ಬೆಂಗಳೂರು: ಮುಂಬರುವ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌(ಐಪಿಎಲ್‌)ನಲ್ಲಿ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ತಂಡವನ್ನು ಅನುಭವಿ ಆಲ್‌ರೌಂಡರ್‌ ರವಿಚಂದ್ರನ್‌ ಅಶ್ವಿನ್‌ ಮುನ್ನಡೆಸಲಿದ್ದಾರೆ.
ಫೇಸ್‌ಬುಕ್‌ ಲೈವ್‌ನಲ್ಲಿ ಕಿಂಗ್ಸ್‌ ಇಲೆವೆನ್‌ ತಂಡದ ಮಾರ್ದದರ್ಶಕ ವೀರೇಂದ್ರ ಸೆಹ್ವಾಗ್‌ ಈ ವಿಚಾರವನ್ನು ಬಹಿರಂಗ ಪಡಿಸಿದ್ದಾರೆ.
ಕಳೆದ ತಿಂಗಳು ಬೆಂಗಳೂರಿನಲ್ಲಿ ನಡೆದ ಐಪಿಎಲ್‌ ಆಟಗಾರರ ಹರಾಜಿನಲ್ಲಿ ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ಫ್ರಾಂಚೈಸಿ ಅಶ್ವಿನ್‌ ಅವರನ್ನು 7.6 ಕೋಟಿ ರೂ.ಗಳಿಗೆ ಖರೀದಿಸಿತ್ತು. ಪಂಜಾಬ್‌ ತಂಡದ ನಾಯಕರಾಗಿ ಆಯ್ಕೆಯಾಗಿರುವ ಕುರಿತು ಫ್ರಾಂಚೈಸಿಯ ಅಧಿಕೃತ ವೆಬ್‌ಸೈಟ್‌ಗೆ ಪ್ರತಿಕ್ರಿಯಿಸಿರುವ ಅಶ್ವಿನ್‌, 'ಪ್ರತಿಭಾನ್ವಿತ ಆಟಗಾರರನ್ನೊಳಗೊಂಡ ತಂಡವನ್ನು ಮುನ್ನಡೆಸುವ ಜವಾಬ್ದಾರಿಯನ್ನು ನೀಡಿರುವುದು ದೊಡ್ಡ ಗೌರವ. ಆಟಗಾರರಿಂದ ಉತ್ತಮ ಪ್ರದರ್ಶನವನ್ನು ಹೊರ ತೆಗೆಯುವ ನಂಬಿಕೆಯಿದೆ. ಇದು ನನ್ನ ಪಾಲಿಗೆ ಹೆಮ್ಮೆಯ ಕ್ಷಣ,' ಎಂದಿದ್ದಾರೆ.
'ನಾಯಕನಾಗಿ ಆಯ್ಕೆಯಾಗಿರುವುದರಿಂದ ಹೆಚ್ಚುವರಿ ಒತ್ತಡವೇನು ನನ್ನ ಮೇಲಿಲ್ಲ. ಪ್ರಥಮದರ್ಜೆ ಕ್ರಿಕೆಟ್‌ನಲ್ಲಿ 21 ವರ್ಷದವನಿದ್ದಾಗಲೇ ನನ್ನ ರಾಜ್ಯ ತಂಡವನ್ನು ಮುನ್ನಡೆಸಿದ್ದೆ. ಈ ಸವಾಲನ್ನು ಆನಂದಿಸಲಿದ್ದೇನೆ,' ಎಂದು ಅಶ್ವಿನ್‌ ತಿಳಿಸಿದ್ದಾರೆ.
ಅಶ್ವಿನ್‌ಗೆ ನಾಯಕತ್ವ ನೀಡಿರುವುದರ ಬಗ್ಗೆ ಮಾತನಾಡಿರುವ ಸೆಹ್ವಾಗ್‌, 'ತಂಡಕ್ಕೆ ಯುವರಾಜ್‌ ಸಿಂಗ್‌ ಅವರನ್ನು ನಾಯಕರನ್ನಾಗಿ ನೇಮಿಸುವ ಕುರಿತು ಚರ್ಚೆ ನಡೆದಿತ್ತು. ಯುವಿ ನನ್ನ ಉತ್ತಮ ಸ್ನೇಹಿತ. ಆದರೆ ಕ್ರಿಕೆಟ್‌ ವ್ಯವಹಾರಗಳಲ್ಲಿ ಸ್ನೇಹವನ್ನು ಪಕ್ಕಕ್ಕಿಡಬೇಕು. ನಮಗೆ ಅಶ್ವಿನ್‌ ಉತ್ತಮ ನಾಯಕನಾಗಬಲ್ಲ ಎಂದು ಅನ್ನಿಸಿದ್ದರಿಂದ ಅವರಿಗೆ ಈ ಜವಾಬ್ದಾರಿ ನೀಡಲಾಗಿದೆ,' ಎಂದಿದ್ದಾರೆ.
ಐಪಿಎಲ್‌ನ 11ನೇ ಆವೃತ್ತಿ ಏ.7ರಂದು ಆರಂಭವಾಗಲಿದ್ದು, ಕಿಂಗ್ಸ್‌ ಇಲೆವೆನ್‌ ಪಂಜಾಬ್‌ ತಂಡ ತನ್ನ ಮೊದಲ ಪಂದ್ಯದಲ್ಲಿ ಏ.8ರಂದು ಡೆಲ್ಲಿ ಡೇರ್‌ ಡೆವಿಲ್ಸ್‌ ತಂಡವನ್ನು ಎದುರಿಸಲಿದೆ.