ಮೈ ನವಿರೇಳಿಸುವ 'ಸಚಿನ್...ಸಚಿನ್' ಹಾಡು

ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್‌ನ ಜೀವಂತ ದಂತಕಥೆ ಸಚಿನ್ ತೆಂಡೂಲ್ಕರ್ ಅವರ ಆತ್ಮಕಥನವನ್ನು ಆಧಾರವಾಗಿಟ್ಟುಕೊಂಡು ನಿರ್ಮಾಣವಾಗಿರುವ 'ಸಚಿನ್: ಎ ಬಿಲಿಯನ್ ಡ್ರೀಮ್ಸ್' ತೆರೆಗೆ ಅಪ್ಪಳಿಸಲು ಇನ್ನೇನು ಕೆಲವೇ ದಿನಗಳು ಮಾತ್ರ ಬಾಕಿ ಉಳಿದಿರುವಂತೆಯೇ ಮೈ ನವಿರೇಳಿಸುವ ಹಾಡನ್ನು ಬಿಡುಗಡೆಗೊಳಿಸಲಾಗಿದೆ.

'ಸಚಿನ್...ಸಚಿನ್' ಎಂದು ಆರಂಭವಾಗುವ ಹಾಡಿನ ಸಾಲುಗಳು ಸಚಿನ್ ಅಭಿಮಾನಿಗಳಲ್ಲಿ ರೋಮಾಂಚನವನ್ನುಂಟು ಮಾಡಿದೆ. ಇದಕ್ಕೂ ಮೊದಲು ಬಿಡುಗಡೆಯಾದ ಚಿತ್ರದ ಟ್ರೇಲರ್ ಭಾರಿ ಸಂಚಲನವನ್ನೇ ಮೂಡಿಸಿತ್ತು.

ಖ್ಯಾತ ಸಂಗೀತಗಾರ ಎ. ಆರ್. ರಹಮಾನ್ ಸಂಗೀತದಲ್ಲಿ ಸಚಿನ್ ಥೀಮ್ ಸಾಂಗ್‌ಗೆ ಸುಖ್‌ವಿಂದರ್ ಸಿಂಗ್ ಹಾಗೂ ಕ್ಯಾಲಿ ಕಂಠ ನೀಡಿದ್ದಾರೆ. ಚಿತ್ರವನ್ನು ಜೇಮ್ಸ್ ಇರಸ್ಕಿನ್ ಅವರು ನಿರ್ದೇಶಿಸಿದ್ದು, 200 ನಾಟೌಟ್ ಪ್ರೊಡಕ್ಷನ್ ಅಡಿಯಲ್ಲಿ ರವಿ ಭಾಗ್ಚಂದಕ ಹಾಗೂ ಕಾರ್ನಿವಲ್ ಮೋಷನ್ ಪಿಕ್ಚರ್ಸ್ ನಿರ್ಮಾಣ ಮಾಡಿದೆ.

ಈ ಆತ್ಮಕಥನ ಚಿತ್ರದ ಮತ್ತೊಂದು ವಿಶೇಷವೆಂದರೆ ಖುದ್ದು ಸಚಿನ್ ಅವರೇ ನಟಿಸಿದ್ದಾರೆ. ಹಾಗೆಯೇ ನಿರಂತರ ಅಂತರಾಳದಲ್ಲಿ ಚಿತ್ರದ ಬಗ್ಗೆ ಟ್ವಿಟ್ ಮೂಲಕ ವಿವರಗಳನ್ನು ಅಭಿಮಾನಿಗಳ ಜೊತೆಗೆ ಹಂಚಿಕೊಂಡಿದ್ದರು.

A trip down memory lane. Nostalgia hits! #SachinSachin Thank you all for such love & support! #SachinABillionDreams https://t.co/eUgTektiDH — sachin tendulkar (@sachin_rt) May 9, 2017 ಇಂಗ್ಲಿಂಷ್, ಹಿಂದಿ ಹೊರತಾಗಿ ತಮಿಳು, ತೆಲುಗು ಹಾಗೂ ಮರಾಠಿ ಭಾಷೆಗಳಲ್ಲೂ ಡಬ್ಬಿಂಗ್ ಆಗಲಿರುವ ಸಚಿನ್: ಎ ಬಿಲಿಯನ್ ಡ್ರೀಮ್ಸ್ ಇದೇ ಮುಂಬರುವ ಮೇ 26ರಂದು ತೆರೆಗೆ ಅಪ್ಪಳಿಸಲಿದೆ.

ಹಾಡಿನ ಪ್ರತಿಕ್ರಿಯೆ ನೀಡಿರುವ ಸಚಿನ್, ಹಳೆಯ ನೆನಪುಗಳು ನೆನಪಿಸುವಂತಿದೆ ಎಂದಿದ್ದಾರೆ. ನಮಗೆ ಅಭ್ಯಾಸ ನಡೆಸಲು ಆಂತರಿಕ ಪಿಚ್‌ಗಳಿರಲಿಲ್ಲ. ಹಾಗಾಗಿ ಮಳೆಯಲ್ಲಿಯೇ ಅಭ್ಯಾಸ ನಡೆಸುತ್ತಿದ್ದೆವು ಎಂದು ವಿವರಿಸುತ್ತಾರೆ.

ಸಚಿನ್, ಸಚಿನ್ ಎಂಬ ಪದಗಳ ಬಗ್ಗೆ ಕೇಳಿದಾಗ, ನನ್ನ ತಾಯಿಯ ಮಾತುಗಳು ನೆನಪಿಗೆ ಬರುತ್ತಿದೆ. ಸಚಿನ್ ಸಚಿನ್ ಮೇಲೆ ಬಾ ಎಂದು ತಮಾಷೆ ಭರಿತರಾಗಿ ಸಚಿನ್ ನುಡಿಯುತ್ತಾರೆ.