ಮಾತೃಭಾಷೆ ಕುರಿತ ಟ್ರೋಲ್‌ಗೆ ದಿಟ್ಟ ಉತ್ತರ ನೀಡಿದ ನಾಯಕಿ ಮಿಥಾಲಿ ರಾಜ್‌!

ಹೊಸದಿಲ್ಲಿ: ಭಾರತ ಮಹಿಳಾ ಕ್ರಿಕೆಟ್‌ ತಂಡದ ನಾಯಕಿ ಮಿಥಾಲಿ ರಾಜ್ ತಮ್ಮ ನೇರ ಮತ್ತು ದಿಟ್ಟ ನುಡಿಯ ವ್ಯಕ್ತಿತ್ವದಿಂದಲೂ ಗಮನ ಸೆಳೆದಿದ್ದಾರೆ. ತಮ್ಮ ವಿರುದ್ಧ ಅನಗತ್ಯವಾಗಿ ಬೊಟ್ಟು ಮಾಡುವವರಿಗೆ ಮಿಥಾಲಿ ತಮ್ಮದೇ ಶೈಲಿಯಲ್ಲಿ ಬಿಸಿ ಮುಟ್ಟಿಸಿರುವ ಹಲವು ಉದಾಹರಣೆಗಳಿವೆ.

ಈ ಹಿಂದೆ ಸೋಷಿಯಲ್‌ ಮೀಡಿಯಾದಲ್ಲಿ ಪ್ರಕಟಿಸಿದ್ದ ತಮ್ಮ ಬೋಲ್ಡ್‌ ಫೋಟೊಗಳಿಗೆ ಹರಿಬಂದ ಟೀಕೆಗಳಿಗೆ ಕ್ಯಾರೇ ಎನ್ನದ ಮಿಥಾಲಿ, ತಮ್ಮ ಜೀವನ, ತಮಗಿಷ್ಟ ಬಂದ ಉಡುಗೆ ತೊಡುಗೆ ಧರಿಸುವ ಹಕ್ಕು ತಮಗಿದೆ ಎಂಬುದನ್ನು ತಮ್ಮ ವಿರುದ್ಧದ ಟ್ರೋಲ್‌ಗಳಿಗೆ ನೆನಪಿಸಿ ಸೈ ಎನಿಸಿಕೊಂಡಿದ್ದರು. ಇದೀಗ ಮತ್ತೊಮ್ಮೆ ಅಂಥದ್ದೇ ಘಟನೆ ನಡೆದಿದೆ.

ಮಹಿಳಾ ಏಕದಿನ ಕ್ರಿಕೆಟ್‌: ದಕ್ಷಿಣ ಆಫ್ರಿಕಾ ವಿರುದ್ಧ ಮಿಥಾಲಿ ರಾಜ್‌ ಪಡೆಗೆ 5 ವಿಕೆಟ್‌ ಭರ್ಜರಿ ಜಯ

ಸೋಷಿಯಲ್‌ ಮೀಡಿಯಾದಲ್ಲಿ ತಮ್ಮೆಲ್ಲಾ ಪೋಸ್ಟ್‌ಗಳಿಗೆ ಮಾತೃಭಾಷೆ ಪ್ರಶ್ನಿಸಿ ಹೀಯಾಳಿಸುತ್ತಿದ್ದ ವ್ತಯಕ್ತಿಗೆ ಭಾರತ ಏಕದಿನ ಕ್ರಿಕೆಟ್‌ ತಂಡದ ನಾಯಕಿ ಭರ್ಜರಿಯಾಗೇ ಚಾಟಿ ಬೀಸಿದ್ದಾರೆ. ಇತ್ತೀಚೆಗಷ್ಟೇ ಅಂತಾರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ 20 ವರ್ಷಗಳ ವೃತ್ತಿ ಬದುಕು ಪೂರೈಸಿದ ವಿಶ್ವ ದಾಖಲೆ ಬರೆದ 36 ವರ್ಷದ ಅನುಭವಿ ಕ್ರಿಕೆಟರ್‌ ಅವರ ಮಾತೃಭಾಷೆ ತಮಿಳು. ಹೀಗಿದ್ದರೂ ಅವರು ಎಲ್ಲಿಯೂ ತಮಿಳು ಭಾಷೆ ಬಳಕೆ ಮಾಡುವುದಿಲ್ಲ ಇಂಗ್ಲಿಷ್‌, ಹಿಂದಿ, ತೆಲುಗು ಭಾಷೆಯನ್ನೇ ಬಳಕೆ ಮಾಡುತ್ತಾರೆ ಎಂದು ಟ್ರೋಲ್‌ಗಳು ಕಿಡಿ ಕಾರುತ್ತಿದ್ದವು.

ಅಲ್ಪ ಮೊತ್ತಕ್ಕೆ ಕುಸಿದರೂ 6 ರನ್‌ಗಳ ರೋಚಕ ಜಯ ದಾಖಲಿಸಿದ ಭಾರತ ಮಹಿಳಾ ತಂಡ!

