‘ಮಿಥಾಲಿ ರಾಜ್‌ ಉದಾಸೀನ ಪ್ರವೃತ್ತಿಯವರು’

ಹೊಸದಿಲ್ಲಿ : ಹಿರಿಯ ಆಟಗಾರ್ತಿ ಮಿಥಾಲಿ ರಾಜ್‌ ಜತೆಗಿನ ಬಾಂಧವ್ಯ ಸರಿ ಇರಲಿಲ್ಲ ಎಂಬುದನ್ನು ಭಾರತ ಟಿ20 ತಂಡದ ಕೋಚ್‌ ರಮೇಶ್‌ ಪೊವಾರ್‌ ಒಪ್ಪಿಕೊಂಡಿದ್ದಾರೆ.

ಆದರೆ, ಟಿ20 ವಿಶ್ವಕಪ್‌ ಸೆಮಿಫೈನಲ್‌ನಲ್ಲಿ ಮಿಥಾಲಿಯವರನ್ನು ತಂಡದಿಂದ ಕೈಬಿಡಲು ಕ್ರಿಕೆಟ್‌ ರಣತಂತ್ರ ಕಾರಣವೇ ಹೊರತು ಬೇರೇನೂ ಅಲ್ಲ ಎಂದು ಪೊವಾರ್‌ ಸ್ಪಷ್ಟನೆ ನೀಡಿದ್ದಾರೆ ಎಂಬುದಾಗಿ ಬಿಸಿಸಿಐ ಅಧಿಕಾರಿಯೊಬ್ಬರು ಬುಧವಾರ ತಿಳಿಸಿದ್ದಾರೆ.

ಕೋಚ್‌ ರಮೇಶ್‌ ಪೊವಾರ್‌ ತಮಗೆ ಅವಮಾನ ಮಾಡಿದ್ದಾರೆ ಎಂದು ಮಿಥಾಲಿ ಮಂಗಳವಾರ ಬಿಸಿಸಿಐ ಸಿಇಒ ರಾಹುಲ್‌ ಜೊಹ್ರಿ ಮತ್ತು ಪ್ರಧಾನ ವ್ಯವಸ್ಥಾಪಕ (ಕ್ರಿಕೆಟ್‌ ನಿರ್ವಹಣೆ) ಸಾಬಾ ಕರೀಂ ಅವರಿಗೆ ಇ-ಮೇಲ್‌ ರವಾನಿಸಿದ್ದರು. ಅದೇ ವೇಳೆ ಬುಧವಾರ ಕೇಂದ್ರ ಕಚೇರಿಗೆ ಹಾಜರಾಗುವಂತೆ ಪೊವಾರ್‌ಗೆ ಮಂಗಳವಾರ ಸಮನ್ಸ್‌ ನೀಡಲಾಗಿತ್ತು. ಆ ಹಿನ್ನೆಲೆಯಲ್ಲಿ ಪೊವಾರ್‌ ಬುಧವಾರ ಮುಂಬಯಿಯಲ್ಲಿರುವ ಬಿಸಿಸಿಐ ಕೇಂದ್ರ ಕಚೇರಿಯಲ್ಲಿ ಬಿಸಿಸಿಐ ಅಧಿಕಾರಿಗಳನ್ನು ಭೇಟಿ ಮಾಡಿ ಸ್ಪಷ್ಟೀಕರಣ ನೀಡಿದ್ದಾರೆ. ಮಿಥಾಲಿ ಉದಾಸೀನ ಪ್ರವೃತ್ತಿಯವರಾಗಿದ್ದು ತಂಡದಲ್ಲಿ ಅವರ ಉಸ್ತುವಾರಿ ಕಷ್ಟ ಎಂದು ಅಧಿಕಾರಿಗಳಿಗೆ ಪೊವಾರ್‌ ತಿಳಿಸಿದ್ದಾರೆ ಎಂಬುದಾಗಿ ಹೆಸರು ಹೇಳಲಿಚ್ಛಿಸದ ಬಿಸಿಸಿಐ ಅಧಿಕಾರಿ ತಿಳಿಸಿದ್ದಾರೆ.