Rahul Dravid: ರಹಾನೆ ಬ್ಯಾಟ್‌ನಲ್ಲಿದೆ ದ್ರಾವಿಡ್ ವಿಶೇಷ ಸಂದೇಶ

ಆಡಿಲೇಡ್: 'ದಿ ವಾಲ್' ಖ್ಯಾತಿಯ ಭಾರತದ ಮಾಜಿ ದಿಗ್ಗಜ ರಾಹುಲ್ ದ್ರಾವಿಡ್ ದೇಶದ ಹಲವಾರು ಯುವ ಕ್ರಿಕೆಟಿಗರಿಗೆ ಮಾದರಿಯಾಗಿದ್ದಾರೆ.

ತಮ್ಮ ಸುದೀರ್ಘ ವೃತ್ತಿ ಜೀವನದಲ್ಲಿ ವಿವಾದದಿಂದ ಹೊರತಾಗಿರುವ ದ್ರಾವಿಡ್ ಮೈದಾನದ ಒಳಗೂ ಹೊರಗೂ ಅತ್ಯುತ್ತಮ ವ್ಯಕ್ತಿತ್ವವನ್ನು ಕಾಪಾಡಿಕೊಂಡಿದ್ದಾರೆ. ಅಲ್ಲದೆ ಟೀಕೆಗಳಿಗೆಲ್ಲ ತಮ್ಮ ಬ್ಯಾಟ್ ಮೂಲಕವೇ ಉತ್ತರ ನೀಡಿದ್ದಾರೆ.

ಟೀಮ್ ಇಂಡಿಯಾ ಉಪನಾಯಕ ಅಜಿಂಕ್ಯ ರಹಾನೆ ಕೂಡಾ ಮಾಜಿ ದಿಗ್ಗಜ ರಾಹುಲ್ ದ್ರಾವಿಡ್ ಅಭಿಮಾನಿಯಾಗಿದ್ದಾರೆ. ಇದೇ ಕಾರಣಕ್ಕಾಗಿ ದ್ರಾವಿಡ್ ಹಸ್ತಾಕ್ಷರ ಮಾಡಿರುವ ವಿಶೇಷ ಬ್ಯಾಟ್‌ನೊಂದಿಗೆ ಬ್ಯಾಟಿಂಗ್ ನಡೆಸಿದ್ದಾರೆ.

ಆಸ್ಟ್ರೇಲಿಯಾ ವಿರುದ್ಧ ಆಡಿಲೇ‌ಡ್‌ನಲ್ಲಿ ನಡೆದ ಪಂದ್ಯದಲ್ಲಿ ದ್ರಾವಿಡ್ ಸಹಿ ಮಾಡಿರುವ ಬ್ಯಾಟ್‌ನೊಂದಿಗೆ ರಹಾನೆ ಕ್ರೀಸಿಗಿಳಿದಿದ್ದರು. ಇದರಲ್ಲಿ 'ಬೆಸ್ಟ್ ವಿಷಸ್' ಎಂಬ ಸಂದೇಶವನ್ನು ಬರೆಯಲಾಗಿದೆ.

ಈ ಹಿಂದೆ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ರಾಜಸ್ತಾನ ರಾಯಲ್ಸ್ ಪರ ಆಡುತ್ತಿರುವಾಗ ರಾಹುಲ್ ದ್ರಾವಿಡ್ ಜತೆ ಡ್ರೆಸ್ಸಿಂಗ್ ಕೊಠಡಿ ಹಂಚಿಕೊಳ್ಳಲು ರಹಾನೆಗೆ ಸಾಧ್ಯವಾಗಿತ್ತು. ಅಲ್ಲದೆ ಬ್ಯಾಟಿಂಗ್ ತಂತ್ರಗಾರಿಕೆ ಹಾಗೂ ಕೌಶಲ್ಯ ವೃದ್ಧಿಯಲ್ಲಿ ದ್ರಾವಿಡ್ ಗಮನಾರ್ಹ ಪಾತ್ರ ನಿರ್ವಹಿಸಿದ್ದರು.

ಈ ನಡುವೆ 13 ರನ್ ಗಳಿಸಿ ಮಾತ್ರ ವಿಕೆಟ್ ಒಪ್ಪಿಸಿದ ರಹಾನೆ ನಿರಾಸೆ ಅನುಭವಿಸಿದ್ದರು.