ಟೆಸ್ಟ್‌ನಲ್ಲಿ ರೋಹಿತ್ ಶರ್ಮಾ ವರ್ಷನ್ 2.0; ಹಿಟ್‌ಮ್ಯಾನ್ ಆಗಲಿದ್ದಾರೆಯೇ ಮಗದೊಬ್ಬ ಸೆಹ್ವಾಗ್!

ಮುಂಬಯಿ: ಟೆಸ್ಟ್ ಕ್ರಿಕೆಟ್‌ನಲ್ಲೂ ಆರಂಭಿಕನಾಗಿ ಕ್ರೀಸಿಗಿಯಲು ರೋಹಿತ್ ಶರ್ಮಾ ಸಜ್ಜಾಗಿದ್ದಾರೆ. ಆರು ವರ್ಷಗಳ ಹಿಂದೆ ಏಕದಿನದಲ್ಲಿ ಆರಂಭಿಕನಾಗಿ ಕಣಕ್ಕಿಳಿಸಲು ಮಹೇಂದ್ರ ಸಿಂಗ್ ಧೋನಿ ತೆಗೆದುಕೊಂಡ ನಿರ್ಧಾರದಿಂದ ರೋಹಿತ್ ಶರ್ಮಾ ಅದೃಷ್ಟ ಬದಲಾಗಿತ್ತು. ಇದಕ್ಕೂ ಮೊದಲು ಮಧ್ಯಮ ಕ್ರಮಾಂಕದಲ್ಲಿ ಹಲವು ಬಾರಿ ಏಳು-ಬೀಳುಗಳನ್ನು ಕಂಡಿರುವ ರೋಹಿತ್ ಏಕದಿನದಲ್ಲಿ ಆರಂಭಿಕನಾದ ಬಳಿಕ ಅನೇಕ ದಾಖಲೆಗಳನ್ನು ಪುಡಿಗಡ್ಡಿದ್ದಾರೆ.

ದ.ಆಫ್ರಿಕಾ ಸರಣಿ ರಿಷಬ್ ಪಂತ್‌ ಪಾಲಿಗೆ ಕೊನೆಯ ಚಾನ್ಸ್? ಕೋಚ್ ರವಿಶಾಸ್ತ್ರಿ ಎಚ್ಚರಿಕೆ ನೀಡಿದ್ದೇಕೆ?

ಇದೀಗ ಟೆಸ್ಟ್‌ನಲ್ಲೂ ಭಾರತ ಅದೃಷ್ಟ ಪರೀಕ್ಷೆಗಿಳಿದಿದೆ. 2007ರಲ್ಲಿ ಸೀಮಿತ ಓವರ್‌ಗಳ ಕ್ರಿಕೆಟ್‌ಗೆ ಪ್ರವೇಶಿಸಿರುವ ರೋಹಿತ್ ಚೊಚ್ಚಲ ಟೆಸ್ಟ್ ಪಂದ್ಯಕ್ಕಾಗಿ ಆರು ವರ್ಷಗಳಷ್ಟು ಕಾಲ ಕಾಯಬೇಕಾಯಿತು. ಕೊನೆಗೂ 2013ರಲ್ಲಿ ವೆಸ್ಟ್‌ಇಂಡೀಸ್ ವಿರುದ್ಧ ತಮ್ಮ ಡೆಬ್ಯು ಟೆಸ್ಟ್‌ನಲ್ಲೇ ಶತಕ ಬಾರಿಸುವ ಮೂಲಕ ತಾವು ದೀರ್ಘ ಕಾಲದ ಕ್ರಿಕೆಟ್‌ಗೂ ಸೈ ಎಂಬುದನ್ನು ಸಾಬೀತು ಮಾಡಿದ್ದರು.

ರೋಹಿತ್ ವರ್ಷನ್ 2.0
ಟೆಸ್ಟ್‌ನಲ್ಲೂ ಅಸ್ಥಿರ ಫಾರ್ಮ್‌ನಿಂದಾಗಿ ರೋಹಿತ್‌ಗೆ ಅನೇಕ ಅವಕಾಶಗಳು ಕೈತಪ್ಪಿದ್ದವು. ಇದೀಗ ಕೆಎಲ್ ರಾಹುಲ್ ಕಳಪೆ ಫಾರ್ಮ್‌ನಿಂದ ಬಳಲುತ್ತಿರುವ ಹಿನ್ನಲೆಯಲ್ಲಿ ರೋಹಿತ್‌ಗೆ ಸುವರ್ಣಾವಕಾಶವೊದಗಿ ಬಂದಿದೆ. ಇದರೊಂದಿಗೆ ಟೆಸ್ಟ್‌ನಲ್ಲೂ ರೋಹಿತ್ ಶರ್ಮಾ ವರ್ಷನ್ 2.0ಗೆ ಸಜ್ಜಾಗಿದ್ದಾರೆ.

