ಟೆಸ್ಟ್‌ ಕ್ರಿಕೆಟಿಗೆ ಸ್ಟೇನ್‌ ವಿದಾಯ

ಜೊಹಾನ್ಸ್‌ಬರ್ಗ್‌ : ಶ್ರೇಷ್ಠ ವೇಗದ ಬೌಲರ್‌ಗಳಲ್ಲಿ ಒಬ್ಬರಾದ ದಕ್ಷಿಣ ಆಫ್ರಿಕಾದ ಡೇಲ್‌ ಸ್ಟೇನ್‌ ಸೋಮವಾರ ಟೆಸ್ಟ್‌ ಕ್ರಿಕೆಟಿಗೆ ವಿದಾಯ ಘೋಷಿಸಿದ್ದಾರೆ. ಆದರೆ ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲಿ ಮುಂದುವರಿಯುವುದಾಗಿ 36 ವರ್ಷದ ಬೌಲರ್‌ ತಿಳಿಸಿದ್ದಾರೆ.

2004ರಲ್ಲಿ ಇಂಗ್ಲೆಂಡ್‌ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟಿಗೆ ಪದಾರ್ಪಣೆ ಮಾಡಿದ್ದ ಸ್ಟೇನ್‌, ಕಳೆದ ಫೆಬ್ರವರಿಯಲ್ಲಿ ಶ್ರೀಲಂಕಾ ವಿರುದ್ಧ ಕೊನೆಯ ಟೆಸ್ಟ್‌ ಆಡಿದ್ದರು. ದ.ಆಫ್ರಿಕಾ ಪರ 93 ಟೆಸ್ಟ್‌ ಆಡಿರುವ ಸ್ಟೇನ್‌, 439 ವಿಕೆಟ್‌ಗಳ ಜತೆಗೆ 1251 ರನ್‌ ಗಳಿಸಿದ್ದಾರೆ.

''ಇಂದು ನಾನು ಬಹಳ ಇಷ್ಟಪಡುವ ಟೆಸ್ಟ್‌ ಕ್ರಿಕೆಟಿನಿಂದ ದೂರ ಸರಿಯುತ್ತಿದ್ದೇನೆ,'' ಎಂದು ದಕ್ಷಿಣ ಆಫ್ರಿಕಾ ಪರ ಅತ್ಯಧಿಕ ವಿಕೆಟ್‌ ಪಡೆದ ಬೌಲರ್‌ ಸೋಮವಾರ ತಿಳಿಸಿದರು.