Prithvi Shaw: ಪೃಥ್ವಿ ಡೆಬ್ಯು - ಕರ್ನಾಟಕದ ಮಯಾಂಕ್‌ಗಿಲ್ಲ ಅವಕಾಶ!

ರಾಜ್‌ಕೋಟ್: ಆಸ್ಟ್ರೇಲಿಯಾ ಹಾಗೂ ಇಂಗ್ಲೆಂಡ್ ತಂಡಗಳು ಟೆಸ್ಟ್ ಆರಂಭದ ಹಿಂದಿನ ದಿನವೇ ಆಡುವ ಬಳಗವನ್ನು ಪ್ರಕಟಿಸುತ್ತಿದೆ. ಇದೀಗ ವೆಸ್ಟ್‌ಇಂಡೀಸ್ ವಿರುದ್ಧದ ಮೊದಲ ಟೆಸ್ಟ್‌ಗೂ ಮುನ್ನ ಇದೇ ಹಾದಿ ಅನುಸರಿಸಿರುವ ಟೀಮ್ ಇಂಡಿಯಾ ವ್ಯವಸ್ಥಾಪಕ ಮಂಡಳಿಯು, 12 ಮಂದಿಯ ಸದಸ್ಯರನ್ನು ಹೆಸರಿಸಿದೆ.

ಇದರೊಂದಿಗೆ ರಾಜ್‌ಕೋಟ್‌ನಲ್ಲಿ ಅಕ್ಟೋಬರ್ 04ರಂದು ಆರಂಭವಾಗಲಿರುವ ಮೊದಲ ಟೆಸ್ಟ್ ಪಂದ್ಯದಲ್ಲಿ ಕರ್ನಾಟಕದ ಕೆಎಲ್ ರಾಹುಲ್ ಜೊತೆಗೆ ಮುಂಬಯಿಯ ಯುವ ಸೆನ್ಸೇಷನಲ್ ಬ್ಯಾಟ್ಸ್‌ಮನ್ ಪೃಥ್ವಿ ಶಾ ಇನ್ನಿಂಗ್ಸ್ ಆರಂಭಿಸುವುದು ಬಹುತೇಕ ಖಚಿತವಾಗಿದೆ.

ಈ ಮೊದಲು ಇಂಗ್ಲೆಂಡ್ ವಿರುದ್ಧದ ಕೊನೆಯ ಎರಡು ಟೆಸ್ಟ್ ಪಂದ್ಯಗಳಿಗೂ ಆಯ್ಕೆಗೊಂಡಿರುವ ಪೃಥ್ವಿಗೆ ಆಡುವ ಅವಕಾಶ ಸಿಕ್ಕಿರಲಿಲ್ಲ. ಇದೀಗ ವಿಂಡೀಸ್ ವಿರುದ್ಧ ಪದಾರ್ಪಣೆ ಮಾಡುವುದು ನಿಚ್ಚಳವೆನಿಸಿದೆ.

ಅತ್ತ ಕೊನೆಗೂ ದೀರ್ಘ ಅವಧಿಯ ಬಳಿಕ ತಂಡಕ್ಕೆ ಸೇರಿಕೊಂಡಿರುವ ಮಯಾಂಕ್ ಅಗರ್ವಾಲ್ ಆಡುವ ಅವಕಾಶದಿಂದ ವಂಚಿತರಾಗಲಿದ್ದಾರೆ. ಇದು ಕನ್ನಡ ಅಭಿಮಾನಿಗಳಲ್ಲಿ ನಿರಾಸೆಗೆ ಕಾರಣವಾಗಿದೆ.

ಇಬ್ಬರು ವೇಗಿಗಳು ಸೇರಿದಂತೆ ಐವರು ಸ್ಪೆಷಲಿಷ್ಟ್ ಬೌಲರ್‌ಗಳೊಂದಿಗೆ ಭಾರತ ಕಣಕ್ಕಿಳಿಯಲಿದೆ. ಇದರೊಂದಿಗೆ ಶಾರ್ದೂಲ್ ಠಾಕೂರ್ ಸಹ ಅವಕಾಶ ವಂಚಿತರಾಗಲಿದ್ದಾರೆ.

ಮೊಹಮ್ಮದ್ ಶಮಿ, ಉಮೇಶ್ ಯಾದವ್ ಜೊತೆಗೆ ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜಾ ಹಾಗೂ ಕುಲ್‌ದೀಪ್ ಯಾದವ್ ಬೌಲಿಂಗ್ ಅಸ್ತ್ರವಾಗಲಿದ್ದಾರೆ.

ಇಂಗ್ಲೆಂಡ್ ವಿರುದ್ದ ಡೆಬ್ಯು ಪಂದ್ಯದಲ್ಲೇ ಅರ್ಧಶತಕ (56) ಹಾಗೂ ಮೂರು ವಿಕೆಟುಗಳನ್ನು ಕಬಳಿಸಿ ಮಿಂಚಿರುವ ಹನುಮ ವಿಹಾರಿ ಸಹ ಅವಕಾಶ ವಂಚಿತರಾಗಲಿದ್ದಾರೆ.

ಆಂಗ್ಲರ ನಾಡಿನಲ್ಲಿ ಚೊಚ್ಚಲ ಶತಕ ಬಾರಿಸಿರುವ ವಿಕೆಟ್ ಕೀಪರ್ ರಿಷಬ್ ಪಂತ್ ತಮ್ಮ ಸ್ಥಾನವನ್ನು ಭದ್ರವಾಗಿರಿಸಿದ್ದಾರೆ. ಇನ್ನು ಅಗ್ರ ಕ್ರಮಾಂಕದಲ್ಲಿ ನಾಯಕ ವಿರಾಟ್ ಕೊಹ್ಲಿ ಜೊತೆಗೆ ಚೇತೇಶ್ವರ ಪೂಜಾರ ಹಾಗೂ ಅಂಜಿಕ್ಯ ರಹಾನೆ ಇದ್ದಾರೆ.