ರಾಯಲ್ ಎನ್‌ಫೀಲ್ಡ್‌ನಲ್ಲಿ ಧೋನಿ ಜಾಲಿ ರೈಡ್

ಹೊಸದಿಲ್ಲಿ: ಸದ್ಯ ಕ್ರಿಕೆಟ್‌ನಿಂದ ಬಿಡುವಿನಲ್ಲಿರುವ ಟೀಮ್ ಇಂಡಿಯಾ ಮಾಜಿ ಕಪ್ತಾನ ಮಹೇಂದ್ರ ಸಿಂಗ್ ಧೋನಿ, ಕ್ರಿಕೆಟೇತರ ಚಟುವಟಿಕೆಗಳಲ್ಲಿ ತೊಡಗಿಸಿಕೊಂಡಿದ್ದಾರೆ.

ಇದರಲ್ಲಿ ಕ್ರಿಕೆಟ್ ಹೊರತಾಗಿ ತಾವು ಅತಿ ಹೆಚ್ಚು ಇಷ್ಟಪಡುವ ಬೈಕ್ ರೈಡಿಂಗ್‌ನಲ್ಲಿ ಭಾಗಿಯಾಗುವ ಮೂಲಕ ಗಮನ ಸೆಳೆದಿದ್ದಾರೆ.

ಹಿಮಾಚಲ ಪ್ರದೇಶದ ಪ್ರಕೃತಿ ರಮಣೀಯ ಪ್ರದೇಶ ಶಿಮ್ಲಾ ಕುಟುಂಬ ಸಮೇತ ಭೇಟಿ ಕೊಟ್ಟಿರುವ ಮಹಿ, ಬೈಕ್ ರೈಡಿಂಗ್ ಮಾಡುವ ಮೂಲಕ ಸಂತೋಷದ ಸಮಯವನ್ನು ಕಳೆದಿದ್ದಾರೆ.


ತಮ್ಮ ನೆಚ್ಚಿನ ರಾಯಲ್ ಎನ್‌ಫೀಲ್ಡ್ ಬೈಕ್‌ನಲ್ಲಿ ಧೋನಿ ಸವಾರಿ ಮಾಡಿದರು. ಇದೇ ವೇಳೆಯಲ್ಲಿ ಶೂಟಿಂಗ್‌ನಲ್ಲೂ ಭಾಗಿಯಾದರು. ಧೋನಿ ಪತ್ನಿ ಕೂಡಾ ಶಿಮ್ಲಾದ ಆಕರ್ಷಕ ಚಿತ್ರಗಳನ್ನು ಹಂಚಿಕೊಂಡಿದ್ದರು.

ಸಾಹಸ ಬೈಕ್ ರೈಡಿಂಗ್ ಇಷ್ಟಪಡುವವರನ್ನು ಶಿಮ್ಲಾದ ಕಣಿವೆ ಪ್ರದೇಶ ಕೈ ಬೀಸಿ ಕರೆಯುತ್ತಿದೆ. 37ರ ಧೋನಿ ಕೂಡಾ ತಮ್ಮ ಬಳಿ ಅತ್ಯಾಕರ್ಷಕ ಬೈಕ್‌ಗಳ ಸಂಗ್ರಹವನ್ನು ಹೊಂದಿದ್ದಾರೆ.

2014ನೇ ಇಸವಿಯಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಧೋನಿ ನಿವೃತ್ತಿ ಸಲ್ಲಿಸಿದ್ದರು. ಇದೀಗ ಏಷ್ಯಾ ಕಪ್ ವೇಳೆಗೆ ಟೀಮ್ ಇಂಡಿಯಾ ಸೇರಿಕೊಳ್ಳುವ ಇರಾದೆಯಲ್ಲಿದ್ದಾರೆ.