ಚೊಚ್ಚಲ ಟೆಸ್ಟ್ ವಿಕೆಟ್ ಪಡೆದ ಎಡಗೈ ಸ್ಪಿನ್ನರ್ ಶಹಬಾಜ್ ನದೀಂ

ರಾಂಚಿ: ಭಾರತದ ಎಡಗೈ ಆಫ್ ಸ್ಪಿನ್ನರ್ ಶಹಬಾಜ್ ನದೀಂ ಟೆಸ್ಟ್ ಕ್ರಿಕೆಟ್‌ನಲ್ಲಿ ಚೊಚ್ಚಲ ವಿಕೆಟ್ ಸಾಧನೆ ಮಾಡಿದ್ದಾರೆ. ಪ್ರವಾಸಿ ದಕ್ಷಿಣ ಆಫ್ರಿಕಾ ವಿರುದ್ಧ ನಡೆಯುತ್ತಿರುವ ಮೂರನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ಶಹಬಾಜ್ ಸ್ಮರಣೀಯ ದಾಖಲೆ ಬರೆದರು.

ಡೆಬ್ಯು ಪಂದ್ಯದಲ್ಲೇ ಶಹಬಾಜ್ ಚೊಚ್ಚಲ ವಿಕೆಟ್ ಪಡೆದಿದ್ದಾರೆ. ಮೂರನೇ ದಿನದಾಟದಲ್ಲಿ ದಕ್ಷಿಣ ಆಫ್ರಿಕಾ ಇನ್ನಿಂಗ್ಸ್ ವೇಳೆಯಲ್ಲಿ ಶಹಬಾಜ್ ದಾಳಿಯಲ್ಲಿ ತೆಂಬ ಬಾವುಮರನ್ನು ವಿಕೆಟ್ ಕೀಪರ್ ವೃದ್ಧಿಮಾನ್ ಸಹಾ ಸ್ಟಂಪ್ ಔಟ್ ಮಾಡಿದರು.

ಈ ಮೂಲಕ ಸ್ಟಂಪ್ ಔಟ್ ಮೂಲಕ ಚೊಚ್ಚಲ ಟೆಸ್ಟ್ ಪಡೆದ ಭಾರತದ ನಾಲ್ಕನೇ ಬೌಲರ್ ಎನಿಸಿಕೊಂಡರು.

ಭಾರತ vs ದಕ್ಷಿಣ ಆಫ್ರಿಕಾ ಅಂತಿಮ ಟೆಸ್ಟ್ ಲೈವ್ ಅಪ್‌ಡೇಟ್ಸ್

ಈ ಮೊದಲು ಟೆಸ್ಟ್ ಕ್ರಿಕೆಟ್‌ಗೆ ಡೆಬ್ಯು ಮಾಡಿದ ಭಾರತದ 296ನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಶಹಬಾಜ್ ನದೀಂ ಪಾತ್ರವಾಗಿದ್ದರು. 30ರ ಹರೆಯದ ನದೀಂ, 110 ಪ್ರಥಮ ದರ್ಜೆ ಪಂದ್ಯಗಳ ಅಗಾಧ ಅನುಭವದ ಬಳಿಕ ಕೊನೆಗೂ ಟೆಸ್ಟ್ ಕ್ರಿಕೆಟ್‌ಗೆ ಲಗ್ಗೆಯಿಟ್ಟಿದ್ದಾರೆ.

ಈ ಮೂಲಕ ನಾಲ್ಕನೇ ಅತಿ ಹೆಚ್ಚು ಪ್ರಥಮ ದರ್ಜೆ ಕ್ರಿಕೆಟ್‌ಗಳ ಬಳಿಕ ಟೀಮ್ ಇಂಡಿಯಾ ಪ್ರವೇಶಿಸಿದ ಆಟಗಾರ ಎಂದೆನಿಸಿಕೊಂಡಿದ್ದಾರೆ.

