ಲಂಡನ್‌: ಪ್ರಸಕ್ತ ಸಾಲಿನ ಇಂಗ್ಲಿಷ್‌ ಕೌಂಟಿ ಟೂರ್ನಿಯ ನಂತರ ಪ್ರಥಮದರ್ಜೆ ಕ್ರಿಕೆಟ್‌ನಿಂದ ನಿವೃತ್ತಿಯಾಗುವುದಾಗಿ ಶ್ರೀಲಂಕಾದ ಬ್ಯಾಟಿಂಗ್‌ ದಿಗ್ಗಜ ಕುಮಾರ ಸಂಗಕ್ಕಾರ ತಿಳಿಸಿದ್ದಾರೆ.
ಅಂತಾರಾಷ್ಟ್ರೀಯ ಕ್ರಿಕೆಟ್‌ನಿಂದ ಈಗಾಗಲೇ ನಿವೃತ್ತಿಯಾಗಿರುವ ಸಂಗಕ್ಕಾರ, ಸದ್ಯ ಇಂಗ್ಲಿಷ್‌ ಕೌಂಟಿಯಲ್ಲಿ ಸರ್ರೆ ತಂಡದ ಪರ ಆಡುತ್ತಿದ್ದಾರೆ. ಕಳೆದ ವಾರ ನಡೆದ ಮಿಡ್ಲ್‌ಸೆಕ್ಸ್‌ ವಿರುದ್ಧದ ಪಂದ್ಯದ ಮೂಲಕ ಸಂಗಕ್ಕಾರ ಪ್ರಥಮದರ್ಜೆ ಕ್ರಿಕೆಟ್‌ನಲ್ಲಿ 20 ಸಾವಿರ ರನ್‌ಗಳ ಗಡಿ ದಾಟಿದ್ದರು. ಈ ಸಾಧನೆ ಮಾಡಿದ ಶ್ರೀಲಂಕಾದ ಮೊದಲ ಕ್ರಿಕೆಟಿಗ ಎಂಬ ಗೌರವಕ್ಕೆ ಸಂಗಕ್ಕಾರ ಪಾತ್ರರಾಗಿದ್ದಾರೆ. ಪ್ರಥಮದರ್ಜೆ ಕ್ರಿಕೆಟ್‌ನಲ್ಲಿ 254 ಪಂದ್ಯಗಳನ್ನಾಡಿರುವ ಸಂಗಕ್ಕಾರ 51.18ರ ಸರಾಸರಿ ಹೊಂದಿದ್ದು, 60 ಶತಕ ಹಾಗೂ 85 ಅರ್ಧಶತಕ ಬಾರಿಸಿದ್ದಾರೆ. ''ಲಾರ್ಡ್ಸ್‌ನಲ್ಲಿ ಕೊನೆಯ ಬಾರಿ ನಾಲ್ಕು ದಿನಗಳ ಪಂದ್ಯವಾಡಲಿದ್ದೇನೆ. ಕೆಲವೇ ತಿಂಗಳಲ್ಲಿ ನನಗೆ 40 ವರ್ಷ ತುಂಬಲಿದೆ. ಇದು ಕೌಂಟಿ ಕ್ರಿಕೆಟ್‌ನಲ್ಲಿ ನನ್ನ ಕೊನೆಯ ಟೂರ್ನಿ,'' ಎಂದು ಸಂಗಕ್ಕಾರ ಹೇಳಿದ್ದಾರೆ.