ವಿರಾಟ್ ಜೊತೆ ಆಮೀರ್ ಮೈಂಡ್ ಗೇಮ್

ಹೊಸದಿಲ್ಲಿ: ಇಂಗ್ಲೆಂಡ್‌ನಲ್ಲಿ ಕಳೆದ ವರ್ಷ ನಡೆದ ಚಾಂಪಿಯನ್ಸ್ ಟ್ರೋಫಿ ಫೈನಲ್ ಪಂದ್ಯದಲ್ಲಿ ಸಾಂಪ್ರದಾಯಿಕ ಬದ್ಧ ಎದುರಾಳಿ ಪಾಕಿಸ್ತಾನ ವಿರುದ್ಧ ಪರಾಭವ ಕಂಡ ಟೀಮ್ ಇಂಡಿಯಾ ರನ್ನರ್ ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟುಕೊಂಡಿತ್ತು.

ಇದು ಪಾಕ್ ವಿರುದ್ಧ ಎದುರಾದ ಅತಿ ಹೀನಾಯ ಸೋಲುಗಳಲ್ಲಿ ಒಂದಾಗಿದೆ. ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡವೆನಿಸಿದ್ದರೂ ಅಂತಿಮವಾಗಿ 180 ರನ್ ಅಂತರದ ಬೃಹತ್ ಸೋಲಿಗೊಳಗಾಗಿತ್ತು.

ಪಾಕ್ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿರುವ ಮೊಹಮ್ಮದ್ ಆಮೀರ್, ನಾಯಕ ವಿರಾಟ್ ಕೊಹ್ಲಿ ಜೊತೆಗೆ ರೋಹಿತ್ ಶರ್ಮಾ ಹಾಗೂ ಶಿಖರ್ ಧವನ್ ವಿಕೆಟುಗಳನ್ನು ಕಬಳಿಸಿದ್ದರು.

ಈ ಬಗ್ಗೆ ನೆನಪಿಸಿಕೊಂಡಿರುವ ಆಮೀರ್, ರನ್ ಮೆಶಿನ್ ವಿರಾಟ್ ಕೊಹ್ಲಿ ವಿರುದ್ಧ ಆಡಿರುವ ಮೈಂಡ್ ಗೇಮ್ ಆಟದ ಬಗ್ಗೆ ವಿವರಣೆ ನೀಡಿದ್ದಾರೆ.

"ವಿರಾಟ್ ಬ್ಯಾಟಿಂಗ್ ಮಾಡಲು ಬಂದಾಗ ನಾನು ಇನ್ ಸ್ವಿಂಗರ್ ದಾಳಿ ಮಾಡಿದೆ. ಇದಕ್ಕೆ ಸಮಾನವಾದ ದಾಳಿಯಲ್ಲೇ ರೋಹಿತ್ ವಿಕೆಟ್ ಪಡೆದಿದ್ದೆ. ಆಗಲೇ ಕ್ರೀಸಿಗಿಳಿದಿದ್ದರಿಂದ ಕೊಹ್ಲಿ ಸೆಟ್ ಆಗಿರಲಿಲ್ಲ. ಇದರಿಂದ ಔಟ್ ಸ್ವಿಂಗ್ ದಾಳಿಯನ್ನು ಪರೀಕ್ಷಿಸಿದೆ. ನಿಖರ ಜಾಗದಲ್ಲಿ ದಾಳಿ ನಡೆಸಿದರೆ ಪಾರಾಗುವುದು ಕಷ್ಟವೆನಿಸಿತು ಎಂಬುದು ನನಗೆ ತಿಳಿದಿತ್ತು" ಎಂದರು.

ಆಮೀರ್ ತಂತ್ರಗಾರಿಕೆ ಫಲಿಸಿದರೂ ಅಜರ್ ಅಲಿ ಸುಲಭ ಕ್ಯಾಚ್ ಕೈಚೆಲ್ಲಿದ್ದರು. ಆದರೆ ಈ ಸಂತಸ ಹೆಚ್ಚು ಹೊತ್ತು ನಿಲ್ಲಲಿಲ್ಲ. ಕೊಹ್ಲಿ ಮೇಲೆ ನಿರಂತರ ಒತ್ತಡ ಹೇರುವ ಮೂಲಕ ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು.

"ಕೊಹ್ಲಿ ವಿಕೆಟ್ ಪಡೆಯುವುದಕ್ಕಾಗಿ ನಾನು ದೇವರಲ್ಲಿ ಪ್ರಾರ್ಥಿಸುತ್ತಿದ್ದೆ. ಯಾಕೆಂದರೆ ಕೊಹ್ಲಿ ಅವರಂತಹ ಬ್ಯಾಟ್ಸ್‌ಮನ್‌ಗೆ ಮಗದೊಂದು ಅವಕಾಶ ನೀಡುವುದು ಎಷ್ಟೊಂದು ಅಪಾಯಕಾರಿ ಎಂಬುದು ನನಗೆ ಚೆನ್ನಾಗಿ ತಿಳಿದಿತ್ತು". ಈ ಹಿನ್ನಲೆಯಲ್ಲಿ ಮಗದೊಮ್ಮೆ ಇನ್ ಸ್ವಿಂಗ್ ಬದಲು ಔಟ್ ಸ್ವಿಂಗರ್ ಎಸೆಯುವ ಮೂಲಕ ಕೊಹ್ಲಿ ಅವರನ್ನು ಬಲೆಗೆ ಬೀಳಿಸಲಾಯಿತು ಎಂದರು.