ಭಾರತದ ವಿರುದ್ಧ 38 ವರ್ಷದ ಹಳೆಯ ದಾಖಲೆ ಮುರಿದ ಲಂಕಾ

ಲಂಡನ್: ಐಸಿಸಿ ಚಾಂಪಿಯನ್ಸ್ ಟ್ರೋಫಿ 2017 ಏಕದಿನ ಕ್ರಿಕೆಟ್ ಟೂರ್ನಮೆಂಟ್‌ನಲ್ಲಿ ಗುರುವಾರ ಭಾರತದ ವಿರುದ್ಧ ನಡೆದ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಗೆಲುವು ದಾಖಲಿಸಿರುವ ಶ್ರೀಲಂಕಾ ಅಪರೂಪದ ದಾಖಲೆಯೊಂದನ್ನು ಬರೆದಿದೆ.

ಈ ಮೂಲಕ ಇಂಗ್ಲೆಂಡ್ ನೆಲದಲ್ಲಿ ಬರೋಬ್ಬರಿ 38 ವರ್ಷಗಳ ಬಳಿಕ ಭಾರತದ ವಿರುದ್ಧ ಸಿಂಹಳೀಯರ ಪಡೆ ಗೆಲುವು ದಾಖಲಿಸಿದೆ.

ಈ ಹಿಂದೆ 1979ರ ವಿಶ್ವಕಪ್ ಪಂದ್ಯದಲ್ಲಿ ಸುನಿಲ್ ಗಾವಸ್ಕರ್, ಕಪಿಲ್ ದೇವ್, ದಿಲೀಪ್ ವಂಗಸರ್ಕಾರ್, ಗುಂಡಪ್ಪ ವಿಶ್ವನಾಥ್, ಮೊಹಿಂದರ್ ಅಮರ್‌ನಾಥ್, ಶ್ರೀನಿವಾಸ್ ವೆಂಕಟರಾಘವನ್ ಹಾಗೂ ಬಿಷನ್ ಸಿಂಗ್ ಬೇಡಿ‌ಗಳಂತಹ ದಿಗ್ಗಜರನ್ನೊಳಗೊಂಡು ಭಾರತ ತಂಡವನ್ನು ಲಂಕನ್ ಪಡೆ ಮಣಿಸಿತ್ತು.

ಟೆಸ್ಟ್ ಮಾನ್ಯತೆ ಪಡೆದುವುದಕ್ಕಿಂತಲೂ ಮೊದಲು ಶ್ರೀಲಂಕಾ ಇಂತಹದೊಂದು ಸಾಧನೆ ಬರೆದಿತ್ತು. 57 ಎಸೆತಗಳಲ್ಲಿ 64 ರನ್ ಬಾರಿಸಿದ್ದ ದುಲೀಪ್ ಮೆಂಡಿಸ್ ಲಂಕಾದ ಪರ ಸ್ಟಾರ್ ಎನಿಸಿದ್ದರು.

ಕಾಕತಾಳೀಯವೆಂಬಂತೆ ಭಾರತದ ವಿರುದ್ಧದ ಪಂದ್ಯದಲ್ಲೂ ಮೆಂಡಿಸ್ ಎಂಬ ಹೆಸರಿನ ಬ್ಯಾಟ್ಸ್‌ಮನ್ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು. ಕುಸಾಲ್ ಮೆಂಡಿಸ್ ಬಾರಿಸಿದ 89 ರನ್ ನೆರವಿನಿಂದ ಶ್ರೀಲಂಕಾ ತನ್ನ ಏಕದಿನ ಇತಿಹಾಸದಲ್ಲೇ ಗರಿಷ್ಠ 322 ರನ್‌ಗಳ ಮೊತ್ತ ಬೆನ್ನತ್ತುವ ಮೂಲಕ ಹಾಲಿ ಚಾಂಪಿಯನ್ ಭಾರತಕ್ಕೆ ಶಾಕ್ ನೀಡಿತ್ತು.

1979ರ ಸೋಲಿನ ಬಳಿಕ ಶ್ರೀಲಂಕಾ ವಿರುದ್ಧ ಐದು ಬಾರಿ ಎದುರಾದರೂ ಪ್ರತಿ ಸಲವೂ ಟೀಮ್ ಇಂಡಿಯಾ ಗೆಲುವು ದಾಖಲಿಸಿತ್ತು.