ವೇಗಿ ಮುನಾಫ್‌ ವಿದಾಯ

ಹೊಸದಿಲ್ಲಿ : 2011ರ ವಿಶ್ವಕಪ್‌ ವಿಜೇತ ಭಾರತ ತಂಡದ ಸದಸ್ಯ ವೇಗಿ ಮುನಾಫ್‌ ಪಟೇಲ್‌ ಶುಕ್ರವಾರ ಕ್ರಿಕೆಟ್‌ನ ಎಲ್ಲ ಪ್ರಕಾರಗಳಿಗೆ ನಿವೃತ್ತಿ ಪ್ರಕಟಿಸಿದ್ದಾರೆ.

ಮೊಹಾಲಿಯಲ್ಲಿ ಇಂಗ್ಲೆಂಡ್‌ ವಿರುದ್ಧ 2006ರ ಮಾರ್ಚ್‌ನಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ 35 ವರ್ಷದ ಬೌಲರ್‌ ಮುನಾಫ್‌, ಭಾರತದ ಪರ 13 ಟೆಸ್ಟ್‌, 70 ಏಕದಿನ ಮತ್ತು 3 ಟಿ20 ಅಂತಾರಾಷ್ಟ್ರೀಯ ಪಂದ್ಯಗಳನ್ನಾಡಿದ್ದು, ಒಟ್ಟು 125 ವಿಕೆಟ್‌ ಕಬಳಿಸಿದ್ದಾರೆ.

''ಫಿಟ್ನೆಸ್‌ ಒಂದೇ ರೀತಿ ಇರುವುದಿಲ್ಲ. ವಯಸ್ಸಾದಂತೆ ಕಡಿಮೆಯಾಗುತ್ತಾ ಹೋಗುತ್ತದೆ. ಹೀಗಾಗಿ ನಿವೃತ್ತಿ ಪ್ರಕಟಿಸುತ್ತಿರುವುದರಲ್ಲಿ ಯಾವುದೇ ವಿಶೇಷತೆ ಇಲ್ಲ. ಮತ್ತೊಂದೆಡೆ ಯುವ ಆಟಗಾರರು ಅವಕಾಶಗಳಿಗಾಗಿ ಎದುರು ನೋಡುತ್ತಿದ್ದಾರೆ. ಅದರಲ್ಲೂ ಕ್ರಿಕೆಟ್‌ನಲ್ಲಿ ಮುಂದುವರಿಯಲು ನನಗಿನ್ನೂ ಯಾವುದೇ ಬಗೆಯ ಪ್ರೇರಣೆ ಉಳಿದಿಲ್ಲ,'' ಎಂದು ಮುನಾಫ್‌ ಹೇಳಿದ್ದಾರೆ.

ಗುಜರಾತ್‌ನ ಇಖಾರ್‌ನಲ್ಲಿ ಜನಿಸಿದ ಮುನಾಫ್‌ ಪಟೇಲ್‌, ದೇಶೀಯ ಕ್ರಿಕೆಟ್‌ನಲ್ಲಿ ಮುಂಬಯಿ, ಮಹಾರಾಷ್ಟ್ರ, ಬರೋಡ ಮತ್ತು ಗುಜರಾತ್‌ ತಂಡಗಳನ್ನು ಪ್ರತಿನಿಧಿಸಿದ್ದಾರೆ. ಐಪಿಎಲ್‌ನಲ್ಲೂ ತಮ್ಮ ಛಾಪು ಮೂಡಿಸಿರುವ ಆರಡಿಗೂ ಮೀರಿದ ಎತ್ತರದ ವೇಗದ ಬೌಲರ್‌ ಮುಂಬಯಿ ಇಂಡಿಯನ್ಸ್‌, ರಾಜಸ್ಥಾನ್‌ ರಾಯಲ್ಸ್‌ ಮತ್ತು ಗುಜರಾತ್‌ ಲಯನ್ಸ್‌ ಪರ ಆಡಿದ್ದರು.