ಮ್ಯಾಥ್ಯೂಸ್‌ಗೆ ಮತ್ತೆ ಲಂಕಾ ಕಪ್ತಾನಗಿರಿ

ಕೊಲಂಬೊ: ಶ್ರೀಲಂಕಾದ ಅನುಭವಿ ಆಲ್‌ರೌಂಡರ್ ಆಟಗಾರ ಆ್ಯಂಗಲೋ ಮ್ಯಾಥ್ಯೂಸ್ ಅವರಿಗೆ ಮತ್ತೆ ಏಕದಿನ ತಂಡದ ಕಪ್ತಾನಗಿರಿಯನ್ನು ವಹಿಸಿಕೊಡಲಾಗಿದೆ.

ಕಳೆದ ಕೆಲವು ಸರಣಿಗಳಲ್ಲಿ ಅನೇಕ ಬಾರಿ ನಾಯಕತ್ವ ಬದಲಾವಣೆಗಳ ಬಳಿಕ ಶ್ರೀಲಂಕಾ ಕ್ರಿಕೆಟ್ ಮಂಡಳಿಯು ಮತ್ತೆ ಮ್ಯಾಥ್ಯೂಸ್ ಮೊರೆ ಹೋಗಲು ನಿರ್ಧರಿಸಿದೆ.

ಕಳೆದ ವರ್ಷ ಜಿಂಬಾಬ್ವೆ ವಿರುದ್ಧ ಎದುರಾದ ಆಘಾತಕಾರಿ ಸೋಲಿನ ಬಳಿಕ ಮ್ಯಾಥ್ಯೂಸ್ ನಾಯಕತ್ವ ಸ್ಥಾನವನ್ನು ಬಿಟ್ಟು ಕೊಟ್ಟಿದ್ದರು. ಅಲ್ಲಿಂದ ಬಳಿಕ ಟೆಸ್ಟ್ ನಾಯಕನಾಗಿ ದಿನೇಶ್ ಚಾಂದಿಮಾಲ್ ಹಾಗೂ ಏಕದಿನ ತಂಡಕ್ಕೆ ಕಪ್ತಾನರಾಗಿ ಉಪುಲ್ ತರಂಗ ಅವರನ್ನು ನೇಮಕಗೊಳಿಸಲಾಗಿತ್ತು.

ಕೊನೆಗೆ ಉಪುಲ್ ತರಂಗ ಸ್ಥಾನಕ್ಕೆ ತಿಸರಾ ಪರೇರಾ ಅವರನ್ನು ನಾಯಕನಾಗಿ ನೇಮಕಗೊಳಿಸಲಾಗಿತ್ತು. ಆದರೆ ತಂಡವು ವೈಫಲ್ಯ ಅನುಭವಿಸಿತ್ತು. ಇದೀಗ ಮತ್ತೆ ಮ್ಯಾಥ್ಯೂಸ್ ಮೊರೆ ಹೋಗಲಾಗಿದೆ.

ನಾನು ನಾಯಕತ್ವ ಸ್ಥಾನ ಬಿಟ್ಟುಕೊಡುವಾಗ ಮತ್ತೆ ಕಪ್ತಾನಗಿರಿ ವಹಿಸಲಿದ್ದೇನೆಂದು ಅಂದುಕೊಂಡಿರಲಿಲ್ಲ ಎಂದು ಮ್ಯಾಥ್ಯೂಸ್ ಪ್ರತಿಕ್ರಿಯಿಸಿದ್ದಾರೆ.

ಪ್ರಸ್ತುತ ಇಂಗ್ಲೆಂಡ್‌ನಲ್ಲಿ 2019ರಲ್ಲಿ ಸಾಗಲಿರುವ ಏಕದಿನ ವಿಶ್ವಕಪ್ ವರೆಗೂ ಮ್ಯಾಥ್ಯೂಸ್ ನಾಯಕರಾಗಿ ಮುಂದುವರಿಯುವ ಸಾಧ್ಯತೆಯಿದೆ.