ಟೆಸ್ಟ್‌ ಕ್ರಿಕೆಟ್‌ನಲ್ಲಿ ರೋಹಿತ್ ಸಾಧನೆಯೇನು?
ಅಷ್ಟಕ್ಕೂ ರೋಹಿತ್ ಶರ್ಮಾ ಟೆಸ್ಟ್ ಕ್ರಿಕೆಟ್‌ಗೆ ಕಾಲಿಟ್ಟು ಸರಿ ಸುಮಾರು ಆರು ವರ್ಷಗಳೇ ಸಂದಿವೆ. ಆದರೆ ಕೇವಲ 27 ಟೆಸ್ಟ್ ಪಂದ್ಯಗಳಲ್ಲಷ್ಟೇ ಭಾರತವನ್ನು ಪ್ರತಿನಿಧಿಸಿದ್ದಾರೆ. ಇದರಲ್ಲಿ ಮೂರು ಶತಕ ಹಾಗೂ 10 ಅರ್ಧಶತಕಗಳು ಒಳಗೊಂಡಿವೆ.

ಟೆಸ್ಟ್ ಕೆರಿಯರ್:
ಪಂದ್ಯ: 27
ಇನ್ನಿಂಗ್ಸ್: 47
ರನ್: 1585
ಗರಿಷ್ಠ: 177
ಸರಾಸರಿ: 39.62
ಶತಕ: 3
ಅರ್ಧಶತಕ: 10
ವಿಕೆಟ್: 2

21ನೇ ಶತಮಾನದ ಶ್ರೇಷ್ಠ ಬ್ಯಾಟ್ಸ್‌ಮನ್ ಎಂಬುದನ್ನು ನಿರೂಪಿಸಿದ ಸ್ಟೀವ್ ಸ್ಮಿತ್

ಮಗದೊಬ್ಬ ವೀರೇಂದ್ರ ಸೆಹ್ವಾಗ್ ಆಗಲಿದ್ದಾರೆಯೇ?
ರೋಹಿತ್ ಶರ್ಮಾ ಟೆಸ್ಟ್ ಆರಂಭಿಕನಾಗಿ ಕಣಕ್ಕಿಳಿಸಲು ಆಯ್ಕೆ ಸಮಿತಿ ಘೋಷಣೆ ಮಾಡುತ್ತಿದ್ದಂತೆಯೇ ಹಿಟ್‌ಮ್ಯಾನ್ ಅಭಿಮಾನಿಗಳ ಸಂಭ್ರಮಕ್ಕೆ ಪಾರವೇ ಇಲ್ಲ. ಭಾರತೀಯ ಕ್ರಿಕೆಟ್ ತಂಡವು ರೋಹಿತ್ ಶರ್ಮಾ ಮೂಲಕ ಮಗದೊಬ್ಬ ವೀರೇಂದ್ರ ಸೆಹ್ವಾಗ್ ಹುಡುಕಾಟದಲ್ಲಿದೆ. 32ರ ಹರೆಯದ ರೋಹಿತ್ ಶರ್ಮಾ ಅವಕಾಶವನ್ನು ಹೇಗೆ ಸದುಪಯೋಗಪಡಿಸಲಿದ್ದಾರೆ ಎಂಬುದನ್ನು ಕಾದು ನೋಡಬೇಕಿದೆ.

ಟೀಕೆಗಳ ಪ್ರವಾಹ...
ರೋಹಿತ್ ಶರ್ಮಾಗೆ ಓಪನರ್ ಸ್ಥಾನ ನೀಡುವ ಮೂಲಕ ನೈಜ ಪ್ರತಿಭೆಗಳಿಗೆ ಅವಕಾಶ ನಿರಾಕರಿಸಲಾಗಿದೆ ಎಂಬ ಆರೋಪ ಬಲವಾಗುತ್ತಿದೆ. ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಅಭಿಮನ್ಯು ಈಶ್ವರನ್ (52 ಪಂದ್ಯಗಳಲ್ಲಿ 4067 ರನ್, ಸರಾಸರಿ 49.59) ಹಾಗೂ ಪ್ರಿಯಾಂಕ್ ಪಂಚಲ್ (87 ಪಂದ್ಯಗಳಲ್ಲಿ 6186 ರನ್, 54.14) ರನ್ ಹೊಳೆಯನ್ನೇ ಹರಿಸಿದರೂ ಟೀಮ್ ಇಂಡಿಯಾ ಬಾಗಿಲು ತೆರೆದಿಲ್ಲ.

ಟೆಸ್ಟ್ ಓಪನರ್ ಆಗಲು ತಾಂತ್ರಿಕ ಜತೆಗೆ ಮಾನಸಿಕ ಮನೋಬಲದ ಅಗತ್ಯವಿದೆ. ಎಲ್ಲದಕ್ಕಿಂತಲೂ ಮಿಗಿಲಾಗಿ ರೆಡ್ ಬಾಲ್ ಕ್ರಿಕೆಟ್‌ನಲ್ಲಿ ತಾಳ್ಮೆಯು ಅತಿ ಮುಖ್ಯವೆನಿಸುತ್ತದೆ. ಈ ಎಲ್ಲ ಸವಾಲುಗಳನ್ನು ರೋಹಿತ್ ಹೇಗೆ ಮೆಟ್ಟಿ ನಿಲ್ಲಲಿದ್ದಾರೆ ಎಂಬುದು ಬಹಳಷ್ಟು ಕುತೂಹಲವೆನಿಸಿದೆ.