ವಿಂಡೀಸ್ ವಿರುದ್ಧ ಲಂಕಾಗೆ ಗೆಲುವು; ಸರಣಿ ಸಮಬಲ

ಬಾರ್ಬಡೋಸ್: ಮೂರನೇ ಹಾಗೂ ಅಂತಿಮ ಟೆಸ್ಟ್ ಪಂದ್ಯದಲ್ಲಿ ನಾಲ್ಕು ವಿಕೆಟುಗಳ ಅಂತರದ ರೋಚಕ ಗೆಲುವು ದಾಖಲಿಸಿರುವ ಪ್ರವಾಸಿ ಶ್ರೀಲಂಕಾ ತಂಡವು ಆತಿಥೇಯ ವೆಸ್ಟ್‌ಇಂಡೀಸ್ ವಿರುದ್ಧ ನಡೆದ ಮೂರು ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 1-1 ಅಂತರದ ಸಮಬಲ ಸಾಧಿಸಿದೆ.

ಮೊದಲ ಟೆಸ್ಟ್ ಪಂದ್ಯದಲ್ಲಿ ಸೋಲನುಭವಿಸಿರುವ ಲಂಕನ್ ಪಡೆ ಎರಡನೇ ಪಂದ್ಯದಲ್ಲಿ ಡ್ರಾ ಫಲಿತಾಂಶಕ್ಕೆ ತೃಪ್ತಿಪಟ್ಟುಕೊಂಡಿತ್ತು.

ಗೆಲುವಿಗಾಗಿ ಕೊನೆಯ ಇನ್ನಿಂಗ್ಸ್‌ನಲ್ಲಿ 144 ರನ್ ಬೆನ್ನತ್ತಿದ ಶ್ರೀಲಂಕಾ ಆರು ವಿಕೆಟ್ ನಷ್ಟಕ್ಕೆ ಗೆಲುವಿನ ಗುರಿ ತಲುಪಿತು. ಒಂದು ಹಂತದಲ್ಲಿ 81 ರನ್‌ಗಳಿಗೆ ಆರು ವಿಕೆಟುಗಳನ್ನು ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದ ಲಂಕಾ ಪಡೆಗೆ ಮುರಿಯದ ಏಳನೇ ವಿಕೆಟ್‌ಗೆ ದಿಲ್‌ರುವಾನ್ ಪರೇರಾ ಹಾಗೂ ಕುಸಾಲ್ ಪರೇರಾ 63 ರನ್‌ಗಳ ಜತೆಯಾಟ ನೀಡುವ ಮೂಲಕ ತಂಡವನ್ನು ಗೆಲುವಿನ ದಡ ಸೇರಿಸಿದರು.

ವಿಂಡೀಸ್ ಪರ ನಾಯಕ ಜೇಸನ್ ಹೋಲ್ಡರ್ 41 ರನ್ ರನ್ ತೆತ್ತು ಐದು ವಿಕೆಟುಗಳನ್ನು ಪಡೆದರೂ ಯಾವುದೇ ಪ್ರಯೋಜನವುಂಟಾಗಲಿಲ್ಲ.

ಮುಖ್ಯಾಂಶ: ಬಾರ್ಬಡೋಸ್‌ನಲ್ಲಿ ಟೆಸ್ಟ್ ಪಂದ್ಯ ಗೆದ್ದ ಏಷ್ಯಾದ ಮೊದಲ ತಂಡ

ಇದಕ್ಕೂ ಮುನ್ನ ವಿಂಡೀಸ್‌ನ 204 ರನ್‌ಗಳಿಗೆ ಉತ್ತರವಾಗಿ ಲಂಕಾ 154 ರನ್‌ಗಳಿಗೆ ಸರ್ವಪತನವನ್ನು ಕಂಡಿತ್ತು. ಇದರಂತೆ ಮೊದಲ ಇನ್ನಿಂಗ್ಸ್‌ನಲ್ಲಿ 50 ರನ್‌ಗಳ ಮಹತ್ವದ ಮುನ್ನಡೆ ದಾಖಲಿಸಿರುವುದರ ಹೊರತಾಗಿಯೂ ವಿಂಡೀಸ್ ತನ್ನ ದ್ವಿತೀಯ ಇನ್ನಿಂಗ್ಸ್‌ನಲ್ಲಿ 93 ರನ್‌ಗಳಿಗೆ ಆಲೌಟಾಗಿತ್ತು.

ದ್ವಿತೀಯ ಟೆಸ್ಟ್ ಪಂದ್ಯದಲ್ಲಿ ಬಾಲ್ ಟ್ಯಾಂಪರಿಂಗ್ ಪ್ರಕರಣಕ್ಕೆ ಸಂಬಂಧಿಸಿದಂತೆ ಒಂದು ಪಂದ್ಯದ ನಿಷೇಧಕ್ಕೊಳಗಾಗಿರುವ ದಿನೇಶ್ ಚಾಂದಿಮಾಲ್ ಅನುಪಸ್ಥಿತಿಯಲ್ಲಿ ಸುರಂಗ ಲಕ್ಮಲ್ ಲಂಕಾ ತಂಡವನ್ನು ಮುನ್ನಡೆಸಿದ್ದರು.

ಸಂಕ್ಷಿಪ್ತ ಸ್ಕೋರ್ ಇಂತಿದೆ:

ವೆಸ್ಟ್‌ಇಂಡೀಸ್ ಮೊದಲ ಇನ್ನಿಂಗ್ಸ್:
ಶೇನ್ ಡೌರಿಚ್ 71, ಜೇಸನ್ ಹೋಲ್ಡರ್ 74
ಲಹಿರು ಕುಮಾರ 58ಕ್ಕೆ 4

ಶ್ರೀಲಂಕಾ ಮೊದಲ ಇನ್ನಿಂಗ್ಸ್:
ನಿರೋಶನ್ ಡಿಕ್‌ವೆಲ್ಲಾ 42,
ಜೇಸನ್ ಹೋಲ್ಡರ್ 19ಕ್ಕೆ 4

ವೆಸ್ಟ್‌ಇಂಡೀಸ್ ಎರಡನೇ ಇನ್ನಿಂಗ್ಸ್:
ಕೆಮರ್ ರೋಚ್ ಅಜೇಯ 23
ಸುರಂಗ ಲಕ್ಮಲ್ 25ಕ್ಕೆ 3 ಮತ್ತು ಕಸುನ್ ರಜಿತ 20ಕ್ಕೆ 3

ಶ್ರೀಲಂಕಾ ಎರಡನೇ ಇನ್ನಿಂಗ್ಸ್:
ಕುಸಾಲ್ ಪರೇರಾ ಅಜೇಯ 28
ದಿಲ್‌ರುವಾನ್ ಪರೇರಾ ಅಜೇಯ 23
ಜೇಸನ್ ಹೋಲ್ಡರ್ 41ಕ್ಕೆ 5