ವಿರಳವಾಗಿ ವಿಕೆಟ್ ಪಡೆದಾಗ ವಿರಾಟ್ ಸಂಭ್ರಮ ಹೇಗಿದೆ ನೋಡಿ!

ಸಿಡ್ನಿ: ಕ್ರಿಕೆಟ್ ಆಸ್ಟ್ರೇಲಿಯಾ ಇಲೆವೆನ್ ವಿರುದ್ಧ ನಡೆದ ಅಭ್ಯಾಸ ಪಂದ್ಯದಲ್ಲಿ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಬೌಲಿಂಗ್ ಅಭ್ಯಾಸ ನಡೆಸಿದ್ದರಲ್ಲದೆ ವಿಕೆಟ್ ಪಡೆಯುವ ಮೂಲಕ ಗಮನ ಸೆಳೆದಿದ್ದಾರೆ.

ಭಾರತದ 358 ರನ್‌ಗಳಿಗೆ ಉತ್ತರವಾಗಿ ಆಸೀಸ್ ಹ್ಯಾರಿ ನೀಲ್ಸನ್ (100) ಶತಕದ ನೆರವಿನೊಂದಿಗೆ 544 ರನ್‌ಗಳ ಬೃಹತ್ ಮೊತ್ತ ಪೇರಿಸಿತ್ತು. ಈ ಮೂಲಕ ಮೊದಲ ಇನ್ನಿಂಗ್ಸ್‌ನಲ್ಲಿ 183 ರನ್‌ಗಳ ಬೃಹತ್ ಮುನ್ನಡೆ ದಾಖಲಿಸಿತ್ತು.

ಮೂರನೇ ಹಾಗೂ ನಾಲ್ಕನೇ ದಿನದಾಟದಲ್ಲಿ ಕೊಹ್ಲಿ ಬೌಲಿಂಗ್ ಅಭ್ಯಾಸವನ್ನು ನಡೆಸಿದ್ದರು. ಈ ಪೈಕಿ ಶತಕವೀರ ನೀಲ್ಸನ್ ವಿಕೆಟ್ ಕಬಳಿಸುವ ಮೂಲಕ ವಿರಾಟ್ ಪ್ರಭಾವಿ ಎನಿಸಿಕೊಂಡಿದ್ದರು.

ತಮ್ಮ ಕೆರಿಯರ್ ಆರಂಭದಲ್ಲಿ ಅರೆ ಕಾಲಿಕ ಬೌಲರ್ ಆಗಿ ಕೆಲಸ ನಿರ್ವಹಿಸುತ್ತಿದ್ದ ವಿರಾಟ್ ಓರ್ವ ಪರಿಪೂರ್ಣ ಬ್ಯಾಟ್ಸ್‌ಮನ್ ಆದ ಬಳಿಕ ಬೌಲಿಂಗ್ ಹವ್ಯಾಸವನ್ನು ಕೈಬಿಟ್ಟಿದ್ದರು.

ಇದೀಗ ಅತಿ ವಿರಳವೆಂಬಂತೆ ಅಭ್ಯಾಸ ಪಂದ್ಯದಲ್ಲಿ ಬೌಲಿಂಗ್ ಮಾಡುವ ಮೂಲಕ ಮಹತ್ವದ ವಿಕೆಟ್ ಪಡೆದಿದ್ದರು. ಇದು ಸ್ವತಃ ವಿರಾಟ್ ಕೊಹ್ಲಿಗೆ ನಂಬಲು ಸಾಧ್ಯವಾಗಲಿಲ್ಲ. ಈ ಕಾರಣಕ್ಕಾಗಿ ವಿಶಿಷ್ಟ ರೀತಿಯಲ್ಲಿ ಸಂಭ್ರಮಾಚರಿಸಿಕೊಂಡಿದ್ದಾರೆ.

ಅಂತಿಮವಾಗಿ ಏಳು ಓವರ್‌ಗಳನ್ನು ಎಸೆದಿದ್ದ ವಿರಾಟ್ 27 ರನ್ ತೆತ್ತು ಒಂದು ವಿಕೆಟ್ ಕಬಳಿಸಿದ್ದರು.