MS Dhoni: ಆಸೀಸ್ ನೆಲದಲ್ಲಿ ಧೋನಿ ದಾಖಲೆ ಮುರಿದ ಪಂತ್

ಆಡಿಲೇಡ್: ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ನಡೆಯುತ್ತಿರುವ ಪ್ರಥಮ ಟೆಸ್ಟ್ ಪಂದ್ಯದಲ್ಲಿ ಟೀಮ್ ಇಂಡಿಯಾ ಉದಯೋನ್ಮುಖ ವಿಕೆಟ್ ಕೀಪರ್ ರಿಷಬ್ ಪಂತ್ ವಿಶಿಷ್ಟ ದಾಖಲೆಯೊಂದನ್ನು ಬರೆದಿದ್ದಾರೆ.

ಆಸ್ಟ್ರೇಲಿಯಾ ವಿರುದ್ಧ ಮೊದಲ ಇನ್ನಿಂಗ್ಸ್‌ನಲ್ಲಿ ಆರು ಕ್ಯಾಚ್‌ಗಳನ್ನು ಹಿಡಿದಿರುವ ಪಂತ್, ಮಾಜಿ ನಾಯಕ ಹಾಗೂ ವಿಕೆಟ್ ಕೀಪರ್ ಮಹೇಂದ್ರ ಸಿಂಗ್ ಧೋನಿ ಅವರ ದಾಖಲೆಯನ್ನೇ ಮೀರಿ ನಿಂತಿದ್ದಾರೆ.

ಪಂತ್ ಇದೀಗ ಆಸೀಸ್ ನೆಲದಲ್ಲಿ ಅತಿ ಹೆಚ್ಚು ಬಲಿ ಪಡೆದುಕೊಂಡ ವಿಕೆಟ್ ಕೀಪರ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದಾರೆ. ಮಹೇಂದ್ರ ಸಿಂಗ್ ಧೋನಿ ಎರಡು ಬಾರಿ ಐದು ಮಂದಿ ಔಟ್ ಮಾಡುವಲ್ಲಿ ನೆರವಾಗಿದ್ದರು. 2008ರ ಪರ್ತ್ (5 ಕ್ಯಾಚ್) ಹಾಗೂ 2014ರ ಮೆಲ್ಬೋರ್ನ್ ಟೆಸ್ಟ್ (4 ಕ್ಯಾಚ್, 1 ಸ್ಟಂಪ್) ಪಂದ್ಯದಲ್ಲಿ ತಲಾ ಐದು ಬಲಿ ಪಡೆದಿದ್ದರು.

ಇದೀಗ ಆಡಿಲೇಡ್ ಪಂದ್ಯದಲ್ಲಿ ಪಂತ್ ಆರು ಕ್ಯಾಚ್ ಹಿಡಿಯುವ ಮೂಲಕ ಧೋನಿ ದಾಖಲೆ ಮುರಿದಿದ್ದಾರೆ. ಉಸ್ಮಾನ್ ಖವಾಜಾ, ಪೀಟರ್ ಹ್ಯಾಂಡ್ಸ್‌ಕಾಂಬ್, ಟ್ರಾವಿಸ್ ಹೆಡ್, ಟಿಮ ಪೈನ್, ಮಿಚೆಲ್ ಸ್ಟಾರ್ಕ್ ಹಾಗೂ ಜೋಶ್ ಹೇಜಲ್‌ವುಡ್ ಕ್ಯಾಚ್‌ಗಳನ್ನು ಪಂತ್ ತೆಕ್ಕೆಗೆ ಸೇರಿಸಿದ್ದರು.

ಅಷ್ಟೇ ಯಾಕೆ ಟೆಸ್ಟ್ ಕ್ರಿಕೆಟ್‌ನ ಇನ್ನಿಂಗ್ಸ್‌ವೊಂದರಲ್ಲಿ ಅತಿ ಹೆಚ್ಚು ಬಲಿ ಪಡೆದಿರುವ ಭಾರತೀಯ ವಿಕೆಟ್ ಕೀಪರ್‌ಗಳ ಸಾಲಿನಲ್ಲಿ ಮಾಜಿಗಳಾದ ಸಯ್ಯದ್ ಕೀರ್ಮಾನಿ ಹಾಗೂ ಧೋನಿ ದಾಖಲೆಯನ್ನು ಪಂತ್ ಸರಿಗಟ್ಟಿದ್ದಾರೆ.