ಜ್ವರದಿಂದ ಬಳಲಿದ್ದರೂ ರಣಜಿಯಲ್ಲಿ ದಾಖಲೆಯ ತ್ರಿಶತಕ ಬಾರಿಸಿದ ಸರ್ಫರಾಝ್‌ ಖಾನ್‌!

ಮುಂಬೈ: ಉತ್ತರ ಪ್ರದೇಶ ವಿರುದ್ಧದ ಪ್ರಸಕ್ತ ಸಾಲಿನ ರಣಜಿ ಟ್ರೋಫಿ ಕ್ರಿಕೆಟ್‌ ಟೂರ್ನಿಯ ಎಲೈಟ್‌ 'ಬಿ' ಗುಂಪಿನ ಪಂದ್ಯದಲ್ಲಿ ಮುಂಬೈ ತಂಡದ ಪರ ಯುವ ಬ್ಯಾಟ್ಸ್‌ಮನ್‌ ಸರ್ಫರಾಝ್‌ ಖಾನ್‌ ಚೊಚ್ಚಲ ತ್ರಿಶತಕ ಬಾರಿಸಿ ಎಲ್ಲರ ಗಮನ ಸೆಳೆದಿದ್ದಾರೆ.

ಐಪಿಎಲ್‌ನಲ್ಲಿ ಆರ್‌ಸಿಬಿ ತಂಡದ ಪರ ಆಡುವ ಮೂಲಕ ಪ್ರಖ್ಯಾತಿ ಪಡೆದಿದ್ 22 ವರ್ಷದ ಯುವ ಪ್ರತಿಭೆ ಸರ್ಫರಾಝ್‌ ಖಾನ್‌, 2 ದಿನಗಳ ಹಿಂದ ಜ್ವರದಿಂದ ಬಳಲಿದ್ದರೂ ಕೂಡ ತಂಡಕ್ಕೆ ಅಗತ್ಯವಿದ್ದ ಸಂದರ್ಭದಲ್ಲಿ ಬಲವಾಗಿ ನಿಂತು ಅದ್ಭುತ ಇನಿಂಗ್ಸ್‌ ಆಡಿದ್ದಾರೆ. ಈ ಮೂಲಕ ಮುಂಬೈ ಪರ ಪ್ರಥಮದರ್ಜೆ ಕ್ರಿಕೆಟ್‌ ನಲ್ಲಿ ತ್ರಿಶತಕ ಬಾರಿಸಿದ ಎಲೈಟ್‌ ಆಟಗಾರರ ಪಟ್ಟಿಗೆ ಸೇರ್ಪಡೆಯಾಗಿದ್ದಾರೆ.

ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ್ದ ಉತ್ತರ ಪ್ರದೇಶ ತಂಡ ವಿಕೆಟ್‌ ಕೀಪರ್‌ ಉಪೇಂದ್ರ ಯಾದವ್‌ (203) ಗಳಿಸಿದ ದ್ವಿಶತಕದ ಬಲದಿಂದ 625/8 ರನ್‌ಗಳ ಬೃಹತ್‌ ಮೊತ್ತ ದಾಖಲಿಸಿ ಸುಸ್ಥಿತಿಯಲ್ಲಿತ್ತು. ಬಳಿಕ 4 ದಿನಗಳ ಪಂದ್ಯದ 3ನೇ ದಿನದಾಟದ ಅಂತ್ಯಕ್ಕೆ 5 ವಿಕೆಟ್‌ ನಷ್ಟದಲ್ಲಿ 353 ರನ್‌ಗಳಿಸಿ ಇನಿಂಗ್ಸ್‌ ಹಿನ್ನಡೆಯ ಭೀತಿಗೆ ಮುಂಬೈ ಸಿಲುಕಿತ್ತು.

ಟಿ20 ಕ್ರಿಕೆಟ್‌ನಲ್ಲಿ ಸಿಕ್ಸರ್‌ಗಳ ವಿಶೇಷ ದಾಖಲೆಯ ಹೊಸ್ತಿಲಲ್ಲಿ ವಿರಾಟ್‌ ಕೊಹ್ಲಿ!

