ವೇದಾ ಕೃಷ್ಣಮೂರ್ತಿಗೆ ಕೊಕ್‌

ನ್ಯೂಜಿಲೆಂಡ್‌ ಪ್ರವಾಸಕ್ಕೆ ಮಹಿಳಾ ತಂಡಗಳು ಪ್ರಕಟ|ಒಡಿಐ, ಟಿ20 ನಾಯಕತ್ವ ಉಳಿಸಿಕೊಂಡ ಮಿಥಾಲಿ, ಹರ್ಮನ್‌

ಹೊಸದಿಲ್ಲಿ : ಮುಂದಿನ ತಿಂಗಳು ಎರಡು ಚುಟುಕು ಸರಣಿಗಳನ್ನು ಆಡುವುದಕ್ಕಾಗಿ ಭಾರತ ಮಹಿಳಾ ಕ್ರಿಕೆಟ್‌ ತಂಡ ನ್ಯೂಜಿಲೆಂಡ್‌ ಪ್ರವಾಸ ಕೈಗೊಳ್ಳುತ್ತಿದ್ದು, ಶುಕ್ರವಾರ ಏಕದಿನ ಮತ್ತು ಟಿ20 ತಂಡಗಳನ್ನು ಆಯ್ಕೆ ಮಾಡಲಾಗಿದೆ.

ಮಿಥಾಲಿ ರಾಜ್‌ ಮತ್ತು ಹರ್ಮನ್‌ಪ್ರೀತ್‌ ಕೌರ್‌ ಅನುಕ್ರಮವಾಗಿ ಏಕದಿನ ಮತ್ತು ಟಿ20 ತಂಡಗಳ ನಾಯಕತ್ವ ಉಳಿಸಿಕೊಳ್ಳುವಲ್ಲಿ ಸಫಲರಾಗಿದ್ದಾರೆ. ಆದರೆ, ಮಧ್ಯಮ ಕ್ರಮಾಂಕದ ಆಟಗಾರ್ತಿ ಕರ್ನಾಟಕದ ವೇದಾ ಕೃಷ್ಣ ಮೂರ್ತಿ ಅವರನ್ನು ಎರಡೂ ತಂಡಗಳಿಂದ ಕೈಬಿಡಲಾಗಿದೆ. ಫಾರ್ಮ್‌ ಕಳೆದುಕೊಂಡಿರುವುದರಿಂದ ವೇದಾ ಅವರನ್ನು ಕೈಬಿಡಲಾಗಿದೆ ಎಂದು ಆಯ್ಕೆ ಸಮಿತಿ ಮುಖ್ಯಸ್ಥೆ ಹೇಮಲತಾ ಕಲಾ ತಿಳಿಸಿದ್ದಾರೆ.

ಐಸಿಸಿ ಮಹಿಳಾ ಚಾಂಪಿಯನ್‌ಷಿಪ್‌ ಅಂಗವಾಗಿ ಭಾರತ ಮಹಿಳಾ ತಂಡ ಜನವರಿ 24ರಿಂದ ನ್ಯೂಜಿಲೆಂಡ್‌ನಲ್ಲಿ 3 ಪಂದ್ಯಗಳ ಏಕದಿನ ಸರಣಿಯಲ್ಲಿ ಪಾಲ್ಗೊಳ್ಳಲಿದೆ. ಅದಾದ ಬಳಿಕ 3 ಪಂದ್ಯಗಳ ಅಂತಾರಾಷ್ಟ್ರೀಯ ಟಿ20 ಸರಣಿ ಆಡಲಿದೆ. ಕಳೆದ ತಿಂಗಳು ಟಿ20 ವಿಶ್ವಕಪ್‌ನಲ್ಲಿ ಇಂಗ್ಲೆಂಡ್‌ ವಿರುದ್ಧ ಸೆಮಿಫೈನಲ್‌ನಲ್ಲಿ ಸೋತ ಬಳಿಕ ಭಾರತ ಮಹಿಳಾ ತಂಡ ಆಡುತ್ತಿರುವ ಮೊದಲ ಕ್ರಿಕೆಟ್‌ ಸರಣಿ ಇದು.

ಹಿರಿಯ ಕ್ರಿಕೆಟಿಗ ಡಬ್ಲ್ಯು.ವಿ.ರಾಮನ್‌ ಮುಖ್ಯ ತರಬೇತುದಾರನಾಗಿ ಆಯ್ಕೆಯಾದ ಮರುದಿನವೇ ತಲಾ 15 ಸದಸ್ಯರ ಏಕದಿನ ಮತ್ತು ಟಿ20 ತಂಡಗಳನ್ನು ಆಯ್ಕೆ ಮಾಡಲಾಗಿದೆ.

ಏಕದಿನ ತಂಡ : ಮಿಥಾಲಿ ರಾಜ್‌ (ನಾಯಕಿ), ಪೂನಂ ರಾವತ್‌, ಸ್ಮೃತಿ ಮಂಧಾನಾ, ಜೆಮಿಮಾ ರೋಡ್ರಿಗಸ್‌, ಹರ್ಮನ್‌ಪ್ರೀತ್‌ ಕೌರ್‌, ದೀಪ್ತಿ ಶರ್ಮಾ, ತಾನ್ಯಾ ಭಾಟಿಯಾ (ವಿಕೆಟ್‌ಕೀಪರ್‌), ಮೋನಾ ಮೆಶ್ರಾಮ್‌, ಏಕ್ತಾ ಬಿಸ್ತ್‌, ಮಾನಸಿ ಜೋಷಿ, ದಯಾಲನ್‌ ಹೇಮಲತಾ, ಪೂನಂ ಯಾದವ್‌, ರಾಜೇಶ್ವರಿ ಗಾಯಕ್ವಾಡ್‌, ಝೂಲನ್‌ ಗೋಸ್ವಾಮಿ ಮತ್ತು ಶಿಖಾ ಪಾಂಡೆ.

ಟಿ20-i ತಂಡ: ಹರ್ಮನ್‌ಪ್ರೀತ್‌ ಕೌರ್‌ (ನಾಯಕಿ), ಸ್ಮೃತಿ ಮಂಧಾನಾ (ಉಪನಾಯಕಿ), ಮಿಥಾಲಿ ರಾಜ್‌, ದೀಪ್ತಿ ಶರ್ಮಾ, ಜೆಮಿಮಾ ರೋಡ್ರಿಗಸ್‌, ಅನುಜಾ ಪಾಟೀಲ್‌, ದಯಾಲನ್‌ ಹೇಮಲತಾ, ಮಾನಸಿ ಜೋಷಿ, ಶಿಖಾ ಪಾಂಡೆ, ತಾನ್ಯಾ ಭಾಟಿಯಾ (ವಿಕೆಟ್‌ಕೀಪರ್‌), ಪೂನಂ ಯಾದವ್‌, ಏಕ್ತಾ ಬಿಸ್ತ್‌, ರಾಧಾ ಯಾದವ್‌, ಅನುರಾಧಾ ರೆಡ್ಡಿ ಮತ್ತು ಪ್ರಿಯಾ ಪೂನಿಯಾ.