ಪಾಕಿಸ್ತಾನ ಸೂಪರ್‌ ಲೀಗ್‌ನಲ್ಲಿ ಅಕ್ರಮ, ಪಿಸಿಬಿಗೆ ಭಾರಿ ನಷ್ಟ!

ಲಾಹೋರ್‌, ಸೆಪ್ಟೆಂಬರ್‌ 18: ಪಾಕಿಸ್ತಾನ ಸೂಪರ್‌ ಲೀಗ್‌ ಟಿ20 ಕ್ರಿಕೆಟ್‌ ಟೂರ್ನಿಯ ಮೊದಲ ಎರಡು ಆವೃತ್ತಿಗಳ ಆಯೋಜನೆಯಲ್ಲಿ ನಡೆದಿರುವ ಭಾರಿ ಅಕ್ರಮದಿಂದಾಗಿ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿಗೆ ಕೋಟ್ಯಂತರ ರೂ.ಗಳ ನಷ್ಟವಾಗಿದೆ.

ಪಾಕಿಸ್ತಾನ ಸೂಪರ್‌ ಲೀಗ್‌ನ ಮೊದಲ ಎರಡು ಆವೃತ್ತಿಗಳ ಆಯೋಜನೆಯ ಕುರಿತಾಗಿ ನಡೆಸಲಾದ ವಿಶೇಷ ಲೆಕ್ಕಪರಿಶೋಧನಾ ವರದಿಯಲ್ಲಿ ಪಾಕಿಸ್ತಾನದ ಆಡಿಟರ್‌ ಜನರಲ್‌ ಹಲವು ರೀತಿಯ ಹಣಕಾಸಿನ ಅಕ್ರಮಗಳನ್ನು ಪತ್ತೆ ಮಾಡಿದ್ದಾರೆ.

ಕೌಟುಂಬಿಕ ದುರಂತದ ಗುಟ್ಟನ್ನು ಪ್ರಕಟಿಸಿದ ಪತ್ರಿಕೆ ವಿರುದ್ಧ ಬೆನ್‌ ಸ್ಟೋಕ್ಸ್‌ ಕೆಂಡಾ ಮಂಡಲ!

ಲೀಗ್‌ ಜೊತೆಗೆ ವಹಿವಾಟು ಹೊಂದಿದ್ದ ಹಲವರಿಗೆ ಮುಂಗಡ ಪಾವತಿ ಮಾಡಿರುವುದು, ಪ್ರಾಂಚೈಸಿಗಳಿಗೆ ನೀಡಲಾಗಿರುವ ಅನಿಯಮಿತ ಪಾವತಿಗಳು, ಫ್ರಾಂಚೈಸಿಗಳಿಂದ ವಸೂಲಿ ಮಾಡದೇ ಉಳಿಸಿರುವ ಹಣ, ಪತ್ರಕರ್ತರು ಮತ್ತು ಕ್ರಿಕೆಟ್‌ ಮಂಡಳಿಯ ಅಧಿಕಾರಿಗಳಿಗೆ ನೀಡಲಾಗಿರುವ ಟಿಎ/ಡಿಎ ಮೊದಲಾದವುಗಳಲ್ಲಿ ಅಕ್ರಮ ನಡೆದಿರುವ ಕುರಿತಾಗಿ ಡಾವ್ನ್‌ ವರದಿ ಮಾಡಿದೆ.

ವರದಿಗಳ ಪ್ರಕಾರ, ಒಪ್ಪಂದದ ಹೊರತಾಗಿ ಫ್ರಾಂಚೈಸಿ ತಂಡಗಳಿಗೆ ಮಾಡಲಾಗಿರುವ ಅನಿಯಮಿತ ಪಾವತಿಯಿಂದಾಗಿ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿಗೆ ಬರೋಬ್ಬರಿ 25 ಕೋಟಿ ರೂ.ಗಳ ಭಾರಿ ನಷ್ಟವಾಗಿದೆ. ಪಾಕಿಸ್ತಾನದ ಸಂಸತ್ತಿನಲ್ಲಿ ಪ್ರದರ್ಶಿಸಲಾದ ವರದಿಯಲ್ಲಿ ಫ್ರಾಂಚೈಸಿ ತಂಡಗಳಿಗೆ ಪರಿಹಾರವಾಗಿ ಪಿಸಿಬಿ 5.5 ಕೋಟಿ ರೂ. ನೀಡಿದ್ದು ಜೊತೆಗೆ ಹರಾಜು ಪ್ರಕ್ರಿಯೆಯಲ್ಲಿ ನಡೆದಿರುವ ಅಕ್ರಮಗಳಿಂದಲೂ 1.1 ಕೋಟಿ ರೂ. ಮೊತ್ತದ ನಷ್ಟ ಅನುಭವಿಸಿದೆ ಎಂದು ಹೇಳಲಾಗಿದೆ.

ದಕ್ಷಿಣ ಆಫ್ರಿಕಾ 'ಎ' ವಿರುದ್ಧದ 2ನೇ ಅನಧಿಕೃತ ಟೆಸ್ಟ್‌: ಕರುಣ್‌ ನಾಯರ್‌, ಶುಭಮನ್‌ ಗಿಲ್‌ ಮಿಂಚು

ಇದೇ ವೇಳೆ ಲೆಕ್ಕಪರಿಶೋಧಕರ ಪ್ರಕಾರ ಪಿಸಿಬಿ ವಿವಿಧ ಫ್ರಾಂಚೈಸಿಗಳಿಂದ 3.2 ಕೋಟಿ ರೂ. ಹಣ ಹಿಂಪಡೆಯುವಲ್ಲಿಯೂ ವಿಫಲವಾಗಿದೆ. 2ನೇ ಆವೃತ್ತಿಯ ಪಿಎಸ್‌ಎಲ್‌ ಟೂರ್ನಿಯ ಫೈನಲ್‌ ಪಂದ್ಯ ಆಯೋಜನೆ ಒಂದರಲ್ಲೇ ಅಂದಾಜು 1.8 ಕೋಟಿ ರೂ. ಮೊತ್ತದ ಅವ್ಯವಹಾರ ನಡೆದಿದೆ ಎಂದು ತಿಳಿಸಿದೆ. ಇಷ್ಟೇ ಅಲ್ಲದೆ ವಿದೇಶಿ ಬ್ಯಾಂಕ್‌ ಖಾತೆಗಳಿಗೆ ಅನಧಿಕೃತವಾಗಿ ಪಾಕಿಸ್ತಾನ ಕ್ರಿಕೆಟ್‌ ಮಂಡಳಿಯು 10.5 ಕೋಟಿ ರೂ. ಮೊತ್ತವನ್ನು ವರ್ಗಾಯಿಸಿರುವುದು ಕೂಡ ಬಹಿರಂಗವಾಗಿದೆ.

ಟೂರ್ನಿಯ ಪ್ರಸಾರ ಹಕ್ಕನ್ನು ಹರಾಜು ಮಾಡದೇಯೂ ಪಿಸಿಬಿ 1.3 ಕೋಟಿ ರೂ. ನಷ್ಟ ಅನುಭವಿಸದೆ ಎಂದು ಲೆಕ್ಕಪರಿಶೋಧಕರು ತಮ್ಮ ವರದಿಯಲ್ಲಿ ತಿಳಿಸಿದ್ದಾರೆ.