ಇಂದು ಮುಂಬಯಿ ಗೆದ್ದರೆ ಪ್ಲೇ ಆಫ್‌, ಸೋತರೆ ಸ್ವಿಚ್‌ ಆಫ್‌

ಹೊಸದಿಲ್ಲಿ: ಕ್ಲೈಮ್ಯಾಕ್ಸ್‌ ಹಂತ ತಲುಪಿರುವ ಐಪಿಎಲ್‌-11ರಲ್ಲಿ ಭಾನುವಾರ ಎರಡು ಅಂತಿಮ ಲೀಗ್‌ ಪಂದ್ಯಗಳು ನಡೆಯಲಿದ್ದು, ಹಾಲಿ ಚಾಂಪಿಯನ್‌ ಮುಂಬಯಿ ಇಂಡಿಯನ್ಸ್‌ಗೆ ನಿರ್ಣಾಯಕ ದಿನ. ರೋಹಿತ್‌ ಶರ್ಮಾ ಬಳಗ ಪ್ಲೇ ಆಫ್‌ ಹಂತಕ್ಕೇರಬೇಕಾದರೆ ಫಿರೋಜ್‌ ಶಾ ಕೋಟ್ಲಾ ಮೈದಾನದಲ್ಲಿ ನಡೆಯಲಿರುವ ಡೆಲ್ಲಿ ಡೇರ್‌ ಡೆವಿಲ್ಸ್‌ ವಿರುದ್ಧದ ಪಂದ್ಯವನ್ನು ಗೆಲ್ಲಲೇಬೇಕಿದೆ.

ಆಡಿರುವ 13 ಪಂದ್ಯಗಳಲ್ಲಿ 6 ಗೆಲುವು, 7 ಸೋಲು ಸಹಿತ 12 ಅಂಕ ಕಲೆ ಹಾಕಿರುವ ಮುಂಬಯಿ, ಆತಿಥೇಯ ಡೆಲ್ಲಿ ವಿರುದ್ಧ ಗೆದ್ದರೆ ಪ್ಲೇ ಆಫ್‌ ಹಂತಕ್ಕೇರಲಿದೆ. ಒಂದು ವೇಳೆ ಸೋತರೆ ಹಾಲಿ ಚಾಂಪಿಯನ್ನರ ಅಭಿಯಾನ ಲೀಗ್‌ ಹಂತದಲ್ಲೇ ಕೊನೆಗೊಳ್ಳಲಿದೆ. ಟೂರ್ನಿಯ ಆರಂಭದಲ್ಲೇ ಹ್ಯಾಟ್ರಿಕ್‌ ಸೋಲಿನ ಆಘಾತದಿಂದ ಚೇತರಿಸಿಕೊಂಡು ದ್ವಿತೀಯಾರ್ಧದಲ್ಲಿ ಪುಟಿದೆದ್ದು ನಿಂತಿರುವ ಮುಂಬಯಿ, ಕಳೆದ 5 ಪಂದ್ಯಗಳಲ್ಲಿ 4 ಗೆಲುವುಗಳನ್ನು ದಾಖಲಿಸಿದೆ.

ಮತ್ತೊಂದೆಡೆ ಅಂತಪಟ್ಟಿಯ ಕೊನೆಯ ಸ್ಥಾನಿ ಡೆಲ್ಲಿ ಡೇರ್‌ ಡೆವಿಲ್ಸ್‌ ಕಳೆದುಕೊಳ್ಳುವಂತದ್ದು ಏನೂ ಇಲ್ಲ. ಕಳೆದ ಪಂದ್ಯದಲ್ಲಿ ಬಲಿಷ್ಠ ಚೆನ್ನೈ ಸೂಪರ್‌ ಕಿಂಗ್ಸ್‌ಗೆ ಸೋಲಿನ ಬಿಸಿ ಮುಟ್ಟಿಸಿರುವ ಡೆಲ್ಲಿ, ಜಯದೊಂದಿಗೆ ಅಭಿಯಾನ ಅಂತ್ಯಗೊಳಿಸುವ ತವಕದಲ್ಲಿದೆ.