ಚೈನಾಮನ್ ಖ್ಯಾತಿ ಕುಲ್‌ದೀಪ್ ಯಾದವ್ ಭುಜ ನೋವಿನ ಸಮಸ್ಯೆಗೊಳಗಾದ ಹಿನ್ನಲೆಯಲ್ಲಿ ಶಹಬಾಜ್ ನದೀಂಗೆ ಅವಕಾಶ ನೀಡಲಾಗಿತ್ತು. ಅಲ್ಲದೆ ಟೀಮ್ ಇಂಡಿಯಾ ಸೇರಿದ 24 ತಾಸಿನೊಳಗೆ ಡೆಬ್ಯು ಭಾಗ್ಯ ಪಡೆದಿದ್ದರು.

ಡಾನ್ ಬ್ರಾಡ್ಮನ್ 71 ವರ್ಷ ಹಳೆಯ ದಾಖಲೆ ಮುರಿದ ರೋಹಿತ್ ಶರ್ಮಾ

15 ವರ್ಷಗಳ ಹಿಂದೆ 2004/05ರ ಸಾಲಿನ ರಣಜಿ ಟ್ರೋಫಿ ವೇಳೆಯಲ್ಲಿ ಕೇರಳ ವಿರುದ್ಧ ಜಾರ್ಖಂಡ್ ಪರ ಶಹಬಾಜ್ ನದೀಂ ಪ್ರಥಮ ದರ್ಜೆ ಕ್ರಿಕೆಟ್‌ಗೆ ಪಾದಾರ್ಪಣೆ ಮಾಡಿದ್ದರು.

2012ರಲ್ಲಿ ಇಂಡಿಯನ್ ಪ್ರೀಮಿಯರ್ ಲೀಗ್‌ನಲ್ಲಿ ಡೆಲ್ಲಿ ಡೇರ್‌ಡೆವಿಲ್ಸ್ ಪರ ಕಾಣಿಸಿಕೊಂಡಿದ್ದರು. 2018ರಲ್ಲಿ ರಾಜಸ್ಥಾನ ವಿರುದ್ಧ ನಡೆದ ವಿಜಯ್ ಹಜಾರೆ ಟ್ರೋಫಿ ಲಿಸ್ಟ್ ಎ ಕ್ರಿಕೆಟ್‌ನಲ್ಲಿ 10 ರನ್ನಿಗೆ ಎಂಟು ವಿಕೆಟ್ ಕಿತ್ತು ಮಿಂಚಿದರು.

2018ರಲ್ಲಿ ವೆಸ್ಟ್‌ಇಂಡೀಸ್ ವಿರುದ್ಧ ಟ್ವೆಂಟಿ-20 ಸರಣಿಗಾಗಿ ಟೀಮ್ ಇಂಡಿಯಾದಲ್ಲಿ ಆಯ್ಕೆಯಾದರೂ ಆಡುವ ಅವಕಾಶದಿಂದ ವಂಚಿತವಾಗಿದ್ದರು.

ಕುಲ್‌ದೀಪ್‌ಗೆ ಕೈತಪ್ಪಿದ ಅವಕಾಶ; ಶಹಬಾಜ್ ನದೀಂ ಡ್ರೀಮ್ ಡೆಬ್ಯು

ಇನ್ನು 2015ರಿಂದ 2017ರ ಅವಧಿಯಲ್ಲಿ ಎರಡು ಬಾರಿ ರಣಜಿ ಟ್ರೋಫಿಯಲ್ಲಿ 50ಕ್ಕೂ ವಿಕೆಟ್ ಸಾಧನೆ ಮಾಡಿದ್ದರು. ಹಾಗೆಯೇ 2015ರ ಬಳಿಕ ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಭಾರತದ ಪರ ಅತಿ ಹೆಚ್ಚು ವಿಕೆಟ್ ಪಡೆದ ಹಿರಿಮೆಗೂ ಪಾತ್ರವಾಗಿದ್ದಾರೆ. ನದೀಂ 46 ಪಂದ್ಯಗಳಲ್ಲಿ 209 ವಿಕೆಟ್ ಪಡೆದಿದ್ದಾರೆ. ಇಲ್ಲಿ ಭಾರತದ ಪರ ಆಡುತ್ತಿರುವ ರವೀಂದ್ರ ಜಡೇಜಾ ಹಾಗೂ ರವಿಚಂದ್ರನ್ ಅಶ್ವಿನ್‌ರನ್ನು ಹಿಂದಿಕ್ಕಿರುವುದು ಗಮನಾರ್ಹವೆನಿಸುತ್ತದೆ.