ಕೊನೆಗೂ ಗೆಲುವಿನ ನಗು ಬೀರಿದ ಭಾರತ

ಮುಂಬಯಿ: ಮೊದಲು ಬೌಲರುಗಳ ಸಾಂಘಿಕ ದಾಳಿ ಹಾಗೂ ಬಳಿಕ ಸ್ಮೃತಿ ಮಂಧಾನಾ (62*) ಅವರ ಸಮಯೋಚಿತ ಅರ್ಧಶತಕದ ನೆರವಿನೊಂದಿಗೆ ಭಾರತೀಯ ಮಹಿಳಾ ತಂಡವು ಇಂಗ್ಲೆಂಡ್ ವಿರುದ್ಧ ಎಂಟು ವಿಕೆಟುಗಳ ಅಂತರದ ಗೆಲುವು ದಾಖಲಿಸಿದೆ.

ಈ ಮೂಲಕ ಇಲ್ಲಿನ ಬ್ರಾಬೋರ್ನ್ ಸ್ಟೇಡಿಯಂನಲ್ಲಿ ಸಾಗುತ್ತಿರುವ ತ್ರಿಕೋನ ಟ್ವೆಂಟಿ-20 ಸರಣಿಯಲ್ಲಿ ಕೊನೆಗೂ ಗೆಲುವಿನ ನಗೆ ಬೀರಿದೆ.

ಆಗಲೇ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ಹರ್ಮನ್‌ಪ್ರೀತ್ ಕೌರ್ ಪಡೆಗೆ ಈ ಪಂದ್ಯ ಪ್ರತಿಷ್ಠೆಗಷ್ಟೇ ಸೀಮಿತಗೊಂಡಿತ್ತು. ಇದರೊಂದಿಗೆ ಸರಣಿಯಲ್ಲಿ ಸತತ ಮೂರು ಸೋಲುಗಳ ಬಳಿಕ ಕೊನೆಗೂ ಗೆಲುವು ದಾಖಲಿಸಿದೆ.

ಮೊದಲು ಬ್ಯಾಟಿಂಗ್ ನಡೆಸಿದ ಇಂಗ್ಲೆಂಡ್ ಮಹಿಳಾ ಪಡೆ, ಅನುಜಾ ಪಟೀಲ್ (21/3), ರಾಧಾ ಯಾದವ್ (16/2), ದೀಪ್ತಿ ಶರ್ಮಾ (24/2) ಹಾಗೂ ಪೂನಂ ಯಾದವ್ (17/2) ಸಾಂಘಿಕ ದಾಳಿಗೆ ಸಿಲುಕಿ 18.5 ಓವರ್‌ಗಳಲ್ಲೇ 107 ರನ್‌ಗಳಿಗೆ ತನ್ನೆಲ್ಲ ವಿಕೆಟುಗಳನ್ನು ಕಳೆದುಕೊಂಡಿತ್ತು.

ಭಾರತ ವಿರುದ್ದ ಮೊದಲ ಲೀಗ್ ಪಂದ್ಯದಲ್ಲಿ ಬಿರುಸಿನ ಶತಕ ಬಾರಿಸಿರುವ ಡೇನಿಯಲ್ ವ್ಯಾಟ್ ಗರಿಷ್ಠ 31 ರನ್ ಗಳಿಸಿದರು.

ಬಳಿಕ ರನ್ ಬೆನ್ನತ್ತಿಧ ಭಾರತ ಮಿಥಾಲಿ ರಾಜ್ (6) ಹಾಗೂ ಜೆಮ್ಮಿ ರೊಡ್ರಿಗಸ್ (7) ವಿಕೆಟುಗಳನ್ನು ಬೇಗನೇ ಕಳೆದುಕೊಂಡರೂ ಬಿರುಸಿನ ಅರ್ಧಶತಕ ಬಾರಿಸಿದ ಸ್ಮೃತಿ ಮಂಧಾನಾ ತಂಡದ ಗೆಲುವನ್ನು ಖಾತ್ರಿಪಡಿಸಿದರು.

ಇವರಿಗೆ ನಾಯಕಿ ಹರ್ಮನ್‌ಪ್ರೀತ್ ಕೌರ್ (20*) ಉತ್ತಮ ಬೆಂಬಲ ನೀಡಿದರು. ಇವರಿಬ್ಬರು ಮುರಿಯದ ಮೂರನೇ ವಿಕೆಟ್‌ಗೆ 60 ರನ್‌ಗಳ ಜತೆಯಾಟವನ್ನು ನೀಡಿದರು.

ಕೇವಲ 41 ಎಸೆತಗಳನ್ನು ಎದುರಿಸಿದ ಮಂಧಾನಾ ಎಂಟು ಬೌಂಡರಿ ಹಾಗೂ ಒಂದು ಸಿಕ್ಸರ್ ನೆರವಿನಿಂ 62 ರನ್ ಗಳಿಸಿ ಔಟಾಗದೆ ಉಳಿದರು. ಈ ಮೂಲಕ ಸರಣಿಯಲ್ಲಿ ಮೂರನೇ ಅರ್ಧಶತಕದ ಸಾಧನೆಯನ್ನು ಮಾಡಿದರು.

ಇದೀಗ ಶನಿವಾರದಂದು ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಆಸ್ಟ್ರೇಲಿಯಾ ಹಾಗೂ ಇಂಗ್ಲೆಂಡ್ ಮಹಿಳಾ ತಂಡಗಳು ಮುಖಾಮುಖಿಯಾಗಲಿದೆ.