ರಿಕೆಟ್ ಮೈದಾನದಲ್ಲಿ ಪ್ರವಾಸಿ ಬಾಂಗ್ಲಾದೇಶ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್ ಪಂದ್ಯದ ಎರಡನೇ ದಿನದಾಟದಲ್ಲಿ ಮಯಾಂಕ್ ಅಮೋಘ ಶತಕ ಬಾರಿಸಿದರು.

ಭಾರತ VS ಬಾಂಗ್ಲಾದೇಶ live ಅಪ್‌ಡೇಟ್ಸ್

ದಿನದಾಟದ ಆರಂಭದಲ್ಲೇ ಸೆಟ್ ಬ್ಯಾಟ್ಸ್‌‌ಮನ್ ಚೇತೇಶ್ವರ ಪೂಜಾರ (54) ಹಾಗೂ ವಿರಾಟ್ ಕೊಹ್ಲಿ (0) ವಿಕೆಟ್‌ಗಳು ನಷ್ಟವಾದರೂ ವಿಕೆಟ್‌ನ ಇನ್ನೊಂದು ತುದಿಯಿಂದ ದಿಟ್ಟ ಹೋರಾಟವನ್ನು ಪ್ರದರ್ಶಿಸಿದ ಮಯಾಂಕ್, ಬಾಂಗ್ಲಾ ಬೌಲರ್‌ಗಳ ಮೇಲೆ ಒತ್ತಡವನ್ನು ಹೇರುತ್ತಲೇ ಸಾಗಿದರು.

ತಮ್ಮ ಫೇವರಿಟ್ ಕ್ರಿಕೆಟಿಗ ಮಾಜಿ ಡ್ಯಾಶಿಂಗ್ ಓಪನರ್ ವೀರೇಂದ್ರ ಸೆಹ್ವಾಗ್ ಶೈಲಿಯಲ್ಲಿ ರಕ್ಷಣಾತ್ಮಕ ಜತೆಗೆ ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿದ ಮಯಾಂಕ್, ಎದುರಾಳಿಗಳ ಮೇಲೆ ಸಂಪೂರ್ಣ ಅಧಿಪತ್ಯವನ್ನು ಸಾಧಿಸಿದರು.

ಸಚಿನ್, ಸಚಿನ್; 30 ವರ್ಷಗಳ ಹಿಂದೆ ಸಿಡಿಲಮರಿ ತೆಂಡೂಲ್ಕರ್ ಡೆಬ್ಯು

ಇದರೊಂದಿಗೆ ಟೆಸ್ಟ್ ಕ್ರಿಕೆಟ್‌ನ 12ನೇ ಇನ್ನಿಂಗ್ಸ್‌ನಲ್ಲಿ ಮೂರನೇ ಶತಕ ಸಾಧನೆ ಮಾಡಿದರು. ಇದರಲ್ಲಿ ದ್ವಿಶತಕ ಹಾಗೂ ಮೂರು ಅರ್ಧಶತಕಗಳು ಸೇರಿವೆ ಎಂಬುದು ಗಮನಾರ್ಹವೆನಿಸುತ್ತದೆ. ಇತ್ತೀಚೆಗಷ್ಟೇ ದಕ್ಷಿಣ ಆಫ್ರಿಕಾ ವಿರುದ್ಧ ತಮ್ಮ ಚೊಚ್ಚಲ ಟೆಸ್ಟ್ ಶತಕವನ್ನೇ ಮಯಾಂಕ್ ದ್ವಿಶತಕವನ್ನಾಗಿ ಪರಿವರ್ತಿಸಿದ್ದರು.

ಮಯಾಂಕ್ 3ನೇ ಶತಕವು 183 ಎಸೆತಗಳಲ್ಲಿ ದಾಖಲಾಗಿದ್ದವು. ಅಲ್ಲದೆ ಪ್ರಸಕ್ತ 2019 ಕ್ಯಾಲೆಂಡರ್ ವರ್ಷದಲ್ಲಿ ಅತಿ ಹೆಚ್ಚು ರನ್ ಗಳಿಸಿದ ಭಾರತೀಯ ಬ್ಯಾಟ್ಸ್‌ಮನ್‌ಗಳ ಪೈಕಿ ನಂ.1 ಸ್ಥಾನದಲ್ಲಿದ್ದಾರೆ.

