ಧೋನಿ-ಕೋಹ್ಲಿ ಬಾಂಧವ್ಯದಿಂದ ವಿಶ್ವಕಪ್‌ನಲ್ಲಿ ನೆರವು: ಲಕ್ಷ್ಮಣ್

ಹೊಸದಿಲ್ಲಿ: ಭಾರತ ತಂಡದ ನಾಯಕ ವಿರಾಟ್ ಕೋಹ್ಲಿ ಮತ್ತು ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ನಡುವಣ ಉತ್ತಮ ಬಾಂಧವ್ಯವು ಮುಂಬರುವ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾರತಕ್ಕೆ ನೆರವಾಗಲಿದೆ ಎಂದು ಮಾಜಿ ಆಟಗಾರ ವಿವಿಎಸ್ ಲಕ್ಷ್ಮಣ್ ಅಭಿಪ್ರಾಯಪಟ್ಟಿದ್ದಾರೆ.

ವಿರಾಟ್ ಕೋಹ್ಲಿ ಆಕ್ರಮಣಕಾರಿ ನಾಯಕತ್ವ ಶೈಲಿಯನ್ನು ಮೈಗೂಡಿಸಿ ಬಂದರೆ ಧೋನಿ ಶಾಂತ ಸ್ವಭಾವದಿಂದ ಪಂದ್ಯವನ್ನು ವಿಶ್ಲೇಷಣೆ ಮಾಡುತ್ತಿರುತ್ತಾರೆ. ಅಲ್ಲದೆ ನಾಯಕನಿಗೆ ಬೇಕಾದ ಅಗತ್ಯ ಸಲಹೆಗಳನ್ನು ಮಾಡುತ್ತಾರೆ.

ಸರಿಯಾದ ಸಂದರ್ಭದಲ್ಲಿ ಕೋಹ್ಲಿ ಅವರಿಗೆ ನಾಯಕತ್ವ ಸ್ಥಾನವನ್ನು ಬಿಟ್ಟುಕೊಡಲಾಗಿತ್ತು. ತದಾ ಬಳಿಕ ಟೆಸ್ಟ್ ಹಾಗೂ ಏಕದಿನಗಳಲ್ಲಿ ನಂ.1 ಸ್ಥಾನ ಆಲಂಕರಿಸಿತ್ತು.

ವಿರಾಟ್ ಕೋಹ್ಲಿಗೆ ಧೋನಿ ನೀಡುವ ಸಲಹೆಗಳು ಸ್ಟಂಪ್ ಮೈಕ್‌ನಲ್ಲಿ ಸೆರೆಯಾಗಿತ್ತು. ಅಲ್ಲದೆ ಒಬ್ಬರನ್ನೊಬ್ಬರು ಪರಸ್ಪರ ಗೌರವಿಸುತ್ತಿರುವ ರೀತಿಯು ತಂಡದ ಏಳಿಗೆಗೆ ಸಾಕ್ಷಿಯಾಗಿದೆ.

ಓರ್ವ ಹಿರಿಯ ಹಾಗೂ ಮಾಜಿ ನಾಯಕ ಆಗಿರುವ ಹೊರತಾಗಿಯೂ ಕೋಹ್ಲಿ ಜತೆ ಬೆರೆಯುವುದರಲ್ಲಿ ಧೋನಿ ಹಿಂಜರಿಯುವುದಿಲ್ಲ. ಅತ್ತ ಕೋಹ್ಲಿ ಸಹ ಮಾಜಿ ನಾಯಕನ ಮಾತಿಗೆ ಬೆಲೆ ಕೊಡುತ್ತಿದ್ದಾರೆ. ಡಿಆರ್‌ಎಸ್ ಮುಂತಾದ ನಿರ್ಣಾಯಕ ಹಂತಗಳಲ್ಲಿ ಇದು ತಂಡಕ್ಕೆ ನೆರವಾಗಿ ಪರಿಣಮಿಸಿದೆ.

ಧೋನಿ-ಕೋಹ್ಲಿ ಜುಗಲ್‌ಬಂದಿ ಬಗ್ಗೆ ಮಾತನಾಡಿರುವ ಲಕ್ಷ್ಮಣ್, ಇದು 2019 ವಿಶ್ವಕಪ್‌ನಲ್ಲಿ ನೆರವಾಗಲಿದೆ ಎಂದಿದ್ದಾರೆ. ಇಲ್ಲಿ ಇಬ್ಬರು ಆಟಗಾರರು ಅಹಂ ಇಲ್ಲದೆ ತಂಡಕ್ಕೆ ಮೊದಲ ಆದ್ಯತೆ ಕೊಟ್ಟಿದ್ದಾರೆ ಎಂದು ವಿವರಿಸಿದ್ದಾರೆ.