ಜೈಪುರದಲ್ಲಿ ರಾಯಲ್‌ - ರಾಯಲ್ಸ್‌ ಕದನ ಇಂದು

ಜೈಪುರ: ರಾಯಲ್‌ ಚಾಲೆಂಜರ್ಸ್‌ ಬೆಂಗಳೂರು ಮತ್ತು ರಾಜಸ್ಥಾನ್‌ ರಾಯಲ್ಸ್‌ ತಂಡಗಳು ಐಪಿಎಲ್‌-11ರ ತಮ್ಮ ಅಂತಿಮ ಲೀಗ್‌ ಪಂದ್ಯದಲ್ಲಿ ಎದುರಾಗುತ್ತಿದ್ದು, ಉಭಯ ತಂಡಗಳಿಗೂ ಈ ಪಂದ್ಯ ಮಾಡು ಇಲ್ಲ ಮಡಿ ಪಂದ್ಯವೆನಿಸಿದೆ.

ಸವಾಯಿ ಮಾನ್‌ಸಿಂಗ್‌ ಕ್ರೀಡಾಂಗಣದಲ್ಲಿ ಶನಿವಾರ ಮುಖಾಮುಖಿಯಾಗಲಿರುವ ಇತ್ತಂಡಗಳು, ಪ್ಲೇ ಆಫ್‌ ಹಂತವನ್ನು ಜೀವಂತವಾಗಿರಿಸಿಕೊಳ್ಳಲು ಗೆಲ್ಲಲೇಬೇಕಾದ ಒತ್ತಡ ಎದುರಿಸುತ್ತಿವೆ. ಯಾವುದೇ ತಂಡ ಸೋತರೂ ಪ್ಲೇ ಆಫ್‌ ಹಾದಿಯಿಂದ ನಿರ್ಗಮಿಸಲಿದೆ. ಸದ್ಯ 13 ಪಂದ್ಯಗಳನ್ನಾಡಿರುವ ರಾಯಲ್‌ ಚಾಲೆಂಜರ್ಸ್‌ ತಂಡ, ಆರು ಜಯದೊಂದಿಗೆ 12 ಅಂಕ ಗಳಿಸಿದ್ದು ಅಂಕಪಟ್ಟಿಯಲ್ಲಿ ಐದನೇ ಸ್ಥಾನದಲ್ಲಿದ್ದರೆ, ಇಷ್ಟೇ ಪಂದ್ಯಗಳನ್ನಾಡಿರುವ ರಾಜಸ್ಥಾನ್‌ ರಾಯಲ್ಸ್‌ ಸಹ 12 ಅಂಕದೊಂದಿಗೆ ನೆಟ್‌ರನ್‌ ರೇಟ್‌ ಆಧಾರದ ಮೇಲೆ ಆರನೇ ಸ್ಥಾನದಲ್ಲಿದೆ.

ಸತತ ಸೋಲುಗಳಿಂದ ನಾಕೌಟ್‌ ಹಂತವನ್ನು ದುರ್ಗಮಮಾಡಿಕೊಂಡಿದ್ದ ಬೆಂಗಳೂರು ತಂಡ ನಂತರ ಹ್ಯಾಟ್ರಿಕ್‌ ಗೆಲುವಿನಿಂದ ಪ್ಲೇ ಆಫ್‌ ಹಾದಿಯಲ್ಲಿ ಮುನ್ನಡೆದಿದೆ. ಅದರಲ್ಲೂ ಗುರುವಾರ ತವರಿನಲ್ಲಿ ನಡೆದ ಪಂದ್ಯದಲ್ಲಿ ಹೈದರಾಬಾದ್‌ ತಂಡದ ವಿರುದ್ಧ 14 ರನ್‌ಗಳ ಜಯಭೇರಿ ಬಾರಿಸಿರುವ ವಿರಾಟ್‌ ಕೊಹ್ಲಿ ಪಡೆ, ರಾಜಸ್ಥಾನ್‌ ರಾಯಲ್ಸ್‌ ವಿರುದ್ಧವೂ ಇದೇ ಪ್ರದರ್ಶನ ತೋರುವ ವಿಶ್ವಾಸ ಹೊಂದಿದೆ.

ನಾಯಕ ಕೊಹ್ಲಿ ಮತ್ತೆ ಲಯ ಕಳೆದುಕೊಂಡರೂ ಸ್ಟಾರ್‌ ಬ್ಯಾಟ್ಸ್‌ಮನ್‌ ಎಬಿ ಡಿ' ವಿಲಿಯರ್ಸ್‌ ಶ್ರೇಷ್ಠ ಫಾರ್ಮ್‌ನಲ್ಲಿರುವುದು ತಂಡದ ಬ್ಯಾಟಿಂಗ್‌ ಬಲವನ್ನು ಇಮ್ಮಡಿಗೊಳಿಸಿದೆ. ಆದರೆ ಬೌಲಿಂಗ್‌ನಲ್ಲಿ ಇನ್ನು ಸುಧಾರಣೆ ಕಂಡುಕೊಳ್ಳಬೇಕಿದೆ. ಸನ್‌ರೈಸರ್ಸ್‌ ವಿರುದ್ಧ 200ಕ್ಕೂ ಅಧಿಕ ಮೊತ್ತವನ್ನು ಉಳಿಸಿಕೊಳ್ಳಲು ಹೆಣಗಾಡಿದ್ದು, ತಂಡದ ಅಶಿಸ್ತು ಬೌಲಿಂಗ್‌ಗೆ ನಿದರ್ಶನವಾಗಿದೆ. ಹೀಗಾಗಿ ಈ ವಲಯದಲ್ಲಿ ಆರ್‌ಸಿಬಿ ಚೇತರಿಸಿಕೊಳ್ಳುವ ಅಗತ್ಯವಿದೆ.

ಅತ್ತ ಹ್ಯಾಟ್ರಿಕ್‌ ಗೆಲುವಿನ ನಂತರ ಮತ್ತೆ ಸೋಲಿನ ಕಹಿಯುಂಡಿರುವ ಮಾಜಿ ಚಾಂಪಿಯನ್‌ ರಾಜಸ್ಥಾನ್‌ ಮನೆಯಂಗಳದಲ್ಲಿ ಪ್ರವಾಸಿ ತಂಡವನ್ನು ಬಗ್ಗು ಬಡಿದು ಪ್ಲೇ ಆಫ್‌ ಹಂತಕ್ಕೇರುವ ತವಕದಲ್ಲಿದೆ.