4000 ರನ್ ಮೈಲುಗಲ್ಲು; ದಾದಾ, ಲಕ್ಷ್ಮಣ್ ದಾಖಲೆ ಸರಿಗಟ್ಟಿದ ಅಜಿಂಕ್ಯ ರಹಾನೆ

ಅಂದ ಹಾಗೆ ಒಟ್ಟಾರೆ ದಾಖಲೆಯನ್ನು ಪರಿಗಣಿಸಿದಾಗ ಅಗ್ರಸ್ಥಾನದಲ್ಲಿರುವ ಆಸ್ಟ್ರೇಲಿಯಾದ ಸ್ಟೀವ್ ಸ್ಮಿತ್, 2019ನೇ ಸಾಲಿನಲ್ಲಿ ಇದುವರೆಗೆ ಆಡಿರುವ ನಾಲ್ಕು ಪಂದ್ಯಗಳಲ್ಲಿ 110.57ರ ಸರಾಸರಿಯಲ್ಲಿ 774 ರನ್ ಕಲೆ ಹಾಕಿದ್ದಾರೆ.

2018 ಡಿಸೆಂಬರ್ 26ರಂದು ಮೆಲ್ಬೋರ್ನ್ ಕ್ರಿಕೆಟ್ ಮೈದಾನದಲ್ಲಿ ನಡೆದ ಬಾಕ್ಸಿಂಗ್ ಡೇ ಟೆಸ್ಟ್ ಪಂದ್ಯದಲ್ಲಿ ಮಯಾಂಕ್ ಟೆಸ್ಟ್ ಕ್ರಿಕೆಟ್‌ಗೆ ಪಾದಾರ್ಪಣೆಗೈದಿದ್ದರು. ಅಲ್ಲದೆ ಡೆಬ್ಯು ಇನ್ನಿಂಗ್ಸ್‌ನಲ್ಲಿ 76 ರನ್ ಗಳಿಸಿ ತಮ್ಮ ಸಾಮರ್ಥ್ಯವನ್ನು ಸಾರಿದ್ದರು.

50 ವರ್ಷಗಳ ಹಿಂದೆ ಕರ್ನಾಟಕದ ಜಿಆರ್ ವಿಶ್ವನಾಥನ್, ಅಂದಿನ ಇದೇ ದಿನದಂದು (ನ.15) ಮೊದಲ ಪಂದ್ಯದಲ್ಲೇ ಶತಕ ಸಾಧನೆ ಮಾಡಿದ್ದರು. ಇದೀಗ ಐದು ದಶಕಗಳ ಬಳಿಕ ಅದೇ ದಿನದಂದು ಕನ್ನಡಿಗರೇ ಆಗಿರುವ ಮಯಾಂಕ್ ಶತಕ ಸಾಧನೆ ಮಾಡಿರುವುದು ವಿಶಿಷ್ಟವೇ ಸರಿ.

ಬಾಂಗ್ಲಾ ವಿರುದ್ಧ ಡಕ್ ಔಟ್ ಅಪಖ್ಯಾತಿಗೊಳಗಾದ ಕಿಂಗ್ ಕೊಹ್ಲಿ

ಪ್ರಥಮ ಇನ್ನಿಂಗ್ಸ್‌ನಲ್ಲಿ ಮಯಾಂಕ್ ಸಾಧನೆಗಳು:
76, ಆಸ್ಟ್ರೇಲಿಯಾ ವಿರುದ್ಧ, ಮೆಲ್ಬೋರ್ನ್
77, ಆಸ್ಟ್ರೇಲಿಯಾ ವಿರುದ್ಧ, ಸಿಡ್ನಿ
5, ವೆಸ್ಟ್‌ಇಂಡೀಸ್ ವಿರುದ್ಧ, ನಾರ್ತ್ ಸೌಂಡ್
55, ವೆಸ್ಟ್‌ಇಂಡೀಸ್ ವಿರುದ್ಧ, ಕಿಂಗ್‌ಸ್ಟನ್
215, ದ.ಆಫ್ರಿಕಾ ವಿರುದ್ಧ, ವಿಶಾಖಪಟ್ಟಣ
108, ದ.ಆಫ್ರಿಕಾ ವಿರುದ್ಧ, ಪುಣೆ
10, ದ.ಆಫ್ರಿಕಾ ವಿರುದ್ಧ, ರಾಂಚಿ
101*, ಬಾಂಗ್ಲಾದೇಶ ವಿರುದ್ಧ, ಇಂದೋರ್

ಭಾರತ ನೆಲದಲ್ಲಿ ಆಡಿದ ಮೊದಲ ನಾಲ್ಕು ಟೆಸ್ಟ್ ಪಂದ್ಯಗಳಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದವರು:
4 ಎವರ್ಟನ್ ವೀಕ್ಸ್
3 ಗ್ಯಾರಿ ಸೋಬರ್ಸ್
3 ಕೆನ್ ಬ್ಯಾರಿಂಗ್ಟನ್
3 ಮೊಹಮ್ಮದ್ ಅಜರುದ್ದೀನ್
3 ಆ್ಯಂಡಿ ಫ್ಲವರ್
3 ಆಂಡ್ರ್ಯೂ ಸ್ಟ್ರಾಸ್
3 ಮಯಾಂಕ್ ಅಗರ್ವಾಲ್