ಟೆಸ್ಟ್‌ ಕ್ರಿಕೆಟ್‌ ಇತಿಹಾಸದಲ್ಲಿ ವಿಶೇಷ ದಾಖಲೆಯನ್ನು ತನ್ನದಾಗಿಸಿಕೊಂಡ ಇಂಗ್ಲೆಂಡ್‌!

ಪೋರ್ಟ್‌ ಎಲಿಜಬತ್‌: ವಿಶ್ವಕ್ಕೆ ಕ್ರಿಕೆಟ್ ಆಟವನ್ನು ಪರಿಚಯಿಸಿದ ಇಂಗ್ಲೆಂಡ್‌, ಇದೀಗ ಟೆಸ್ಟ್‌ ಕ್ರಿಕೆಟ್‌ ಇತಿಹಾಸದಲ್ಲಿ ವಿಶೇಷ ದಾಖಲೆಯೊಂದನ್ನು ತನ್ನದಾಗಿಸಿಕೊಂಡಿದೆ. ವಿದೇಶ ಪ್ರವಾಸದಲ್ಲಿ 500 ಟೆಸ್ಟ್‌ ಪಂದ್ಯಗಳನ್ನಾಡಿದ ಮೊತ್ತ ಮೊದಲ ತಂಡ ಎಂಬ ಹೆಗ್ಗಳಿಕೆ ಇಂಗ್ಲೆಂಡ್‌ ಪಾತ್ರವಾಗಿದೆ.

ದಕ್ಷಿಣ ಆಫ್ರಿಕಾ ಪ್ರವಾಸದಲ್ಲಿರುವ ಇಂಗ್ಲೆಂಡ್‌ ತಂಡ, ಇಲ್ಲಿನ ಸೇಂಟ್‌ ಜಾರ್ಜ್ಸ್‌ ಪಾರ್ಕ್‌ ಕ್ರೀಡಾಂಗಣದಲ್ಲಿ ಆತಿಥೇಯರ ವಿರುದ್ಧ 3ನೇ ಟೆಸ್ಟ್ ಪಂದ್ಯದಲ್ಲಿ ಆಡುವುದರೊಂದಿಗೆ ಈ ವಿಶೇಷ ದಾಖಲೆಯನ್ನು ಮುಡಿಗೇರಿಸಿಕೊಂಡಿತು.

ಇಂಗ್ಲೆಂಡ್‌ ತಂಡ ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಆಡಲಾದ ಮೊದಲ ಅಧಿಕೃತ ಪಂದ್ಯವನ್ನು ಆಡಿದ ದಾಖಲೆಯನ್ನೂ ಹೊಂದಿದೆ. 1877ರ ಮಾರ್ಚ್‌ 15ರಿಂದ 19ರವರೆಗೆ ಮೆಲ್ಬೋರ್ನ್‌ ಕ್ರಿಕೆಟ್‌ ಗ್ರೌಂಡ್‌ (ಎಂಸಿಜಿ)ನಲ್ಲಿ ನಡೆದ ಜೇಮ್ಸ್‌ ಲಿಲ್ಲಿವೈಟ್‌ ನಾಯಕತ್ವದಲ್ಲಿ ಚೊಚ್ಚಲ ಟೆಸ್ಟ್‌ ಪಂದ್ಯವನ್ನಾಡಿದ್ದ ಇಂಗ್ಲೆಂಡ್‌, 45 ರನ್‌ಗಳಿಂದ ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧ ಸೋಲುಂಡಿತ್ತು.

ಬಿಸಿಸಿಐ ವಾರ್ಷಿಕ ಒಪ್ಪಂದ ಪಟ್ಟಿಯಿಂದ ಧೋನಿಗೆ ಕೊಕ್‌!

ಇನ್ನು ವಿದೇಶದಲ್ಲಿ ಈವರೆಗೆ ಇಂಗ್ಲೆಂಡ್‌ ಆಡಿರುವ 500 ಟೆಸ್ಟ್‌ ಪಂದ್ಯಗಳಲ್ಲಿ 149 ಪಂದ್ಯಗಳನ್ನು ಗೆದ್ದ ಸಾಧನೆ ಮಾಡಿದೆ. ಆದರೆ, 182 ಪಂದ್ಯಗಳನ್ನೂ ಸೋತಿರುವುದು ವಿಶೇಷ. ಇನ್ನು ವಿದೇಶದಲ್ಲಿ ಅತಿ ಹೆಚ್ಚು ಟೆಸ್ಟ್‌ ಪಂದ್ಯಗಳನ್ನಾಡಿದ ತಂಡಗಳ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿರುವ ಆಸ್ಟ್ರೇಲಿಯಾ, ಈವರೆಗೆ 404 ಪಂದ್ಯಗಳನ್ನು ಆಡಿದ್ದು, ಇದರಲ್ಲಿ 147 ಗೆಲುವು, 125 ಸೋಲು ಮತ್ತು 131 ಡ್ರಾ ಫಲಿತಾಂಶಗಳನ್ನು ಕಂಡಿದೆ.

