ಧೋನಿ ಮಿಂಚಿನ ವೇಗದ ಸ್ಟಂಪಿಂಗ್

ದುಬೈ: ಯುಎಇನಲ್ಲಿ ನಡೆಯುತ್ತಿರುವ ಏಷ್ಯಾ ಕಪ್ 2018 ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ಮಹೇಂದ್ರ ಸಿಂಗ್ ಧೋನಿ ಮಗದೊಮ್ಮೆ ಮಿಂಚಿನ ವೇಗದ ಸ್ಟಂಪಿಂಗ್ ಮಾಡುವ ಮೂಲಕ ಗಮನ ಸೆಳೆದಿದ್ದಾರೆ.

ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ಬಾಂಗ್ಲಾದೇಶ ವಿರುದ್ಧ ನಡೆಯುತ್ತಿರುವ ಫೈನಲ್ ಪಂದ್ಯದಲ್ಲಿ ವಿಕೆಟ್ ಹಿಂದುಗಡೆ ನಿಂತು ಧೋನಿ ಮತ್ತೆ ತಮ್ಮ ಜವಾಬ್ದಾರಿಯನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ.

ಮೊದಲು ಬ್ಯಾಟಿಂಗ್ ನಡೆಸಿದ ಬಾಂಗ್ಲಾದೇಶಕ್ಕೆ ಓಪನರ್ ಲಿಟನ್ ದಾಸ್ ಬಿರುಸಿನ ಆರಂಭವನ್ನು ಒದಗಿಸಿದ್ದರು. ಭಾರತೀಯ ಬೌಲರ್‌ಗಳನ್ನು ಚಚ್ಚಿದ ಲಿಟನ್ ಮೈದಾನದ ಸುತ್ತಲೂ ಬೌಂಡರಿಗಳ ಸುರಿಮಳೆಗೈದರು.

ಅಲ್ಲದೆ ಮೊದಲ ವಿಕೆಟ್‌ಗೆ ಮಹಿದಿ ಹಸನ್ ಜೊತೆಗೆ 120 ರನ್‌ಗಳ ಜೊತೆಯಾಟದಲ್ಲಿ ಭಾಗಿಯಾಗಿದ್ದರು. ಒಂದೆಡೆ ವಿಕೆಟುಗಳು ಪತನಗೊಳ್ಳುತ್ತಿದ್ದರೂ ದಿಟ್ಟ ಇನ್ನಿಂಗ್ಸ್ ಕಟ್ಟಿದ ಲಿಟನ್ ಚೊಚ್ಚಲ ಶತಕ ಸಾಧನೆ ಮಾಡಿದ್ದರು.

ಹೀಗೆ ಅಪಾಯಕಾರಿ ಮುನ್ನುಗ್ಗುತ್ತಿದ್ದ ಲಿಟನ್ ದಾಸ್ ಅವರನ್ನು ಚೈನಾಮನ್ ಖ್ಯಾತಿಯ ಬೌಲರ್ ಕುಲ್‌ದೀಪ್ ಯಾದವ್ ಎಸೆತದಲ್ಲಿ ಮಹೇಂದ್ರ ಸಿಂಗ್ ಧೋನಿ ಸ್ಟಂಪಿಂಗ್ ಮೂಲಕ ಪೆವಿಲಿಯನ್‌ಗೆ ಮರಳಿಸಿದ್ದರು.

ರಿಪ್ಲೇನಲ್ಲಿ ಥರ್ಡ್ ಅಂಪೈರ್‌ಗೂ ಸ್ಪಷ್ಟ ನಿರ್ಧಾರ ಕೈಗೊಳ್ಳುವುದು ಕಠಿಣವೆನಸಿತ್ತು. ಆದರೆ ಧೋನಿ ಮಿಂಚಿನ ವೇಗದ ಸ್ಟಂಪಿಂಗ್ ಮುಂದೆ ಲಿಟನ್ ಬಳಿ ಉತ್ತರವೇ ಇರಲಿಲ್ಲ. 117 ಎಸೆತಗಳನ್ನು ಎದುರಿಸಿದ ಲಿಟನ್ 12 ಬೌಂಡರಿ ಹಾಗೂ ಎರಡು ಸಿಕ್ಸರ್ ನೆರವಿನಿಂದ 121 ರನ್ ಗಳಿಸಿದರು.

ಇದಾದ ಬೆನ್ನಲ್ಲೇ ಕುಲ್‌ದೀಪ್ ದಾಳಿಯಲ್ಲೇ ಬಾಂಗ್ಲಾ ನಾಯಕ ಮಶ್ರಾಫೆ ಮೊರ್ತಜಾ (7) ಅವರನ್ನು ಸ್ಟಂಪಿಂಗ್ ಮೂಲಕ ಹೊರದಬ್ಬಿದರು. ಈ ಮೂಲಕ ನಿವೃತ್ತಿ ಸಲ್ಲಿಸಬೇಕೆಂದು ಟೀಕೆಗೆ ಗುರಿ ಮಾಡುತ್ತಿರುವರಿಗೆ ಸ್ಪಷ್ಟ ಉತ್ತರ ನೀಡಿದರು.