ಬೆಂಗಳೂರಿನಲ್ಲಿ ಲಯಾನ್ ಗರ್ಜನೆ; ದಾಖಲೆಗಳು ಧೂಳೀಪಟ

ಬೆಂಗಳೂರು: ಇಲ್ಲಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಆತಿಥೇಯ ಭಾರತ ವಿರುದ್ಧ ನಡೆದ ದ್ವಿತೀಯ ಟೆಸ್ಟ್ ಪಂದ್ಯದ ಮೊದಲ ದಿನದ ಆಟದಲ್ಲೇ 50 ರನ್ ನೀಡಿ ಎಂಟು ವಿಕೆಟ್‌ಗಳನ್ನು ಕಬಳಿಸಿರುವ ಆಸ್ಟ್ರೇಲಿಯಾ ಸ್ಪಿನ್ ಮಾಂತ್ರಿಕ ನೇಥನ್ ಲಯಾನ್ ನೂತನ ವಿಶ್ವದಾಖಲೆ ಬರೆದಿದ್ದಾರೆ.

ಬೆಂಗಳೂರಿನಲ್ಲಿ ಶ್ರೇಷ್ಠ ಬೌಲಿಂಗ್ ಪ್ರದರ್ಶನ...
ಇದು ಯಾವುದೇ ಓರ್ವ ವಿದೇಶಿ ಬೌಲರ್ ಭಾರತ ನೆಲದಲ್ಲಿ ನೀಡುತ್ತಿರುವ ಶ್ರೇಷ್ಠ ಬೌಲಿಂಗ್ ಪ್ರದರ್ಶನವಾಗಿದೆ. ಇದಕ್ಕೆ ಬೆಂಗಳೂರು ಚಿನ್ನಸ್ವಾಮಿ ಮೈದಾನ ಸಾಕ್ಷಿಯಾಗಿದೆ. ಹಾಗೆಯೇ ಬೆಂಗಳೂರಿನ ಮೈದಾನದಲ್ಲಿ ಯಾವನೇ ಓರ್ವ ಬೌಲರ್ ನೀಡುತ್ತಿರುವ ಶ್ರೇಷ್ಠ ಪ್ರದರ್ಶನ ಕೂಡಾ ಇದಾಗಿದೆ.

ನೇಥನ್ ಲಯಾನ್ ಗರ್ಜನೆ ಇಂತಿತ್ತು:

ಓವರ್: 22.2
ಮೇಡನ್: 4
ರನ್: 50
ವಿಕೆಟ್: 8
ಎಕಾನಮಿ: 2.23

ಭಾರತದಲ್ಲಿ ಶ್ರೇಷ್ಠ ಪ್ರದರ್ಶನ ನೀಡಿದ ವಿದೇಶಿ ಬೌಲರ್‌ಗಳು

ನೇಥನ್ ಲಯಾನ್: 50/8 (ಆಸ್ಟ್ರೇಲಿಯಾ), ಬೆಂಗಳೂರು (4 ಮಾರ್ಚ್ 2017)
ಲ್ಯಾನ್ಸ್ ಕ್ಲೂಸ್ನರ್: 64/8 (ದ.ಆಫ್ರಿಕಾ), ಕೋಲ್ಕತ್ತಾ (27 ನವೆಂಬರ್ 1996)
ಸಿಖಂಧರ್ ಭಕ್ತ್ (ಪಾಕಿಸ್ತಾನ): 69/8, ದೆಹಲಿ (4 ಡಿಸೆಂಬರ್ 1979)
ಜೆಜೆ ಕ್ರೆಜ್ಝಾ (ಆಸ್ಟ್ರೇಲಿಯಾ): 215/8, ನಾಗ್ಪುರ (6 ನವೆಂಬರ್ 2008)
ಫಜಲ್ ಮಹಮೂದ್ (ಪಾಕಿಸ್ತಾನ): 42/7, ಲಕ್ನೋ (23 ಒಕ್ಟೋಬರ್ 1952)

ಭಾರತದಲ್ಲಿ ಐದನೇ ಶ್ರೇಷ್ಠ ಬೌಲಿಂಗ್ ಪ್ರದರ್ಶನ
ಇದು ಯಾವುದೇ ಬೌಲರ್ ಭಾರತದಲ್ಲಿ ನೀಡುತ್ತಿರುವ ಐದನೇ ಶ್ರೇಷ್ಠ ಬೌಲಿಂಗ್ ಪ್ರದರ್ಶನವಾಗಿದೆ. ಈ ಸಾಲಿನಲ್ಲಿ ಅನಿಲ್ ಕುಂಬ್ಳೆ (74ಕ್ಕೆ 10 ವಿಕೆಟ್), ಜಾಶುಬಾಯ್ ಪಟೇಲ್ (69ಕ್ಕೆ 9 ವಿಕೆಟ್), ಕಪಿಲ್ ದೇವ್ (83ಕ್ಕೆ 9 ವಿಕೆಟ್), ಸುಭಾಷ್ ಗುಪ್ತಾ (102ಕ್ಕೆ 9 ವಿಕೆಟ್) ಬಳಿಕ ಐದನೇ ಸ್ಥಾನದಲ್ಲಿ ಗುರುತಿಸಿಕೊಂಡಿದ್ದಾರೆ.

ಆಸೀಸ್‌ ಬೌಲರ್‌ನಿಂದ 6ನೇ ಶ್ರೇಷ್ಠ ಸಾಧನೆ
ಹಾಗೆಯೇ ಇದು ಟೆಸ್ಟ್ ಕ್ರಿಕೆಟ್‌ನಲ್ಲಿ ಆಸ್ಟ್ರೇಲಿಯಾ ಬೌಲರ್‌ನ ಆರನೇ ಶ್ರೇಷ್ಠ ಸಾಧೆಯಾಗಿದೆ. ನೇಥನ್ ಇಲ್ಲಿ ಅರ್ಥುರ್ ಮೈಲಿ (121/9), ಗ್ಲೆನ್ ಮೆಕ್‌ಗ್ರಾಥ್ (8/24, 8/38), ಫ್ರಾಂಕ್ ಲೇವರ್ (31/8) ಮತ್ತು ಅಲ್ಬರ್ಟ್ ಟ್ರಾಟ್ (43/8) ಬಳಿಕ ಕಾಣಿಸಿಕೊಂಡಿದ್ದಾರೆ.

ಬ್ರೆಟ್ ಲೀ ದಾಖಲೆ ಅಳಿಸಿ ಹಾಕಿದ ಲಯಾನ್...
ಅಂತೆಯೇ ಭಾರತ ವಿರುದ್ದ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ವಿಕೆಟ್ ಕಬಳಿಸಿದ ದಾಖಲೆಗೆ ನೇಥನ್ ಲಯಾನ್ (58 ವಿಕೆಟ್) ಪಾತ್ರವಾಗಿದ್ದಾರೆ. ಅವರೀಗ ಆಸೀಸ್ ಮಾಜಿ ವೇಗಿ ಬ್ರೆಟ್ ಲೀ (53 ವಿಕೆಟ್) ದಾಖಲೆಯನ್ನು ಹಿಂದಿಕ್ಕಿದ್ದಾರೆ.