ಈ ಪಟ್ಟಿಯಲ್ಲಿ ಮೂರನೇ ಸ್ಥಾನ ಪಡೆದಿರುವ ಟೀಮ್‌ ಇಂಡಿಯಾ, ವಿದೇಶದಲ್ಲಿ 268 ಟೆಸ್ಟ್‌ ಪಂದ್ಯಗಳನ್ನು ಆಡಿದೆ. ಇದರಲ್ಲಿ 51 ಜಯ, 113 ಸೋಲು ಮತ್ತು 104 ಡ್ರಾ ಫಲಿತಾಂಶಗಳು ಮೂಡಿಬಂದಿವೆ.

ಟೀಮ್‌ ಇಂಡಿಯಾದ ಸೂಪರ್‌ಫ್ಯಾನ್‌ ಚಾರುಲತಾ ಅಜ್ಜಿ ಇನ್ನಿಲ್ಲ!

ಇನ್ನು ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಸಮಗ್ರವಾಗಿ ಇಂಗ್ಲೆಂಡ್‌ ತಂಡ 1,021 ಟೆಸ್ಟ್‌ ಪಂದ್ಯಗಳನ್ನು ಆಡಿದ್ದು, 369 ಪಂದ್ಯಗಳಲ್ಲಿ ಗೆಲುವು, 304 ಪಂದ್ಯಗಳಲ್ಲಿ ಸೋಲು ಹಾಗೂ 347 ಪಂದ್ಯಗಳಲ್ಲಿ ಡ್ರಾ ಫಲಿತಾಂಶ ಪಡೆದುಕೊಂಡಿದೆ.

ಈ ಪಟ್ಟಿಯಲ್ಲೂ ಆಸ್ಟ್ರೇಲಿಯಾ ತಂಡ 2ನೇ ಸ್ಥಾನ ಪಡೆದಿದ್ದು, 393 ಗೆಲುವು, 224 ಸೋಲು ಮತ್ತು 211 ಡ್ರಾ ಫಲಿತಾಂಶ ಕಂಡಿದೆ. ವೆಸ್ಟ್‌ ಇಂಡೀಸ್‌ ತಂಡ ಈ ಪಟ್ಟಿಯಲ್ಲಿ 3ನೇ ಸ್ಥಾನ ಪಡೆದಿದ್ದು 545 (174 ಗೆಲುವು, 195 ಸೋಲು ಮತ್ತು 175 ಡ್ರಾ) ಟೆಸ್ಟ್‌ಗಳನ್ನು ಆಡಿದೆ. ಭಾರತ ತಂಡ 4ನೇ ಸ್ಥಾನದಲ್ಲಿದ್ದು 540 (157 ಗೆಲುವು, 165 ಸೋಲು ಮತ್ತು 217 ಡ್ರಾ) ಟೆಸ್ಟ್‌ಗಳನ್ನು ಆಡಿದೆ.

ಟಾಮ್‌ ಕೂಪರ್‌ ಅದ್ಭುತ ಕ್ಯಾಚ್‌, ರೆನೆಗೇಡ್ಸ್‌ಗೆ ಸತತ 9ನೇ ಸೋಲು!

ಪ್ರಸ್ತುತ ದಕ್ಷಿಣ ಆಫ್ರಿಕಾ ವಿರುದ್ಧದ 4 ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ಮೊದಲ ಪಂದ್ಯ ಸೋತು ನಂತರ 2ನೇ ಟೆಸ್ಟ್‌ನಲ್ಲಿ ತಿರುಗೇಟು ನೀಡಿರುವ ಜೋ ರೂಟ್‌ ಸಾರಥ್ಯದ ಇಂಗ್ಲೆಂಡ್‌, 1-1ರಲ್ಲಿ ಸಮಬಲ ಸಾಧಿಸಿದೆ.