ಕೊಹ್ಲಿ ಸಚಿನ್‌ ತೆಂಡೂಲ್ಕರ್‌ರ ಏಕದಿನ ಶತಕಗಳ ದಾಖಲೆ ಮುರಿಯಬಹುದು: ಕೋಚ್ ಮುನೀಶ್ ಬಾಲಿ

[This story originally published in Times Of India on February 19, 2019]

Vijaya Karnataka Web

ಹೊಸದಿಲ್ಲಿ: ವಿರಾಟ್‌ ಕೊಹ್ಲಿಯನ್ನು ಇಷ್ಟು ವರ್ಷಗಳ ಕಾಲ ನೋಡಿದ್ದವರು ಹೇಳುವುದೇನೆಂದರೆ ಕೊಹ್ಲಿ, ಸಚಿನ್ ತೆಂಡೂಲ್ಕರ್‌ರ ಏಕದಿನ ಶತಕಗಳ ದಾಖಲೆ ( 49 )ಯನ್ನು ಮುರಿಯಲಿದ್ದಾರೆ. 2008ರಲ್ಲಿ ವಿರಾಟ್‌ ಕೊಹ್ಲಿ ನಾಯಕತ್ವದಲ್ಲಿ ಅಂಡರ್ 19 ವಿಶ್ವಕಪ್ ಗೆದ್ದಿದ್ದ ವೇಳೆ ಆ ತಂಡದಲ್ಲಿ ಸಹಾಯಕ ಕೋಚ್ ಆಗಿದ್ದ ಮುನೀಶ್‌ ಬಾಲಿ ವಿಜಯ ಕರ್ನಾಟಕ ಸೋದರ ಪತ್ರಿಕೆ ಟೈಮ್ಸ್ ಆಫ್‌ ಇಂಡಿಯಾಗೆ ಸಂದರ್ಶನದ ವೇಳೆ ಈ ಮಾತುಗಳನ್ನಾಡಿದ್ದಾರೆ.

2008ರಲ್ಲಿ ಅವರು ಇದ್ದದ್ದಕ್ಕೂ ಈಗ ಇರುವುದಕ್ಕೂ ಸಾಕಷ್ಟು ವ್ಯತ್ಯಾಸವಿದೆ. ವಿರಾಟ್ ಭಾರತದ ಹಿರಿಯರ ತಂಡಕ್ಕೆ ಒಂದಲ್ಲಾ ಒಂದು ದಿನ ಸೇರುತ್ತಾರೆ ಎಂಬುದು ನನಗೆ ಗೊತ್ತಿತ್ತು. ಅವರು ಫಿಟ್ನೆಸ್ ಅನ್ನು ಮತ್ತೊಂದು ಹಂತಕ್ಕೆ ತೆಗೆದುಕೊಂಡು ಹೋಗಿರುವುದು ಶ್ಲಾಘನೀಯ. ತಂಡದ ಇತರೆ ಸದಸ್ಯರಿಗೂ ಕೊಹ್ಲಿ ಫಿಟ್ನೆಸ್ ಗುಣಮಟ್ಟ ತಿಳಿದುಕೊಡಲು ಅವರು ಮಾದರಿಯಾಗಿದ್ದಾರೆ'' ಎಂದು ಬಾಲಿ ತಿಳಿಸಿದ್ದಾರೆ.

ಇನ್ನು, ವಿರಾಟ್ ಕ್ರಿಕೆಟ್‌ನ ಗತಿಯನ್ನೇ ಬದಲಿಸಿದ್ದು, ಅವರು ಆರಂಭಿಕ ದಿನದಲ್ಲಿದ್ದಂತೆ ಈಗಲೂ ಕೂಡ ಆಕ್ರಮಣಕಾರಿಯಾಗಿದ್ದಾರೆ. ರನ್‌ಗಳ ಬಗ್ಗೆ ಹಾಗೂ ಗೆಲುವಿನ ಬಗ್ಗೆ ಅವರಿಗಿರುವ ಹಸಿವು ಅವರನ್ನು ಮತ್ತೊಂದು ಹಂತಕ್ಕೆ ತೆಗೆದುಕೊಂಡು ಹೋಗಿದ್ದಾರೆ. ತಮಗೆ ದೊರೆತ ಅವಕಾಶವನ್ನು ಅವರು ಎರಡು ಕೈಗಳಿಂದಲೂ ಬಾಚಿಕೊಂಡಿದ್ದಾರೆ.

ಅಲ್ಲದೆ,'' ತಂಡಕ್ಕೆ ಅಗತ್ಯವಿದ್ದಾಗ ಅವರು ರನ್‌ಗಳನ್ನು ಗಳಿಸಿದ್ದಾರೆ. ವಿರಾಟ್ ಪ್ರತಿಭೆ ದೇವರು ಕೊಟ್ಟ ವರವಿದ್ದಂತೆ. ಚಿಕ್ಕ ಸಮಯದಲ್ಲೇ ಅವರು ದಂತಕಥೆಯಾಗಿದ್ದಾರೆ. ಇದಕ್ಕೆ ಅವರ ಪರಿಶ್ರಮ, ಸಂಕಲ್ಪ ಹಾಗೂ ಕ್ರೀಡೆಯನ್ನು ಪೂಜಿಸುವ ವಿಧಾನ ಅದ್ಭುತ'' ಎಂದೂ ಮುನೀಶ್‌ ಬಾಲಿ ಹೇಳಿಕೊಂಡಿದ್ದಾರೆ.

