ತವರಿನಲ್ಲಿ ಹರಿಣಗಳ ವಿರುದ್ಧ ಸೋಲಿನ ರುಚಿ ಅನುಭವಿಸಿದ ಕಿವೀಸ್‌ ಪಡೆ

ಆಕ್ಲೆಂಡ್: ಆತಿಥೇಯ ನ್ಯೂಜಿಲೆಂಡ್ ವಿರುದ್ಧ ನಡೆದ ಐದು ಪಂದ್ಯಗಳ ಏಕದಿನ ಸರಣಿಯನ್ನು 3-2ರ ಅಂತರದಲ್ಲಿ ಪ್ರವಾಸಿ ದಕ್ಷಿಣ ಆಫ್ರಿಕಾ ವಶಪಡಿಸಿಕೊಂಡಿದೆ. ಇದರೊಂದಿಗೆ ತವರಿನಲ್ಲಿ ಕಿವೀಸ್ ಪಡೆ ಬಲಿಷ್ಠ ಹರಿಣಗಳ ಮುಂದೆ ಸೋಲಿನ ರುಚಿ ಅನುಭವಿಸಿದೆ.

ಐದನೇ ಹಾಗೂ ನಿರ್ಣಾಯಕ ಏಕದಿನ ಪಂದ್ಯದಲ್ಲಿ ಬ್ಯಾಟಿಂಗ್ ವೈಫಲ್ಯಕ್ಕೊಳಗಾಗಿದ್ದ ಕಿವೀಸ್ ಪಡೆ 41.1 ಓವರ್‌ಗಳಲ್ಲಿ ಕೇವಲ 149 ರನ್‌ಗಳಿಗೆ ತನ್ನೆಲ್ಲ ವಿಕೆಟ್‌ಗಳನ್ನು ಕಳೆದುಕೊಂಡಿತ್ತು. ನಾಲ್ಕನೇ ಏಕದಿನ ಪಂದ್ಯದಲ್ಲಿ ಅಜೇಯ 180 ರನ್ ಗಳಿಸುವ ಮೂಲಕ ತಂಡಕ್ಕೆ ಅಗತ್ಯ ಗೆಲುವು ಒದಗಿಸಿಕೊಟ್ಟಿದ್ದ ಮಾರ್ಟಿನ್ ಗುಪ್ಟಿಲ್ (4) ಅವರನ್ನು ಆರಂಭದಲ್ಲೇ ಕ್ಲೀನ್ ಬೌಲ್ಡ್ ಮಾಡುವ ಮೂಲಕ ದ.ಆಫ್ರಿಕಾ ವೇಗಿ ಕಗಿಸೊ ರಬಡ, ಸಮಕಾಲೀನ ಕ್ರಿಕೆಟ್‌ನಲ್ಲಿ ಪರಿಣಾಮಕಾರಿ ವೇಗಿ ಎಂಬುದನ್ನು ನಿರೂಪಿಸಿದರು.

ನಿಖರ ದಾಳಿ ಸಂಘಟಿಸಿದ ರಬಡ ಮೂರು ಹಾಗೂ ಇಮ್ರಾನ್ ತಾಹೀರ್ ಮತ್ತು ಪೆಹ್ಲುಕಾಯೊ ತಲಾ ಎರಡು ವಿಕೆಟ್‌ಗಳನ್ನು ಕಬಳಿಸಿ ಕವೀಸ್ ಪಡೆಗೆ ಆಘಾತ ನೀಡಿದರು.

ಬಳಿಕ ಸುಲಭ ಮೊತ್ತವನ್ನು ಬೆನ್ನತ್ತಿದ್ದ ದ.ಆಫ್ರಿಕಾ ಆರಂಭದಲ್ಲೇ ಡಿ ಕಾಕ್ (6) ಹಾಗೂ ಹಾಶೀಮ್ ಆಮ್ಲಾ (8) ಹಾಗೂ ಜಿಪಿ ಡ್ಯುಮಿನಿ (3) ರೂಪದಲ್ಲಿ ಆಘಾತವನ್ನು ಎದುರಿಸಿದರೂ ಫಾವ್ ಡು ಪ್ಲೆಸ್ಸಿಸ್ (51*) ಹಾಗೂ ಡೇವಿಡ್ ಮಿಲ್ಲರ್ (45*) ತಂಡವನ್ನು ಗೆಲುವಿನ ಗೆರೆ ದಾಟಿಸಿದರು. ಈ ನಡುವೆ 23 ರನ್ ಗಳಿಸಿದ ನಾಯಕ ಎಬಿ ಡಿ ವಿಲಿಯರ್ಸ್ ತಂಡದ ಗೆಲುವನ್ನು ಸುಲಭಗೊಳಿಸಿದರು.