ಸಚಿನ್ ಆತ್ಮಕಥನದಲ್ಲಿ ಅಂಜಲಿ ಜೊತೆ ರೋಮ್ಯಾನ್ಸ್!

ಹೊಸದಿಲ್ಲಿ: ಕ್ರಿಕೆಟ್ ಅಭಿಮಾನಿಗಳು ಅತ್ಯಂತ ಕಾತರದಿಂದ ಕಾದು ಕುಳಿತಿರುವ ಜೀವಂತ ದಂತಕಥೆ ಸಚಿನ್ ತೆಂಡೂಲ್ಕರ್ ಅವರ ಆತ್ಮಕಥನವನ್ನು ಆಧಾರಿತ ಚಿತ್ರ 'ಸಚಿನ್: ಎ ಬಿಲಿಯನ್ ಡ್ರೀಮ್ಸ್' ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ.

ಬಹುನಿರೀಕ್ಷಿತ ಸಚಿನ್ ಚಿತ್ರ ಮೇ 26ರಂದು ಬಿಡುಗಡೆಯಾಗಲಿದೆ. ಚಿತ್ರದಲ್ಲಿ ಸಚಿನ್ ಬಗ್ಗೆ ನೀವು ಅರಿಯದ ಹಲವಾರು ಘಟನಾವಳಿಗಳು ಇರಲಿದೆ ಎಂಬ ವಿವರವು ಬಹಳಷ್ಟು ಕುತೂಹಲವನ್ನುಂಟು ಮಾಡಿದೆ.

ಈಗ ಬಂದಿರುವ ತಾಜಾ ಮಾಹಿತಿಗಳ ಪ್ರಕಾರ ಸಚಿನ್ ಚಿತ್ರದಲ್ಲಿ ಪ್ರೇಮಕಥೆಯನ್ನು ಹೊಂದಿರಲಿದೆ. ಇದನ್ನು ಸ್ವತ: ಸಚಿನ್ ತೆಂಡೂಲ್ಕರ್ ಅವರೇ ಬಹಿರಂಗಪಡಿಸಿದ್ದಾರೆ.

ಖಾಸಗಿ ವಾಹಿನಿಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ಈ ಬಗ್ಗೆ ತಿಳಿಸಿರುವ ಸಚಿನ್, ಚಿತ್ರದಲ್ಲಿ ನೀವು ರೋಮ್ಯಾಂಟಿಕ್ ಭಾಗವನ್ನು ನೋಡಲಿರುವೀರಿ. ನನ್ನ ವೃತ್ತಿಜೀವನದಲ್ಲಿ ಪ್ರಮುಖ ಪಾತ್ರ ವಹಿಸಿರುವ ಪತ್ನಿ ಅಂಜಲಿ ಜೊತೆಗಿನ ಪ್ರೇಮಕಥೆಯು ಇರಲಿದೆ ಎಂದಿದ್ದಾರೆ.

ಅಂಜಲಿ ನನ್ನ ಜೀವನದ ಅವಿಭಾಜ್ಯ ಅಂಗವಾಗಿದ್ದಾರೆ. ಆಕೆ ನನ್ನ ಜೀವನದ ಶ್ರೇಷ್ಠ ಅಂಶವಾಗಿದ್ದು, ಯಾವತ್ತೂ ನನ್ನ ವೃತ್ತಿ ಜೀವನದಲ್ಲಿ ಹಸ್ತಕ್ಷೇಪ ಮಾಡಿಲ್ಲ. ಈ ಆತ್ಮಕಥನದ ಮೂಲಕ ನನ್ನ ವೈಯಕ್ತಿಕ ಆಲೋಚನೆ ಹಾಗೂ ಕ್ಷಣಗಳನ್ನು ಹಂಚಿಕೊಂಡಿರುವುದಾಗಿ ತಿಳಿಸಿದ್ದಾರೆ.