ಮೂರನೇ ದಿನದಾಟದ ಅಂತ್ಯಕ್ಕೆ ಅಜೇಯ 132 ರನ್‌ ಗಳಿಸಿದ್ದ ಸರ್ಫರಾಜ್‌, ಪಂದ್ಯದ 4ನೇ ಹಾಗೂ ಅಂತಿಮ ದಿನವಾದ ಬುಧವಾರ ನಾಯಕ ಆದಿತ್ಯ ತಾರೆ (97) ಅವರೊಟ್ಟಿಗೆ ಭರ್ಜರಿ ಬ್ಯಾಟಿಂಗ್‌ ನಡೆಸಿ ಯುಪಿ ಬೌಲರ್‌ಗಳನ್ನು ಬೆಂಡೆತ್ತಿದರು. 391 ಎಸೆತಗಳನ್ನು ಎದುರಿಸಿದ ಖಾನ್‌, 30 ಫೋರ್‌ ಮತ್ತು 8 ಸಿಕ್ಸರ್‌ಗಳೊಂದಿಗೆ ಪ್ರಥಮದರ್ಜೆ ಕ್ರಿಕೆಟ್‌ನಲ್ಲಿ ತಮ್ಮ ಚೊಚ್ಚಲ ತ್ರಿಶತಕ ಬಾರಿಸಿದರು. ಇದಕ್ಕಾಗಿ ಜ್ವರವನ್ನೂ ಲೆಕ್ಕಿಸದೆ ಬರೋಬ್ಬರಿ 633 ನಿಮಿಷಗಳ ಕಾಲ ಅವರು ಕ್ರೀಸ್‌ನಲ್ಲಿ ಕಾಲ ಕಳೆದರು.

ಆಕ್ಲೆಂಡ್‌ನಲ್ಲಿ ಕಿವೀಸ್‌ ವಿರುದ್ಧ ಮೊದಲ ಟಿ20: ಕುತೂಹಲ ಕೆರಳಿಸಿದ ಟೀಮ್‌ ಇಂಡಿಯಾದ ಸಂಭಾವ್ಯ XI

ಗವಾಸ್ಕರ್‌, ರೋಹಿತ್‌ ಸಾಲಿಗೆ ಸರ್ಫರಾಝ್‌!
ಸರ್ಫರಾಝ್‌ ಖಾನ್‌ ತಮ್ಮ ಈ ಸ್ಫೋಟಕ ಬ್ಯಾಟಿಂಗ್‌ ಮೂಲಕ, ಪ್ರಥಮದರ್ಜೆ ಕ್ರಿಕೆಟ್‌ನಲ್ಲಿ ಮುಂಬೈ ಪರ ತ್ರಿಶತಕ ಬಾರಿಸಿದ 7ನೇ ಆಟಗಾರ ಎಂ<ಬ ದಾಖಲೆ ಬರೆದಿದ್ದಾರೆ. ಈ ಮೂಲಕ ವಸೀಂ ಜಾಫರ್‌ (301 ಮತ್ತು 314*), ರೋಹಿತ್‌ ಶರ್ಮಾ (309*), ಅಜಿತ್‌ ವಾಡೇಕರ್‌ (323), ಸುನಿಲ್‌ ಗವಾಸ್ಕರ್‌ (340), ವಿಜಯ್‌ ಮರ್ಚೆಂಟ್‌ (359*) ಹಾಗೂ ಸಂಜಯ್‌ ಮಾಂಜ್ರೇಕರ್‌ (377) ಅವರಂತಹ ದಿಗ್ಗಜರಿರುವ ಎಲೈಟ್‌ ಪಟ್ಟಿಗೆ ಸೇರಿದ್ದಾರೆ.

ಸಂಕ್ಷಿಪ್ತ ಸ್ಕೋರ್‌
ಉತ್ತರ ಪ್ರದೇಶ: ಮೊದಲ ಇನಿಂಗ್ಸ್‌ನಲ್ಲಿ 625/8 ಡಿ.
ಮುಂಬೈ: ಮೊದಲ ಇನಿಂಗ್ಸ್‌ 166.3 ಓವರ್‌ಗಳಲ್ಲಿ 688/7 ಡಿ. (ಸರ್ಫರಾಝ್‌ ಖಾನ್‌ ಅಜೇಯ 301, ಸಿದ್ದೇಶ್‌ ಲಾಡ್‌ 98; ಅಂಕಿತ್‌ ರಜಪೂತ್ 133ಕ್ಕೆ 3).
ಇನಿಂಗ್ಸ್‌ ಮುನ್ನಡೆ ಪಡೆದ ಮುಂಬೈಗೆ 3 ಅಂಕ, ಉತ್ತರ ಪ್ರದೇಶಕ್ಕೆ 1 ಅಂಕ.