"ಅವಳಿಗೆ ತಮಿಳು ಬರೋದಿಲ್ಲ. ಇಂಗ್ಲಿಷ್‌, ತೆಲುಗು ಮತ್ತು ಹಿಂದಿಯಷ್ಟೇ ಮಾತಾಡುತ್ತಾಳೆ," ಎಂದು ಟ್ವೀಟ್‌ ಮಾಡಲಾಗಿತ್ತು. ಇದಕ್ಕೆ ಕೊನೆಗೂ ಉತ್ತರ ನೀಡಿರುವ ಮಿಥಾಲಿ ರಾಜ್‌, "ತಮಿಳು ನನ್ನ ಮಾತೃಭಾಷೆ. ತಮಿಳು ಮಾತನಾಡಲು ಚೆನ್ನಾಗಿ ಬರುತ್ತೆ. ತಮಿಳುನಾಡಿನಲ್ಲಿ ನೆಲೆಸಿರುವುದಕ್ಕೂ ನನಗೆ ಹೆಮ್ಮೆಯಿದೆ. ಆದರೆ, ಇವೆಲ್ಲದಕ್ಕಿಂತಲೂ ಮಿಗಿಲಾಗಿ ನಾನು ಭಾರತೀಯಳು. ಮೈ ಡಿಯರ್‌ ಸಾಗು, ನನ್ನೆಲ್ಲಾ ಪೋಸ್ಟ್‌ಗಳಲ್ಲಿ ನಿನ್ನ ಸತತ ಟೀಕೆಗಳು ಮತ್ತು ನಾನು ಏನು ಮಾಡಬೇಕು ಏನು ಮಾಡಬಾರದು ಎಂದು ನೀನು ನೀಡುವ ದಿನನಿತ್ಯದ ಸಲಹೆಗಳು ಎಲ್ಲವೂ ನನ್ನನ್ನು ನಾನೇನು ಮಾಡಬೇಕೆಂದಿದ್ದೇನೊ ಅದನ್ನೇ ಮುಂದುವರಿಸುವಂತೆ ಪ್ರೇರೇಪಿಸುತ್ತದೆ," ಎಂದು ಟ್ರೋಲ್‌ ಮಾಡಿದವನಿಗೆ ಮಾತಿನ ಬಿಸಿ ಮುಟ್ಟಿಸಿದ್ದಾರೆ.

ಯುವ ಪ್ರತಿಭೆ ಶಫಾಲಿ ವರ್ಮಾ ಭವಿಷ್ಯ ನುಡಿದ ಮಿಥಾಲಿ ರಾಜ್‌!

ಎರಡು ದಶಕ ಕಾಲ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಆಡಿದ ವಿಶ್ವದ ಏಕಮಾತ್ರ ಮಹಿಳೆ ಎಂದೆನಿಸಿಕೊಂಡಿರುವ ಮಿಥಾಲಿ ರಾಜ್‌, ಅತಿ ಹೆಚ್ಚು ಏಕದಿನ ಕ್ರಿಕೆಟ್‌ ಪಂದ್ಯಗಳನ್ನು ಆಡಿದ ವಿಶ್ವ ದಾಖಲೆಯನ್ನೂ ಹೊಂದಿದ್ದಾರೆ. ಭಾರತದ ಪರ ಒಟ್ಟು 206 ಒಡಿಐಗಳನ್ನು ಆಡಿರುವ ಮಿಥಾಲಿ, ಅತಿ ಹೆಚ್ಚು ರನ್‌ ಗಳಿಸಿದ ದಾಖಲೆಯನ್ನೂ ಹೊಂದಿದ್ದಾರೆ. ಈ ಪಟ್ಟಿಯಲ್ಲಿ ಇಂಗ್ಲೆಂಡ್‌ನ ಮಾಜಿ ಆಟಗಾರ್ತಿ ಶಾರ್ಲೊಟ್‌ ಎಡ್ವರ್ಡ್ಸ್‌ (191), ಭಾರತದ ಜೂಲನ್‌ ಗೋಸ್ವಾಮಿ (178) ಮತ್ತು ಆಸ್ಟ್ರೇಲಿಯಾದ ಅಲೆಕ್ಸ್‌ ಬ್ಲ್ಯಾಕ್‌ವೆಲ್‌ (144) ಇದ್ದಾರೆ.

ಭಾರತವೇ ಪ್ರಶಸ್ತಿ ಫೇವರಿಟ್‌: ಮಿಥಾಲಿ

ಇನ್ನು ಇದೇ ವರ್ಷ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿರುವ ಮಿಥಾಲಿ ರಾಜ್‌, ಏಕದಿನ ಮಾದರಿಯ ಕ್ರಿಕೆಟ್‌ನಲ್ಲಿ ಮಾತ್ರವೇ ಮುಂದುವರಿಯುವ ನಿರ್ಧಾರ ಪ್ರಕಟಿಸಿದ್ದಾರೆ. ಕಳೆದ ವರ್ಷ ಟಿ20 ವಿಶ್ವಕಪ್‌ ವೇಳೆ ಮಿಥಾಲಿ ರಾಜ್‌ ಅವರನ್ನು ಹೊರಗಿಟ್ಟ ಕಾರಣಕ್ಕೆ ಭಾರತ ಮಹಿಳಾ ಕ್ರಿಕೆಟ್‌ ತಂಡ ಸೆಮಿಫೈನಲ್‌ನಲ್ಲಿ ಸೋಲನುಭವಿಸಿತ್ತು ಎಂದು ಭಾರಿ ವಿವಾದವೇ ಸೃಷ್ಠಿಯಾಗಿತ್ತು. ಈ ಸಂದರ್ಭದಲ್ಲಿ ಟಿ20 ತಂಡದ ನಾಯಕಿ ಹರ್ಮನ್‌ಪ್ರೀತ್‌ ಕೌರ್‌ ಮತ್ತು ಒಡಿಐ ನಾಯಕಿ ಮಿಥಾಲಿ ರಾಜ್‌ ನಡುವೆ ಯಾವುದೂ ಸರಿಯಿಲ್ಲ ಎಂಬುದು ಸ್ಪಷ್ಟವಾಗಿತ್ತು.