ಪಾಕಿಸ್ತಾನದ ಖ್ಯಾತ ಲೆಗ್‌ ಸ್ಪಿನ್ನರ್‌ ಅಬ್ದುಲ್‌ ಖಾದಿರ್‌ ನಿಧನ

ಲಾಹೋರ್‌: ಪಾಕಿಸ್ತಾನದ ಖ್ಯಾತ ಲೆಗ್‌ ಸ್ಪಿನ್ನರ್‌ ಅಬ್ದುಲ್‌ ಖಾದಿರ್‌ (63) ಶುಕ್ರವಾರ ಮಧ್ಯರಾತ್ರಿ ನಿಧನರಾದರು.

ಶುಕ್ರವಾರ ಮಧ್ಯರಾತ್ರಿ ಹೃದಯಾಘಾತಕ್ಕೊಳಗಾದ ಅಬ್ದುಲ್‌ ಖಾದಿರ್‌ ಅವರನ್ನು ಸರ್ವೀಸ್‌ ಆಸ್ಪತ್ರೆಗೆ ದಾಖಲಿಸಿದರೂ ಚಿಕಿತ್ಸೆ ಫಲಕಾರಿಯಾಗದೆ ಕೊನೆಯುಸಿರೆಳೆದರು ಎಂದು ಕುಟುಂಬ ಮೂಲಗಳು ತಿಳಿಸಿವೆ.

ಅಬ್ದುಲ್‌ ಖಾದಿರ್‌ಗೆ ಪತ್ನಿ, ನಾಲ್ವರು ಪುತ್ರರು, ಒಬ್ಬ ಪುತ್ರಿ ಇದ್ದಾರೆ. ಪುತ್ರಿಯನ್ನು ಪಾಕಿಸ್ತಾನದ ವಿಕೆಟ್‌ ಕೀಪರ್‌ ಬ್ಯಾಟ್ಸ್‌ಮನ್‌ ಉಮರ್ ಅಕ್ಮಲ್ ಮದುವೆಯಾಗಿದ್ದಾರೆ.

ಪಾಕಿಸ್ತಾನದ ಅತ್ಯಂತ ಖ್ಯಾತ ಸ್ಪಿನ್‌ ಬೌಲರ್‌ ಆಗಿದ್ದ ಅಬ್ದುಲ್‌ ಖಾದಿರ್‌ 1977 ರಿಂದ 1993ರವರೆಗೆ 67 ಟೆಸ್ಟ್‌ ಹಾಗೂ 104 ಏಕದಿನ ಪಂದ್ಯಗಳನ್ನಾಡಿದ್ದಾರೆ.

ಟೆಸ್ಟ್‌ ಪಂದ್ಯಗಳಲ್ಲಿ 236, ಏಕದಿನ ಪಂದ್ಯದಲ್ಲಿ 132 ವಿಕೆಟ್‌ ಪಡೆದಿದ್ದರು ಅಬ್ದುಲ್‌ ಖಾದಿರ್‌.

1977ರಲ್ಲಿ ಟೆಸ್ಟ್‌ ಕ್ರಿಕೆಟ್‌ ಪಂದ್ಯಕ್ಕೆ ಪದಾರ್ಪಣೆ ಮಾಡಿದ ಅಬ್ದುಲ್‌ ಖಾದಿರ್‌ ಪಾಕಿಸ್ತಾನದ ಪರವಾಗಿ ಅತ್ಯಂತ ಯಶಸ್ವಿ ಬೌಲರ್ ಎನಿಸಿದ್ದರು. ಅವರ ಜೀವಮಾನ ಶ್ರೇಷ್ಠ ಸಾಧನೆ ನಿಜಕ್ಕೂ ಅದ್ಭುತವಾಗಿದೆ. 9 ವಿಕೆಟ್‌ ಪಡೆದಿರುವುದು ಅಬ್ದುಲ್‌ ಖಾದಿರ್‌ ಶ್ರೇಷ್ಠ ಸಾಧನೆಯಾಗಿದೆ.

80ರ ದಶಕದಲ್ಲಿ ಖಾದಿರ್‌ ಎದುರಾಳಿಯನ್ನು ತಮ್ಮ ಫಿರ್ಕಿಗಳಿಂದ ಗಿರಕಿ ಹೊಡೆಸುತ್ತಿದ್ದಾರೆ. ಖಾದಿರ್‌ ಹಲವಾರು ಬೌಲರ್‌ಗಳಿಗೆ ಮಾಡಲ್‌ ಕೂಡ ಆಗಿದ್ದರು. ಖಾದಿರ್‌ ನಂತರ ಶೇನ್‌ ವಾರ್ನ್‌, ಅನಿಲ್‌ ಕುಂಬ್ಳೆ, ಮುಷ್ತಾಕ್‌ ಅಹಮದ್‌ ಲೆಗ್‌ ಸ್ಪಿನ್‌ ಬೌಲಿಂಗ್ ಅನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದರು.

ಸಚಿನ್‌ ತೆಂಡೂಲ್ಕರ್‌ ಪಾಕಿಸ್ತಾನ ವಿರುದ್ಧ 1989ರಲ್ಲಿ ಮೊದಲು ಆಡಿದಾಗ ಕೇವಲ 16 ವರ್ಷ. ಅಬ್ದುಲ್‌ ಖಾದಿರ್‌ ಬೌಲಿಂಗ್‌ನಲ್ಲಿ ನಾಲ್ಕು ಸಿಕ್ಸರ್‌ ಬಾರಿಸಿದ್ದರು.