ಬಾಂಗ್ಲಾ-ಲಂಕಾ ಪಂದ್ಯ ವರುಣನಿಗೆ ತರ್ಪಣ

ತಲಾ ಒಂದು ಅಂಕ ಹಂಚಿಕೊಂಡ ಏಷ್ಯಾ ತಂಡಗಳು

Vijaya Karnataka Web

ಬ್ರಿಸ್ಟಲ್‌ : ಶ್ರೀಲಂಕಾ ಮತ್ತು ಬಾಂಗ್ಲಾದೇಶ ತಂಡಗಳ ನಡುವೆ ಮಂಗಳವಾರ ನಡೆಯಬೇಕಿದ್ದ ವಿಶ್ವಕಪ್‌ ಪಂದ್ಯ ಮಳೆಯ ಕಾರಣ ಟಾಸ್‌ ಸಹ ಕಾಣದೆ ರದ್ದಾಯಿತು. ಉಭಯ ತಂಡಗಳಿಗೆ ತಲಾ ಒಂದು ಅಂಕ ನೀಡಲಾಗಿದೆ. ಪ್ರಸಕ್ತ ಟೂರ್ನಿಯಲ್ಲಿ ಮಳೆಯಿಂದಾಗಿ ಶ್ರೀಲಂಕಾ ತಂಡ ಸತತ ಎರಡು ಪಂದ್ಯಗಳಲ್ಲಿ ಅಂಕ ಹಂಚಿಕೊಳ್ಳುವಂತಾಯಿತು.

ಎಡೆಬಿಡದೆ ಮಳೆ ಸುರಿದ ಕಾರಣ ಅಂಪೈರ್‌ಗಳು ಎರಡು ಸಲ ಪಿಚ್‌ ಪರಿಶೀಲನೆಯನ್ನು ಮುಂದೂಡಿದರು. ಮಳೆ ನಿಲ್ಲುವ ಲಕ್ಷಣಗಳು ಗೋಚರಿಸದ ಕಾರಣ ಅಂತಿಮವಾಗಿ ಸ್ಥಳೀಯ ಕಾಲಮಾನ ಮಧ್ಯಾಹ್ನ 1.57ಕ್ಕೆ ಪಂದ್ಯ ರದ್ದಾಗಿದೆ ಎಂದು ಪ್ರಕಟಿಸಿದರು.

ಲಂಕಾ-ಬಾಂಗ್ಲಾ ಪಂದ್ಯ ರದ್ದಾಗುವುದರೊಂದಿಗೆ ವಿಶ್ವಕಪ್‌ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಮಳೆಯಿಂದಾಗಿ ಒಂದೇ ಆವೃತ್ತಿಯಲ್ಲಿ ಒಂದೂ ಎಸೆತ ಕಾಣದೆ ಎರಡು ಪಂದ್ಯ ರದ್ದಾದಂತಾಗಿದೆ. 1979 ಮತ್ತು 2015ರ ಆವೃತ್ತಿಗಳಲ್ಲಿ ತಲಾ ಒಂದು ಪಂದ್ಯ ಮಳೆಯ ಕಾರಣ ರದ್ದಾಗಿದ್ದವು.

ಜೂನ್‌ 7ರಂದು ಬ್ರಿಸ್ಟಲ್‌ನಲ್ಲಿ ನಿಗದಿಯಾಗಿದ್ದ ಪಾಕಿಸ್ತಾನ ಮತ್ತು ಶ್ರೀಲಂಕಾ ನಡುವಿನ ಪಂದ್ಯ ಒಂದೂ ಎಸೆತ ಕಾಣದೆ ರದ್ದಾಗಿತ್ತು. ಸೋಮವಾರ ನಿಗದಿಯಾಗಿದ್ದ ದಕ್ಷಿಣ ಆಫ್ರಿಕಾ ಮತ್ತು ವೆಸ್ಟ್‌ ಇಂಡೀಸ್‌ ನಡುವಿನ ಪಂದ್ಯ ಮಳೆಯಿಂದ ಅರ್ಧಕ್ಕೆ ಮೊಟಕುಗೊಂಡ ಪರಿಣಾಮ ಅಂಕ ಹಂಚಿಕೊಳ್ಳಲಾಯಿತು. ಇದರೊಂದಿಗೆ ಮಳೆಯ ಕಾರಣ ಈ ಆವೃತ್ತಿಯಲ್ಲಿ ಮೂರು ಪಂದ್ಯಗಳು ರದ್ದುಗೊಂಡಂತಾಗಿದೆ.

ಭಾರತ-ಕಿವೀಸ್‌ ಪಂದ್ಯಕ್ಕೆ ಮಳೆ ಅಡ್ಡಿ?

ನಾಟಿಂಗ್‌ಹ್ಯಾಮ್‌: ಭಾರತ ಮತ್ತು ನ್ಯೂಜಿಲೆಂಡ್‌ ತಂಡಗಳ ನಡುವೆ ಗುರುವಾರ ನಡೆಯಬೇಕಿರುವ ಪಂದ್ಯಕ್ಕೆ ಮಳೆ ಅಡ್ಡಿಯಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಗುರುವಾರ ಮಧ್ಯಾಹ್ನದಿಂದ ಸಂಜೆ 7 ಗಂಟೆವರೆಗೂ ಮಳೆ ಸುರಿಯುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ. ಇಂಗ್ಲೆಂಡ್‌ನಾದ್ಯಂತ ಕಳೆದೆರಡು ದಿನಗಳಿಂದ ಮಳೆ ಸುರಿಯುತ್ತಿದ್ದು ಇಡೀ ವಾರ ಮುಂದುವರಿಯುವ ನಿರೀಕ್ಷೆ ಇದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ರವಾನಿಸಿದೆ. ''ಈ ವಾರದ ಹೆಚ್ಚಿನೆಲ್ಲ ದಿನಗಳಲ್ಲಿ ನಾಟಿಂಗ್‌ಹ್ಯಾಮ್‌ ಪ್ರದೇಶದಲ್ಲಿ ಮಳೆಯಾಗುವ ಕುರಿತು ಮುನ್ಸೂಚನೆ ನೀಡಲಾಗಿದೆ,''ಎಂದು ಅಲ್ಲಿನ ಸ್ಥಳೀಯ ವೆಬ್‌ಸೈಟ್‌ ನಾಟಿಂಗ್‌ಹ್ಯಾಮ್‌ ಪೋಸ್ಟ್‌ ವರದಿ ಮಾಡಿದೆ.