ಪಾಕಿಸ್ತಾನಕ್ಕೆ 8 ವಿಕೆಟ್‌ ಭರ್ಜರಿ ಜಯ

ಜೊಹನ್ಸ್‌ಬರ್ಗ್‌: ಯುವ ಎಡಗೈ ವೇಗಿ ಉಸ್ಮಾನ್‌ ಶಿನ್ವಾರಿ (35ಕ್ಕೆ 4) ಅವರ ವೇಗದ ಅಬ್ಬರ ಮತ್ತು ಇಮಾಮ್‌ ಉಲ್‌ ಹಕ್‌ (71) ಅವರ ಜವಾಬ್ದಾರಿಯುತ ಅರ್ಧಶತಕದ ಬಲದಿಂದ ಮಿಂಚಿದ ಪಾಕಿಸ್ತಾನ ತಂಡ, ಇಲ್ಲಿ ನಡೆದ ಆತಿಥೇಯ ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿಯ 4ನೇ ಪಂದ್ಯದಲ್ಲಿ 8 ವಿಕೆಟ್‌ಗಳ ಭರ್ಜರಿ ಜಯ ದಾಖಲಿಸಿದೆ.

ಇದರೊಂದಿಗೆ 5 ಪಂದ್ಯಗಳ ಸರಣಿಯಲ್ಲಿ 2-2 ಅಂತರದ ಸಮಬಲ ತಂದುಕೊಳ್ಳುವಲ್ಲಿ ಪಾಕಿಸ್ತಾನ ತಂಡ ಯಶಸ್ವಿಯಾಗಿದ್ದು, ಸರಣಿಯ 5ನೇ ಹಾಗೂ ಅಂತಿಮ ಪಂದ್ಯ ಬುಧವಾರ ಕೇಪ್‌ಟೌನ್‌ನಲ್ಲಿ ನಡೆಯಲಿದೆ. ಜನಂಗೀಯ ನಿಂದನೆ ಹಿನ್ನೆಲೆಯಲ್ಲಿ ಪಾಕ್‌ ನಾಯಕ ಸರ್ಫರಾಜ್‌ ಅಹ್ಮದ್‌ 4 ಪಂದ್ಯಗಳ ನಿಷೇಧ ಶಿಕ್ಷೆಗೆ ಗುರಿಯಾಗಿದ್ದು, ದಕ್ಷಿಣ ಆಫ್ರಿಕಾ ಎದುರಿನ ಸರಣಿಯಿಂದ ಹೊರಗುಳಿದಿದ್ದಾರೆ. ನಾಯಕನ ಅನುಪಸ್ಥಿತಿಯಲ್ಲೂ ತಂಡ 8 ವಿಕೆಟ್‌ ಜಯ ದಾಖಲಿಸಿ ಮಿಂಚಿದೆ.

ಸಂಕ್ಷಿಪ್ತ ಸ್ಕೋರ್‌
ದಕ್ಷಿಣ ಆಫ್ರಿಕಾ: 164/10 (41).
ಪಾಕಿಸ್ತಾನ: 168/2 (31.3).