ಬರ್ತ್ ಡೇ ಬಾಯ್ ಜಡೇಜಾ 'ನೊ ಬಾಲ್' ಎಡವಟ್ಟು

ಹೊಸದಿಲ್ಲಿ: ಪ್ರವಾಸಿ ಶ್ರೀಲಂಕಾ ವಿರುದ್ಧ ನಡೆದಿರುವ ಮೂರನೇ ಟೆಸ್ಟ್ ಪಂದ್ಯ ಡ್ರಾದಲ್ಲಿ ಅಂತ್ಯಗೊಂಡಿದೆ. ಹಾಗಿದ್ದರೂ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 1-0 ಅಂತರದಲ್ಲಿ ಗೆದ್ದುಕೊಂಡಿದೆ.

ಕೊನೆಯ ದಿನದಾಟದಲ್ಲಿ ಏಳು ವಿಕೆಟ್ ಮಾತ್ರ ಬಾಕಿ ಉಳಿದಿರುವಂತೆಯೇ ಲಂಕಾ ಗೆಲುವಿಗೆ 379 ರನ್‌ಗಳ ಅಗತ್ಯವಿತ್ತು. ಇದರಿಂದಾಗಿ ವಿಶ್ವ ಶ್ರೇಷ್ಠ ಬೌಲಿಂಗ್ ಪಡೆಯನ್ನು ಹೊಂದಿರುವ ಭಾರತ ಗೆಲ್ಲುವುದು ಬಹುತೇಕ ಖಚಿತವೆನಿಸಿತ್ತು.

ಆದರೆ ಸಮಯೋಚಿತ ಶತಕ ಬಾರಿಸಿದ (119) ಧನಂಜಯ ಡಿಸಿಲ್ವ ತಂಡವನ್ನು ಮಗದೊಂದು ಸೋಲಿನ ಆಘಾತದಿಂದ ಪಾರು ಮಾಡಿದ್ದರು.

ದಿನದ ಆರಂಭದಲ್ಲೇ ಅನುಭವಿ ಆ್ಯಂಗಲೋ ಮ್ಯಾಥ್ಯೂಸ್ (1) ವಿಕೆಟ್ ಪಡೆದ ಭಾರತ ಗೆಲುವಿನತ್ತ ಮುನ್ನಡೆದಿತ್ತು. ಆದರೆ ಐದನೇ ವಿಕೆಟ್‌ಗೆ ನಾಯಕ ದಿನೇಶ್ ಚಂದಿಮಾಲ್ ಜತೆಗೂಡಿದ ಧನಂಜಯ 112 ರನ್‌ಗಳ ಮಹತ್ವದ ಜತೆಯಾಟ ನೀಡಿದ್ದರು.

ಇದು ಮ್ಯಾಚ್ ಟರ್ನಿಂಗ್ ಪಾಯಿಂಟ್‌ಗೆ ಕಾರಣವಾಗಿತ್ತು. ಈ ನಡುವೆ ಊಟದ ವಿರಾಮಕ್ಕೂ ಮುನ್ನವೇ ಚಂದಿಮಾಲ್ ಕ್ಲೀನ್ ಬೌಲ್ಡ್ ಮಾಡುವಲ್ಲಿ ಭಾರತೀಯ ಸ್ಪಿನ್ನರ್ ರವೀಂದ್ರ ಜಡೇಜಾ ಯಶಸ್ವಿಯಾಗಿದ್ದರು.

ಆದರೆ ವಿವಾದಾತ್ಮಕ ತೀರ್ಪಿನಲ್ಲಿ ಮೂರನೇ ಅಂಪೈರ್ ನಾಟೌಟ್ ಘೋಷಿಸಿದ್ದರು. ಇದರಿಂದಾಗಿ ಟೀಮ್ ಇಂಡಿಯಾ ಮಗದೊಂದು ನೊ ಬಾಲ್ ಎಡವಟ್ಟನ್ನು ಮಾಡಿತ್ತು.

ಹಾಗಿದ್ದರೂ ತಮ್ಮ 29ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿರುವ ಜಡೇಜಾ, ಮೂರು ವಿಕೆಟ್‌ಗಳನ್ನು ಪಡೆಯುವ ಮೂಲಕ ಮಿಂಚಿದ್ದರು.