ವಿರಾಟ್ ಕೊಹ್ಲಿಗೆ ಈಗ 30 ವರ್ಷ ವಯಸ್ಸಾಗಿದ್ದು, ಅವರು ಟೆಸ್ಟ್ ಹಾಗೂ ಏಕದಿನ - ಐಸಿಸಿಯ ಎರಡೂ ಮಾದರಿಗಳಲ್ಲಿ ನಂ. 1 ಆಟಗಾರರಿದ್ದಾರೆ. ಇದಕ್ಕೆ ಅವರು ಫೀಲ್ಡ್ ಹೊರಗೆ ಪಡುವ ಪರಿಶ್ರಮವೂ ಕಾರಣ. ಕಳೆದ ವರ್ಷ ಕೊಹ್ಲಿ ಸಂಪೂರ್ಣ ಸಸ್ಯಾಹಾರಿಯಾಗಿ ಬದಲಾಗಲು ನಿರ್ಧರಿಸಿದ್ದರು ಎಂದೂ ಅವರು ತಿಳಿಸಿದ್ದಾರೆ.


ಜತೆಗೆ, ವಿರಾಟ್ ಕೊಹ್ಲಿ 214 ಇನ್ನಿಂಗ್ಸ್‌ಗಳಲ್ಲಿ 39 ಏಕದಿನ ಶತಕಗಳನ್ನು ಬಾರಿಸಿದ್ದು, ಸಚಿನ್ ತೆಂಡೂಲ್ಕರ್ ದಾಖಲೆಯಾದ 49ಕ್ಕಿಂತ ಕೇವಲ 11 ಶತಕ ದೂರದಲ್ಲಿದ್ದಾರೆ. ಈ ಹಿನ್ನೆಲೆ ವಿರಾಟ್‌ ಕೊಹ್ಲಿಯ ಬೆಳವಣಿಗೆಯನ್ನು ಹತ್ತಿರದಿಂದ ಗಮನಿಸಿದರೆ, ಈ ಒಂದು ದಾಖಲೆಯನ್ನು ವಿರಾಟ್ ಕೊಹ್ಲಿ ಅಳಿಸಿಹಾಕಲಿದ್ದಾರೆ ಎಂದು ಅನಿಸುತ್ತದೆ ಎಂದೂ 2008ರಲ್ಲಿ ವಿರಾಟ್‌ ಕೊಹ್ಲಿ ನಾಯಕತ್ವದಲ್ಲಿ ಅಂಡರ್ 19 ವಿಶ್ವಕಪ್ ಗೆದ್ದಿದ್ದ ವೇಳೆ ಆ ತಂಡದಲ್ಲಿ ಸಹಾಯಕ ಕೋಚ್ ಆಗಿದ್ದ ಮುನೀಶ್‌ ಬಾಲಿ ಸಂದರ್ಶನದಲ್ಲಿ ತಿಳಿಸಿದ್ದಾರೆ.

ರವೀಂದ್ರ ಜಡೇಜಾ, ಅಭಿನವ್ ಮುಕುಂದ್, ಇಕ್ಬಾಲ್ ಅಬ್ದುಲ್ಲಾ, ಸೌರಭ್ ತಿವಾರಿ ಹಾಗೂ ಸಿದ್ಧಾರ್ಥ್‌ ಕೌಲ್ 2008ರ ಅಂಡರ್ 19 ವಿಶ್ವಕಪ್ ತಂಡದಲ್ಲಿದ್ದರು. ಅಂದಿನ ತಂಡದಲ್ಲಿ ಅದ್ಭುತ ಪ್ರತಿಭೆಯುಳ್ಳವರಿದ್ದರು. ತನ್ಮಯ್ ಶ್ರೀವಾಸ್ತವ, ಮನೀಶ್‌ ಪಾಂಡೆ ಹಾಗೂ ಕೊಹ್ಲಿಯಂತಹವರು ವಿಶ್ವಕಪ್‌ಗೆ ತಂಡ ಸೇರಿಕೊಳ್ಳುವ ಮುನ್ನ ದೇಸಿ ಕ್ರಿಕೆಟ್‌ನಲ್ಲೂ ಉತ್ತಮ ಪ್ರದರ್ಶನ ನೀಡಿದ್ದರು ಎಂದು ಬಾಲಿ ಸ್ಮರಿಸಿದ್ದಾರೆ.

ಇನ್ನು, 2008ರ ಅಂಡರ್ 19 ವಿಶ್ವಕಪ್ ತಂಡದ ನಾಯಕರಾಗಿದ್ದ ವಿರಾಟ್ ಕೊಹ್ಲಿ ಸಂಪೂರ್ಣವಾಗಿ ತಂಡದ ಸದ್ಯರಾಗಿದ್ದರು. ಡ್ರೆಸ್ಸಿಂಗ್ ರೂಮಿನಲ್ಲಿ ತಂಡದ ಎಲ್ಲರನ್ನೂ ಖುಷಿಯಾಗಿರುವಂತೆ ನೋಡಿಕೊಳ್ಳುತ್ತಿದ್ದರು. ತಮಾಷೆ ಮಾಡಿಕೊಂಡು ಎಲ್ಲರಿಗೂ ಗೆಳೆಯರಂತಿದ್ದರು ಎಂದು ಅವರು ಹೇಳಿದ್ದಾರೆ.