ಪರ್ತ್ ಟೆಸ್ಟ್‌ನಿಂದ ರೋಹಿತ್‌ಗೆ ಕೊಕ್ ಸಾಧ್ಯತೆ

ಪರ್ತ್: ದೀರ್ಘ ಸಮಯದ ಬಳಿಕವೂ ಟೆಸ್ಟ್ ತಂಡವನ್ನು ಸೇರಿಕೊಂಡರೂ ಆಡಿಲೇಡ್‌ನಲ್ಲಿ ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ನಡೆದ ಮೊದಲ ಟೆಸ್ಟ್ ಪಂದ್ಯದಲ್ಲಿ ವೈಫಲ್ಯ ಅನುಭವಿಸಿರುವ ಟೀಮ್ ಇಂಡಿಯಾ ಬ್ಯಾಟ್ಸ್‌ಮನ್ ರೋಹಿತ್ ಶರ್ಮಾ ಅವರನ್ನು ತಂಡದಿಂದ ಕೈಬಿಡುವ ಸಾಧ್ಯತೆಗಳಿವೆ.

ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಣ ದ್ವಿತೀಯ ಟೆಸ್ಟ್ ಪಂದ್ಯ ಡಿಸೆಂಬರ್ 14 ಶುಕ್ರವಾರದಂದು ಪರ್ತ್ ಮೈದಾನದಲ್ಲಿ ಆರಂಭವಾಗಲಿದೆ.

ಈ ಮೊದಲು ಆಡಿಲೇಡ್ ಪಂದ್ಯದಲ್ಲಿ 31 ರನ್ ಅಂತರದ ಗೆಲುವು ದಾಖಲಿಸಿದ ಟೀಮ್ ಇಂಡಿಯಾ ಇತಿಹಾಸ ರಚಿಸಿತ್ತು. ಆದರೆ ಪಂದ್ಯದ ಎರಡೂ ಇನ್ನಿಂಗ್ಸ್‌ನಲ್ಲಿ ರೋಹಿತ್ ಅನುಕ್ರಮವಾಗಿ 37 ಹಾಗೂ 1 ರನ್‌ಗಳನ್ನಷ್ಟೇ ಗಳಿಸಿದ್ದರು.

ತಂಡದಲ್ಲಿ ಸ್ಥಾನ ಗಿಟ್ಟಿಸಲು ಅತೀವ ಪೈಪೋಟಿ ನಡೆಯುತ್ತಿರುವ ನಡುವೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಕಳಪೆ ದಾಖಲೆಯ ಹೊರತಾಗಿಯೂ ನಾಯಕ ವಿರಾಟ್ ಕೊಹ್ಲಿ ವಿಶ್ವಾಸ ಗಳಿಸಲು ರೋಹಿತ್ ಶರ್ಮಾ ಯಶಸ್ವಿಯಾಗಿದ್ದರು. ಆದರೆ ತಮಗೆ ಲಭಿಸಿದ ಅವಕಾಶದ ಸಂಪೂರ್ಣ ಪ್ರಯೋಜನ ಗಿಟ್ಟಿಸುವಲ್ಲಿ ಯಶಸ್ವಿಯಾಗಿರಲಿಲ್ಲ.

ಪ್ರಸ್ತುತ ರೋಹಿತ್‌ಗೆ ಮಗದೊಂದು ಅವಕಾಶವನ್ನು ನೀಡಲಾಗುವುದೇ ಎಂಬುದನ್ನು ಕಾದು ನೋಡಬೇಕಿದೆ. ಒಂದು ವೇಳೆ ನಾಲ್ಕು ಪ್ರಮುಖ ಬೌಲರ್‌ಗಳನ್ನು ಹೊಂದಿರುವ ಟೀಮ್ ಇಂಡಿಯಾ ಐದನೇ ಆಟಗಾರನಾಗಿ ಬೌಲಿಂಗ್ ಆಲ್‌ರೌಂಡರ್ ಹುಡುಕಾಟ ನಡೆಸಿದರೆ ರೋಹಿತ್‌ಗೆ ಕತ್ತರಿ ಪ್ರಯೋಗವಾಗಲಿದೆ.

ಆಗಲೇ ಇಂಗ್ಲೆಂಡ್ ನೆಲದಲ್ಲಿ ನಡೆದ ತಮ್ಮ ಪಾದಾರ್ಪಣಾ ಪಂದ್ಯದಲ್ಲ ಅರ್ಧಶತಕ ಹಾಗೂ ಮೂರು ವಿಕೆಟುಗಳನ್ನು ಕಿತ್ತಿರುವ ಹುನಮ ವಿಹಾರಿ ಈ ಸ್ಥಾನವನ್ನು ಪಡೆಯುವ ಸಾಧ್ಯತೆಯಿದೆ. ಇದು ಹೆಚ್ಚು ಬೌಲಿಂಗ್ ಆಯ್ಕೆಯನ್ನು ನೀಡಲಿದೆ.

ಇಂತಹದೊಂದು ಬದಲಾವಣೆ ಕಂಡುಬಂದರೆ ರೋಹಿತ್ ಟೆಸ್ಟ್ ಕೆರಿಯರ್ ಬಹುತೇಕ ಅಸ್ತಮಿಸಲಿದೆ. ಯಾಕೆಂದರೆ ಮಗದೊಂದು ಪುನರಾಗಮನ ಕಷ್ಟ ಸಾಧ್ಯವಾಗಿದೆ. ಇದುವರೆಗೆ 26 ಟೆಸ್ಟ್ ಪಂದ್ಯಗಳನ್ನಾಡಿರುವ ರೋಹಿತ್ 38.9ರ ಸರಾಸರಿಯಲ್ಲಿ 1517 ರನ್‌ಗಳನ್ನಷ್ಟೇ ಗಳಿಸಿದ್ದಾರೆ.