ವಿರಾಟ್ ಕೊಹ್ಲಿ ಪಾಲಿಗೆ ಟೆಸ್ಟ್ ಅಗ್ರಪಟ್ಟ ಮರಳಿ ಪಡೆಯುವುದು ಅಷ್ಟು ಸುಲಭವಲ್ಲ!

ದುಬೈ: ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ತಾಜಾ ಬಿಡುಗಡೆ ಮಾಡಿರುವ ಟೆಸ್ಟ್ ಬ್ಯಾಟಿಂಗ್ ರ‍್ಯಾಂಕಿಂಗ್ ಪಟ್ಟಿಯಲ್ಲಿ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಜತೆಗಿನ ಅಂತರವನ್ನು ಮತ್ತಷ್ಟು ವೃದ್ಧಿಸಿಕೊಂಡಿರುವ ಆಸ್ಟ್ರೇಲಿಯಾ ನಾಯಕ ಸ್ಟೀವ್ ಸ್ಮಿತ್, ಅಗ್ರಸ್ಥಾನವನ್ನು ಮತ್ತಷ್ಟು ಭದ್ರವಾಗಿಸಿದ್ದಾರೆ.

ಕಳೆದ ವಾರವಷ್ಟೇ ವಿರಾಟ್ ಕೊಹ್ಲಿ ಅವರನ್ನು ಹಿಂದಕ್ಕೆ ತಳ್ಳಿದ ಸ್ಮಿತ್, ಟೆಸ್ಟ್ ಬ್ಯಾಟಿಂಗ್ ಶ್ರೇಯಾಂಕ ಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದ್ದರು. ತದಾ ಬಳಿಕ ಇಂಗ್ಲೆಂಡ್ ವಿರುದ್ಧ ನಡೆದ ಆ್ಯಶಸ್ ಟೆಸ್ಟ್ ಸರಣಿಯ ನಾಲ್ಕನೇ ಪಂದ್ಯದಲ್ಲೂ ಅಮೋಘ ದ್ವಿಶತಕ ಹಾಗೂ ಅರ್ಧಶತಕ ಸಾಧನೆ ಮಾಡಿದ್ದರು.

ರಾಹುಲ್ ಫಾರ್ಮ್ ಕಳವಳಕಾರಿ; ಟೆಸ್ಟ್‌ನಲ್ಲೂ ರೋಹಿತ್‌ಗೆ ಓಪನರ್ ಸ್ಥಾನ ನೀಡಲಿರುವ ಆಯ್ಕೆ ಸಮಿತಿ?

ಇವೆಲ್ಲದರ ಬೆಂಬಲದೊಂದಿಗೆ 937 ರೇಟಿಂಗ್ ಪಾಯಿಂಟ್ ಕಲೆ ಹಾಕಿರುವ ಆಸೀಸ್ ಮಾಜಿ ನಾಯಕ ಸ್ಮಿತ್ ಅಗ್ರಸ್ಥಾನದಲ್ಲಿ ವಿರಾಜಮಾನವಾಗಿದ್ದಾರೆ. ಎರಡನೇ ಸ್ಥಾನದಲ್ಲಿರುವ ವಿರಾಟ್ ಕೊಹ್ಲಿಗಿಂತಲೂ 34 ಅಂಕಗಳ ಸ್ಪಷ್ಟ ಅಂತರವನ್ನು ಕಾಯ್ದುಕೊಂಡಿದ್ದಾರೆ.

ವೆಸ್ಟ್‌ಇಂಡೀಸ್ ಪ್ರವಾಸದಲ್ಲಿ ಸರಾಸರಿ ಪ್ರದರ್ಶನ ನೀಡಿರುವ ವಿರಾಟ್ 903 ಅಂಕಗಳನ್ನು ಹೊಂದಿದ್ದಾರೆ. ಕೇನ್ ವಿಲಿಯಮ್ಸನ್, ಚೇತೇಶ್ವರ ಪೂಜಾರ ಹಾಗೂ ಹೆನ್ರಿ ನಿಕೋಲಸ್ ಸ್ಥಾನಗಳಲ್ಲಿ ಯಾವುದೇ ಬದಲಾವಣೆಯುಂಟಾಗಲಿಲ್ಲ. ಅಲ್ಲದೆ ಅನುಕ್ರಮವಾಗಿ ಮೂರು, ನಾಲ್ಕು ಹಾಗೂ ಐದನೇ ಸ್ಥಾನಗಳನ್ನು ಹಂಚಿಕೊಂಡಿದ್ದಾರೆ.

ಗಣಿತದಲ್ಲಿ 3 ಮಾರ್ಕ್ ಪಡೆದ ವಿರಾಟ್ ಕೊಹ್ಲಿ ಟಾಪ್ ಕ್ರಿಕೆಟರ್ ಹೇಗಾದ ಗೊತ್ತಾ?

2017ರಲ್ಲಿ ಸ್ಟೀವ್ ಸ್ಮಿತ್ ದಾಖಲೆಯ 947 ರೇಟಿಂಗ್ ಪಾಯಿಂಟ್‌ಗಳನ್ನು ಪಡೆದಿದ್ದರು. ಇದೀಗ ಈ ದಾಖಲೆ ತಲುಪಲು ಇನ್ನು 10 ಅಂಕಗಳ ಅಗತ್ಯವಿದೆ.

ಐಸಿಸಿ ಟಾಪ್ 10 ಟೆಸ್ಟ್ ಬ್ಯಾಟಿಂಗ್ ರ‍್ಯಾಂಕಿಂಗ್ ಪಟ್ಟಿ ಇಂತಿದೆ:
1. ಸ್ಟೀವ್ ಸ್ಮಿತ್: 937
2. ವಿರಾಟ್ ಕೊಹ್ಲಿ: 903
3. ಕೇನ್ ವಿಲಿಯಮ್ಸನ್: 878
4. ಚೇತೇಶ್ವರ ಪೂಜಾರ: 825
5. ಹೆನ್ರಿ ನಿಕೋಲಸ್: 749
6. ಜೋ ರೂಟ್: 726
7. ಅಜಿಂಕ್ಯ ರಹಾನೆ: 725
8. ಟಾಮ್ ಲ್ಯಾಥಮ್: 724
9. ದಿಮುತ್ ಕರುಣಾರತ್ನೆ: 723
10. ಏಡೆನ್ ಮಾರ್ಕ್ರಂ: 719